૬. છટ્ઠસિક્ખાપદં

૧૧૪૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ચણ્ડકાળી ભિક્ખુની ભિક્ખુનિસઙ્ઘં ઉપસઙ્કમિત્વા વુટ્ઠાપનસમ્મુતિં યાચતિ. અથ ખો ભિક્ખુનિસઙ્ઘો ચણ્ડકાળિં ભિક્ખુનિં પરિચ્છિન્દિત્વા – ‘‘અલં તાવ તે, અય્યે, વુટ્ઠાપિતેના’’તિ, વુટ્ઠાપનસમ્મુતિં ન અદાસિ. ચણ્ડકાળી ભિક્ખુની ‘સાધૂ’તિ પટિસ્સુણિ. તેન ખો પન સમયેન ભિક્ખુનિસઙ્ઘો અઞ્ઞાસં ભિક્ખુનીનં વુટ્ઠાપનસમ્મુતિં દેતિ. ચણ્ડકાળી ભિક્ખુની ઉજ્ઝાયતિ ખિય્યતિ વિપાચેતિ – ‘‘અહમેવ નૂન બાલા, અહમેવ નૂન અલજ્જિની; યં સઙ્ઘો અઞ્ઞાસં ભિક્ખુનીનં વુટ્ઠાપનસમ્મુતિં દેતિ, મય્હમેવ ન દેતી’’તિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા ચણ્ડકાળી – ‘અલં તાવ તે, અય્યે, વુટ્ઠાપિતેના’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જિસ્સતી’’તિ…પે… સચ્ચં કિર, ભિક્ખવે, ‘ચણ્ડકાળી ભિક્ખુની અલં તાવ તે અય્યે વુટ્ઠાપિતેના’તિ વુચ્ચમાના ‘‘સાધૂ’’તિ પટિસ્સુણિત્વા પચ્છા ખીયનધમ્મં આપજ્જતીતિ [આપજ્જીતિ (ક.)]? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ચણ્ડકાળી ભિક્ખુની – ‘‘અલં તાવ તે, અય્યે, વુટ્ઠાપિતેના’’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૪૭. ‘‘યા પન ભિક્ખુની – ‘અલં તાવ તે, અય્યે, વુટ્ઠાપિતેના’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જેય્ય, પાચિત્તિય’’ન્તિ.

૧૧૪૮. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અલં તાવ તે અય્યે વુટ્ઠાપિતેનાતિ અલં તાવ તે, અય્યે, ઉપસમ્પાદિતેન. ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જતિ, આપત્તિ પાચિત્તિયસ્સ.

૧૧૪૯. અનાપત્તિ પકતિયા છન્દા દોસા મોહા ભયા કરોન્તં ખિય્યતિ, ઉમ્મત્તિકાય, આદિકમ્મિકાયાતિ.

છટ્ઠસિક્ખાપદં નિટ્ઠિતં.