૭. પાદુકવગ્ગો

૧૨૪૧. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કરોન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કરિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા, તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કરિસ્સન્તી’’તિ! અથ ખો ભિક્ખુનિયો ભિક્ખૂનં એતમત્થં આરોચેસું. ભિક્ખૂ [યે તે ભિક્ખૂ…પે… (?)] ભગવતો એતમત્થં આરોચેસું. અથ ખો ભગવા…પે… ભિક્ખૂ પટિપુચ્છિ – ‘‘સચ્ચં કિર, ભિક્ખવે, છબ્બગ્ગિયા ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કરોન્તી’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કરિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘ન ઉદકે ઉચ્ચારં વા પસ્સાવં વા ખેળં વા કરિસ્સામીતિ સિક્ખા કરણીયા’’તિ.

એવઞ્ચિદં ભગવતા ભિક્ખુનીનં સિક્ખાપદં પઞ્ઞત્તં હોતિ.

તેન ખો પન સમયેન ગિલાના ભિક્ખુનિયો ઉદકે ઉચ્ચારમ્પિ પસ્સાવમ્પિ ખેળમ્પિ કાતું કુક્કુચ્ચાયન્તિ. ભગવતો એતમત્થં આરોચેસું…પે… અનુજાનામિ, ભિક્ખવે, ગિલાનાય ભિક્ખુનિયા ઉદકે ઉચ્ચારમ્પિ પસ્સાવમ્પિ ખેળમ્પિ કાતું. એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘ન ઉદકે અગિલાના ઉચ્ચારં વા પસ્સાવં વા ખેળં વા કરિસ્સામીતિ સિક્ખા કરણીયા’’તિ.

ન ઉદકે અગિલાનાય ઉચ્ચારો વા પસ્સાવો વા ખેળો વા કાતબ્બો. યા અનાદરિયં પટિચ્ચ ઉદકે અગિલાના ઉચ્ચારં વા પસ્સાવં વા ખેળં વા કરોતિ, આપત્તિ દુક્કટસ્સ.

અનાપત્તિ અસઞ્ચિચ્ચ, અસ્સતિયા, અજાનન્તિયા, ગિલાનાય, થલે કતો ઉદકં ઓત્થરતિ, આપદાસુ, ઉમ્મત્તિકાય, ખિત્તચિત્તાય, વેદનાટ્ટાય, આદિકમ્મિકાયાતિ.

પન્નરસમસિક્ખાપદં નિટ્ઠિતં.

પાદુકવગ્ગો સત્તમો.

ઉદ્દિટ્ઠા ખો, અય્યાયો, સેખિયા ધમ્મા. તત્થાય્યાયો પુચ્છામિ – ‘‘કચ્ચિત્થ પરિસુદ્ધા’’? દુતિયમ્પિ પુચ્છામિ – ‘‘કચ્ચિત્થ પરિસુદ્ધા’’? તતિયમ્પિ પુચ્છામિ – ‘‘કચ્ચિત્થ પરિસુદ્ધા’’? પરિસુદ્ધેત્થાય્યાયો, તસ્મા તુણ્હી, એવમેતં ધારયામીતિ.

સેખિયકણ્ડં નિટ્ઠિતં.