૬. સુરુસુરુવગ્ગો

૧૫૫. અનાદરિયં પટિચ્ચ સુરુસુરુકારકં ભુઞ્જન્તસ્સ દુક્કટં કત્થ પઞ્ઞત્તન્તિ? કોસમ્બિયં પઞ્ઞત્તં. કં આરબ્ભાતિ? સમ્બહુલે ભિક્ખૂ આરબ્ભ. કિસ્મિં વત્થુસ્મિન્તિ? સમ્બહુલા ભિક્ખૂ સુરુસુરુકારકં ખીરં પિવિંસુ, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ હત્થનિલ્લેહકં ભુઞ્જન્તસ્સ દુક્કટં…પે… એકા પઞ્ઞત્તિ. એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ પત્તનિલ્લેહકં ભુઞ્જન્તસ્સ દુક્કટં…પે… એકા પઞ્ઞત્તિ. એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ ઓટ્ઠનિલ્લેહકં ભુઞ્જન્તસ્સ દુક્કટં…પે… એકા પઞ્ઞત્તિ. એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ સામિસેન હત્થેન પાનીયથાલકં પટિગ્ગણ્હન્તસ્સ દુક્કટં કત્થ પઞ્ઞત્તન્તિ? ભગ્ગેસુ પઞ્ઞત્તં. કં આરબ્ભાતિ? સમ્બહુલે ભિક્ખૂ આરબ્ભ. કિસ્મિં વત્થુસ્મિન્તિ? સમ્બહુલા ભિક્ખૂ સામિસેન હત્થેન પાનીયથાલકં પટિગ્ગહેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ સસિત્થકં પત્તધોવનં અન્તરઘરે છડ્ડેન્તસ્સ દુક્કટં કત્થ પઞ્ઞત્તન્તિ? ભગ્ગેસુ પઞ્ઞત્તં. કં આરબ્ભાતિ? સમ્બહુલે ભિક્ખૂ આરબ્ભ. કિસ્મિં વત્થુસ્મિન્તિ? સમ્બહુલા ભિક્ખૂ સસિત્થકં પત્તધોવનં અન્તરઘરે છડ્ડેસું, તસ્મિં વત્થુસ્મિં. એકા પઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – કાયતો ચ ચિત્તતો ચ સમુટ્ઠાતિ, ન વાચતો…પે….

અનાદરિયં પટિચ્ચ છત્તપાણિસ્સ ધમ્મં દેસેન્તસ્સ દુક્કટં કત્થ પઞ્ઞત્તન્તિ? સાવત્થિયં પઞ્ઞત્તં. કં આરબ્ભાતિ? છબ્બગ્ગિયે ભિક્ખૂ આરબ્ભ. કિસ્મિં વત્થુસ્મિન્તિ? છબ્બગ્ગિયા ભિક્ખૂ છત્તપાણિસ્સ ધમ્મં દેસેસું, તસ્મિં વત્થુસ્મિં. એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ દણ્ડપાણિસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ સત્થપાણિસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

અનાદરિયં પટિચ્ચ આવુધપાણિસ્સ ધમ્મં દેસેન્તસ્સ દુક્કટં…પે… એકા પઞ્ઞત્તિ, એકા અનુપઞ્ઞત્તિ. છન્નં આપત્તિસમુટ્ઠાનાનં એકેન સમુટ્ઠાનેન સમુટ્ઠાતિ – વાચતો ચ ચિત્તતો ચ સમુટ્ઠાતિ, ન કાયતો…પે….

સુરુસુરુવગ્ગો છટ્ઠો.