૫. ચીવરઅચ્છિન્દનસિક્ખાપદં

૬૩૧. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન આયસ્મા ઉપનન્દો સક્યપુત્તો ભાતુનો સદ્ધિવિહારિકં ભિક્ખું એતદવોચ – ‘‘એહાવુસો, જનપદચારિકં પક્કમિસ્સામા’’તિ. ‘‘નાહં, ભન્તે, ગમિસ્સામિ; દુબ્બલચીવરોમ્હી’’તિ. ‘‘એહાવુસો, અહં તે ચીવરં દસ્સામી’’તિ તસ્સ ચીવરં અદાસિ. અસ્સોસિ ખો સો ભિક્ખુ – ‘‘ભગવા કિર જનપદચારિકં પક્કમિસ્સતી’’તિ. અથ ખો તસ્સ ભિક્ખુનો એતદહોસિ – ‘‘ન દાનાહં આયસ્મતા ઉપનન્દેન સક્યપુત્તેન સદ્ધિં જનપદચારિકં પક્કમિસ્સામિ, ભગવતા સદ્ધિં જનપદચારિકં પક્કમિસ્સામી’’તિ. અથ ખો આયસ્મા ઉપનન્દો સક્યપુત્તો તં ભિક્ખું એતદવોચ – ‘‘એહિ દાનિ, આવુસો, જનપદચારિકં પક્કમિસ્સામા’’તિ. ‘‘નાહં, ભન્તે, તયા સદ્ધિં જનપદચારિકં પક્કમિસ્સામિ, ભગવતા સદ્ધિં જનપદચારિકં પક્કમિસ્સામી’’તિ. ‘‘યમ્પિ ત્યાહં, આવુસો, ચીવરં અદાસિં, મયા સદ્ધિં જનપદચારિકં પક્કમિસ્સતી’’તિ, કુપિતો અનત્તમનો અચ્છિન્દિ.

અથ ખો સો ભિક્ખુ ભિક્ખૂનં એતમત્થં આરોચેસિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ આયસ્મા ઉપનન્દો સક્યપુત્તો ભિક્ખુસ્સ સામં ચીવરં દત્વા કુપિતો અનત્તમનો અચ્છિન્દિસ્સતી’’તિ! અથ ખો તે ભિક્ખૂ આયસ્મન્તં ઉપનન્દં સક્યપુત્તં અનેકપરિયાયેન વિગરહિત્વા ભગવતો એતમત્થં આરોચેસું…પે… ‘‘સચ્ચં કિર ત્વં, ઉપનન્દ, ભિક્ખુસ્સ સામં ચીવરં દત્વા કુપિતો અનત્તમનો અચ્છિન્દી’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ ત્વં, મોઘપુરિસ, ભિક્ખુસ્સ સામં ચીવરં દત્વા કુપિતો અનત્તમનો અચ્છિન્દિસ્સસિ! નેતં, મોઘપુરિસ, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૬૩૨. ‘‘યો પન ભિક્ખુ ભિક્ખુસ્સ સામં ચીવરં દત્વા કુપિતો અનત્તમનો અચ્છિન્દેય્ય વા અચ્છિન્દાપેય્ય વા, નિસ્સગ્ગિયં પાચિત્તિય’’ન્તિ.

૬૩૩. યો પનાતિ યો યાદિસો…પે… ભિક્ખૂતિ…પે… અયં ઇમસ્મિં અત્થે અધિપ્પેતો ભિક્ખૂતિ.

ભિક્ખુસ્સાતિ અઞ્ઞસ્સ ભિક્ખુસ્સ.

સામન્તિ સયં દત્વા.

ચીવરં નામ છન્નં ચીવરાનં અઞ્ઞતરં ચીવરં, વિકપ્પનુપગં પચ્છિમં.

કુપિતો અનત્તમનોતિ અનભિરદ્ધો આહતચિત્તો ખિલજાતો.

અચ્છિન્દેય્યાતિ સયં અચ્છિન્દતિ, નિસ્સગ્ગિયં પાચિત્તિયં [નિસ્સગ્ગિયં હોતિ (સ્યા.)].

અચ્છિન્દાપેય્યાતિ અઞ્ઞં આણાપેતિ, આપત્તિ દુક્કટસ્સ. સકિં આણત્તો બહુકમ્પિ અચ્છિન્દતિ, નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા પુગ્ગલસ્સ વા. એવઞ્ચ પન, ભિક્ખવે, નિસ્સજ્જિતબ્બં…પે… ઇદં મે, ભન્તે, ચીવરં ભિક્ખુસ્સ સામં દત્વા અચ્છિન્નં નિસ્સગ્ગિયં ઇમાહં સઙ્ઘસ્સ નિસ્સજ્જામીતિ…પે… દદેય્યાતિ …પે… દદેય્યુન્તિ…પે… આયસ્મતો દમ્મીતિ.

૬૩૪. ઉપસમ્પન્ને ઉપસમ્પન્નસઞ્ઞી ચીવરં દત્વા કુપિતો અનત્તમનો અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં. ઉપસમ્પન્ને વેમતિકો ચીવરં દત્વા કુપિતો અનત્તમનો અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં. ઉપસમ્પન્ને અનુપસમ્પન્નસઞ્ઞી ચીવરં દત્વા કુપિતો અનત્તમનો અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં.

અઞ્ઞં પરિક્ખારં દત્વા કુપિતો અનત્તમનો અચ્છિન્દતિ વા અચ્છિન્દાપેતિ વા, આપત્તિ દુક્કટસ્સ. અનુપસમ્પન્નસ્સ ચીવરં વા અઞ્ઞં વા પરિક્ખારં દત્વા કુપિતો અનત્તમનો અચ્છિન્દતિ વા અચ્છિન્દાપેતિ વા, આપત્તિ દુક્કટસ્સ. અનુપસમ્પન્ને ઉપસમ્પન્નસઞ્ઞી, આપત્તિ દુક્કટસ્સ. અનુપસમ્પન્ને વેમતિકો, આપત્તિ દુક્કટસ્સ. અનુપસમ્પન્ને અનુપસમ્પન્નસઞ્ઞી, આપત્તિ દુક્કટસ્સ.

૬૩૫. અનાપત્તિ – સો વા દેતિ, તસ્સ વા વિસ્સસન્તો ગણ્હાતિ, ઉમ્મત્તકસ્સ આદિકમ્મિકસ્સાતિ.

ચીવરઅચ્છિન્દનસિક્ખાપદં નિટ્ઠિતં પઞ્ચમં.