૧. પરિમણ્ડલવગ્ગો

ઇમે ખો પનાય્યાયો સેખિયા

ધમ્મા ઉદ્દેસં આગચ્છન્તિ.

૧૨૪૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો પુરતોપિ પચ્છતોપિ ઓલમ્બેન્તી નિવાસેન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો પુરતોપિ પચ્છતોપિ ઓલમ્બેન્તી નિવાસેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો પુરતોપિ પચ્છતોપિ ઓલમ્બેન્તી નિવાસેસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો પુરતોપિ પચ્છતોપિ ઓલમ્બેન્તી નિવાસેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો પુરતોપિ પચ્છતોપિ ઓલમ્બેન્તી નિવાસેસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘પરિમણ્ડલં નિવાસેસ્સામીતિ સિક્ખા કરણીયા’’તિ.

પરિમણ્ડલં નિવાસેતબ્બં નાભિમણ્ડલં જાણુમણ્ડલં પટિચ્છાદેન્તિયા. યા અનાદરિયં પટિચ્ચ પુરતો વા પચ્છતો વા ઓલમ્બેન્તી નિવાસેતિ, આપત્તિ દુક્કટસ્સ.

અનાપત્તિ અસઞ્ચિચ્ચ, અસ્સતિયા, અજાનન્તિયા, ગિલાનાય, આપદાસુ, ઉમ્મત્તિકાય, આદિકમ્મિકાયાતિ…પે… (સંખિત્તં).