૧૦. દસમસિક્ખાપદં

૧૧૬૨. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દા ભિક્ખુની માતાપિતૂહિપિ સામિકેનપિ અનનુઞ્ઞાતં સિક્ખમાનં વુટ્ઠાપેતિ. માતાપિતરોપિ સામિકોપિ ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા અમ્હેહિ અનનુઞ્ઞાતં સિક્ખમાનં વુટ્ઠાપેસ્સતી’’તિ! અસ્સોસું ખો ભિક્ખુનિયો માતાપિતૂનમ્પિ સામિકસ્સપિ ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા માતાપિતૂહિપિ સામિકેનપિ અનનુઞ્ઞાતં સિક્ખમાનં વુટ્ઠાપેસ્સતી’’તિ…પે… સચ્ચં કિર, ભિક્ખવે, થુલ્લનન્દા ભિક્ખુની, માતાપિતૂહિપિ સામિકેનપિ અનનુઞ્ઞાતં સિક્ખમાનં વુટ્ઠાપેતીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની માતાપિતૂહિપિ સામિકેનપિ અનનુઞ્ઞાતં સિક્ખમાનં વુટ્ઠાપેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૬૩. ‘‘યા પન ભિક્ખુની માતાપિતૂહિ વા સામિકેન વા અનનુઞ્ઞાતં સિક્ખમાનં વુટ્ઠાપેય્ય, પાચિત્તિય’’ન્તિ.

૧૧૬૪. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

માતાપિતરો નામ જનકા વુચ્ચન્તિ. સામિકો નામ યેન પરિગ્ગહિતા હોતિ. અનનુઞ્ઞાતાતિ અનાપુચ્છા. સિક્ખમાના નામ દ્વે વસ્સાનિ છસુ ધમ્મેસુ સિક્ખિતસિક્ખા. વુટ્ઠાપેય્યાતિ ઉપસમ્પાદેય્ય.

વુટ્ઠાપેસ્સામીતિ ગણં વા આચરિનિં વા પત્તં વા ચીવરં વા પરિયેસતિ, સીમં વા સમ્મન્નતિ, આપત્તિ દુક્કટસ્સ. ઞત્તિયા દુક્કટં. દ્વીહિ કમ્મવાચાહિ દુક્કટા. કમ્મવાચાપરિયોસાને ઉપજ્ઝાયાય આપત્તિ પાચિત્તિયસ્સ. ગણસ્સ ચ આચરિનિયા ચ આપત્તિ દુક્કટસ્સ.

૧૧૬૫. અનાપત્તિ અજાનન્તી વુટ્ઠાપેતિ, અપલોકેત્વા વુટ્ઠાપેતિ, ઉમ્મત્તિકાય, આદિકમ્મિકાયાતિ.

દસમસિક્ખાપદં નિટ્ઠિતં.