૭. પાદુકવગ્ગો

૧૫૬. અનાદરિયં પટિચ્ચ પાદુકારુળ્હસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ ઉપાહનારુળ્હસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ યાનગતસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ સયનગતસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ પલ્લત્થિકાય નિસિન્નસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાને સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ વેઠિતસીસસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ ઓગુણ્ઠિતસીસસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ છમાયં નિસીદિત્વા આસને નિસિન્નસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ…પે….

અનાદરિયં પટિચ્ચ નીચે આસને નિસીદિત્વા ઉચ્ચે આસને નિસિન્નસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ…પે….

અનાદરિયં પટિચ્ચ ઠિતેન નિસિન્નસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ…પે….

અનાદરિયં પટિચ્ચ પચ્છતો ગચ્છન્તેન પુરતો ગચ્છન્તસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ…પે….

અનાદરિયં પટિચ્ચ ઉપ્પથેન ગચ્છન્તેન પથેન ગચ્છન્તસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ વાચતો ચ ચિત્તતો ચ સમુટ્ઠાતિ…પે….

અનાદરિયં પટિચ્ચ ઠિતેન ઉચ્ચારં વા પસ્સાવં વા કરોન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાને સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ હરિતે ઉચ્ચારં વા પસ્સાવં વા ખેળં વા કરોન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ ઉદકે ઉચ્ચારં વા પસ્સાવં વા ખેળં વા કરોન્તસ્સ દુક્કટં…પે… કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયે ભિક્ખૂ આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખૂ ઉદકે ઉચ્ચારમ્પિ પસ્સાવમ્પિ ખેળમ્પિ અકંસુ, તસ્મિં વત્થુસ્મિં. એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

પાદુકવગ્ગો સત્તમો.

પઞ્ચસત્તતિ સેખિયા નિટ્ઠિતા.

તસ્સુદ્દાનં –

પરિમણ્ડલં પટિચ્છન્નં, સુસંવુતોક્ખિત્તચક્ખુ;

ઉક્ખિત્તોજ્જગ્ઘિકા સદ્દો, તયો ચેવ પચાલના.

ખમ્ભં ઓગુણ્ઠિતો ચેવુક્કુટિપલ્લત્થિકાય ચ;

સક્કચ્ચં પત્તસઞ્ઞી ચ, સમસૂપં સમતિત્તિકં [સમતિત્થિકં (ક.)].

સક્કચ્ચં પત્તસઞ્ઞી ચ, સપદાનં સમસૂપકં;

થૂપકતો પટિચ્છન્નં, વિઞ્ઞત્તુજ્ઝાનસઞ્ઞિના.

ન મહન્તં મણ્ડલં દ્વારં, સબ્બં હત્થં ન બ્યાહરે;

ઉક્ખેપો છેદના ગણ્ડો, ધુનં સિત્થાવકારકં.

જિવ્હાનિચ્છારકઞ્ચેવ, ચપુચપુ સુરુસુરુ;

હત્થો પત્તો ચ ઓટ્ઠો ચ, સામિસં સિત્થકેન ચ.

છત્તપાણિસ્સ સદ્ધમ્મં, ન દેસેન્તિ તથાગતા;

એવમેવ દણ્ડપાણિસ્સ, સત્થઆવુધપાણિનં.

પાદુકા ઉપાહના ચેવ, યાનસેય્યાગતસ્સ ચ;

પલ્લત્થિકા નિસિન્નસ્સ, વેઠિતોગુણ્ઠિતસ્સ ચ.

છમા નીચાસને ઠાને, પચ્છતો ઉપ્પથેન ચ;

ઠિતકેન ન કાતબ્બં, હરિતે ઉદકમ્હિ ચાતિ.

તેસં વગ્ગાનમુદ્દાનં –

પરિમણ્ડલઉજ્જગ્ઘિ, ખમ્ભં પિણ્ડં તથેવ ચ;

કબળા સુરુસુરુ ચ, પાદુકેન ચ સત્તમાતિ.

મહાવિભઙ્ગે કત્થપઞ્ઞત્તિવારો નિટ્ઠિતો.