૨. દુતિયસિક્ખાપદં

૯૩૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો દ્વે એકત્થરણપાવુરણા તુવટ્ટેન્તિ. મનુસ્સા વિહારચારિકં આહિણ્ડન્તા પસ્સિત્વા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો દ્વે એકત્થરણપાવુરણા તુવટ્ટેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો દ્વે એકત્થરણપાવુરણા તુવટ્ટેસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો દ્વે એકત્થરણપાવુરણા તુવટ્ટેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો દ્વે એકત્થરણપાવુરણા તુવટ્ટેસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૯૩૭. ‘‘યા પન ભિક્ખુનિયો દ્વે એકત્થરણપાવુરણા તુવટ્ટેય્યું, પાચિત્તિય’’ન્તિ.

૯૩૮. યા પનાતિ યા યાદિસા…પે… ભિક્ખુનિયોતિ ઉપસમ્પન્નાયો વુચ્ચન્તિ.

દ્વે એકત્થરણપાવુરણા તુવટ્ટેય્યુન્તિ તઞ્ઞેવ અત્થરિત્વા તઞ્ઞેવ પારુપન્તિ, આપત્તિ પાચિત્તિયસ્સ.

૯૩૯. એકત્થરણપાવુરણે એકત્થરણપાવુરણસઞ્ઞા તુવટ્ટેન્તિ, આપત્તિ પાચિત્તિયસ્સ. એકત્થરણપાવુરણે વેમતિકા તુવટ્ટેન્તિ, આપત્તિ પાચિત્તિયસ્સ. એકત્થરણપાવુરણે નાનત્થરણપાવુરણસઞ્ઞા તુવટ્ટેન્તિ, આપત્તિ પાચિત્તિયસ્સ.

એકત્થરણે નાનાપાવુરણે [નાનાપાવુરણસઞ્ઞા (ક.)], આપત્તિ દુક્કટસ્સ. નાનત્થરણે એકપાવુરણે [એકપાવુરણસઞ્ઞા (ક.)], આપત્તિ દુક્કટસ્સ. નાનત્થરણપાવુરણે એકત્થરણપાવુરણસઞ્ઞા, આપત્તિ દુક્કટસ્સ. નાનત્થરણપાવુરણે વેમતિકા, આપત્તિ દુક્કટસ્સ. નાનત્થરણપાવુરણે નાનત્થરણપાવુરણસઞ્ઞા, અનાપત્તિ.

૯૪૦. અનાપત્તિ વવત્થાનં દસ્સેત્વા નિપજ્જન્તિ, ઉમ્મત્તિકાનં, આદિકમ્મિકાનન્તિ.

દુતિયસિક્ખાપદં નિટ્ઠિતં.