૧. પઠમસિક્ખાપદં

૧૧૧૯. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો ઊનવીસતિવસ્સં કુમારિભૂતં વુટ્ઠાપેન્તિ. તા અક્ખમા હોન્તિ સીતસ્સ ઉણ્હસ્સ જિઘચ્છાય પિપાસાય ડંસમકસવાતાતપસરીસપસમ્ફસ્સાનં દુરુત્તાનં દુરાગતાનં વચનપથાનં. ઉપ્પન્નાનં સારીરિકાનં વેદનાનં દુક્ખાનં તિબ્બાનં ખરાનં કટુકાનં અસાતાનં અમનાપાનં પાણહરાનં અનધિવાસકજાતિકા હોન્તિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ઊનવીસતિવસ્સં કુમારિભૂતં વુટ્ઠાપેસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો ઊનવીસતિવસ્સં કુમારિભૂતં વુટ્ઠાપેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો ઊનવીસતિવસ્સં કુમારિભૂતં વુટ્ઠાપેસ્સન્તિ! ઊનવીસતિવસ્સા, ભિક્ખવે, કુમારિભૂતા અક્ખમા હોતિ સીતસ્સ ઉણ્હસ્સ…પે… પાણહરાનં અનધિવાસકજાતિકા હોતિ. વીસતિવસ્સાવ ખો, ભિક્ખવે, કુમારિભૂતા ખમા હોતિ સીતસ્સ ઉણ્હસ્સ…પે… પાણહરાનં અધિવાસકજાતિકા હોતિ. નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૨૦. ‘‘યા પન ભિક્ખુની ઊનવીસતિવસ્સં કુમારિભૂતં વુટ્ઠાપેય્ય, પાચિત્તિય’’ન્તિ.

૧૧૨૧. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ઊનવીસતિવસ્સા નામ અપ્પત્તવીસતિવસ્સા. કુમારિભૂતા નામ સામણેરી વુચ્ચતિ. વુટ્ઠાપેય્યાતિ ઉપસમ્પાદેય્ય.

‘‘વુટ્ઠાપેસ્સામી’’તિ ગણં વા આચરિનિં વા પત્તં વા ચીવરં વા પરિયેસતિ, સીમં વા સમ્મન્નતિ, આપત્તિ દુક્કટસ્સ. ઞત્તિયા દુક્કટં. દ્વીહિ કમ્મવાચાહિ દુક્કટા. કમ્મવાચાપરિયોસાને ઉપજ્ઝાયાય આપત્તિ પાચિત્તિયસ્સ. ગણસ્સ ચ આચરિનિયા ચ આપત્તિ દુક્કટસ્સ.

૧૧૨૨. ઊનવીસતિવસ્સાય ઊનવીસતિવસ્સસઞ્ઞા વુટ્ઠાપેતિ, આપત્તિ પાચિત્તિયસ્સ. ઊનવીસતિવસ્સાય વેમતિકા વુટ્ઠાપેતિ, આપત્તિ દુક્કટસ્સ. ઊનવીસતિવસ્સાય પરિપુણ્ણસઞ્ઞા વુટ્ઠાપેતિ, અનાપત્તિ. પરિપુણ્ણવીસતિવસ્સાય ઊનવીસતિવસ્સસઞ્ઞા, આપત્તિ દુક્કટસ્સ. પરિપુણ્ણવીસતિવસ્સાય વેમતિકા, આપત્તિ દુક્કટસ્સ. પરિપુણ્ણવીસતિવસ્સાય પરિપુણ્ણસઞ્ઞા, અનાપત્તિ.

૧૧૨૩. અનાપત્તિ ઊનવીસતિવસ્સં પરિપુણ્ણસઞ્ઞા વુટ્ઠાપેતિ, પરિપુણ્ણવીસતિવસ્સં પરિપુણ્ણસઞ્ઞા વુટ્ઠાપેતિ, ઉમ્મત્તિકાય, આદિકમ્મિકાયાતિ.

પઠમસિક્ખાપદં નિટ્ઠિતં.