૯. નવમસિક્ખાપદં

૮૭૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો અત્તનો ભણ્ડકં અપસ્સન્તિયો ચણ્ડકાળિં ભિક્ખુનિં એતદવોચું – ‘‘અપાય્યે, અમ્હાકં, ભણ્ડકં પસ્સેય્યાસી’’તિ? ચણ્ડકાળી ભિક્ખુની ઉજ્ઝાયતિ ખિય્યતિ વિપાચેતિ – ‘‘અહમેવ નૂન ચોરી, અહમેવ નૂન અલજ્જિની, યા અય્યાયો અત્તનો ભણ્ડકં અપસ્સન્તિયો તા મં એવમાહંસુ – ‘અપાય્યે, અમ્હાકં ભણ્ડકં પસ્સેય્યાસી’તિ? સચાહં, અય્યે, તુમ્હાકં ભણ્ડકં ગણ્હામિ, અસ્સમણી હોમિ, બ્રહ્મચરિયા ચવામિ, નિરયં ઉપપજ્જામિ; યા પન મં અભૂતેન એવમાહ સાપિ અસ્સમણી હોતુ, બ્રહ્મચરિયા ચવતુ, નિરયં ઉપપજ્જતૂ’’તિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા ચણ્ડકાળી અત્તાનમ્પિ પરમ્પિ નિરયેનપિ બ્રહ્મચરિયેનપિ અભિસપિસ્સતી’’તિ…પે… સચ્ચં કિર, ભિક્ખવે, ચણ્ડકાળી ભિક્ખુની અત્તાનમ્પિ પરમ્પિ નિરયેનપિ બ્રહ્મચરિયેનપિ અભિસપતીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ચણ્ડકાળી ભિક્ખુની અત્તાનમ્પિ પરમ્પિ નિરયેનપિ બ્રહ્મચરિયેનપિ અભિસપિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૮૭૫. ‘‘યા પન ભિક્ખુની અત્તાનં વા પરં વા નિરયેન વા બ્રહ્મચરિયેન વા અભિસપેય્ય, પાચિત્તિય્ય’’ન્તિ.

૮૭૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અત્તાનન્તિ પચ્ચત્તં. પરન્તિ ઉપસમ્પન્નં. નિરયેન વા બ્રહ્મચરિયેન વા અભિસપતિ, આપત્તિ પાચિત્તિયસ્સ.

૮૭૭. ઉપસમ્પન્નાય ઉપસમ્પન્નસઞ્ઞા નિરયેન વા બ્રહ્મચરિયેન વા અભિસપતિ, આપત્તિ પાચિત્તિયસ્સ. ઉપસમ્પન્નાય વેમતિકા નિરયેન વા બ્રહ્મચરિયેન વા અભિસપતિ, આપત્તિ પાચિત્તિયસ્સ. ઉપસમ્પન્નાય અનુપસમ્પન્નસઞ્ઞા નિરયેન વા બ્રહ્મચરિયેન વા અભિસપતિ, આપત્તિ પાચિત્તિયસ્સ.

તિરચ્છાનયોનિયા વા પેત્તિવિસયેન વા મનુસ્સદોભગ્ગેન વા અભિસપતિ, આપત્તિ દુક્કટસ્સ. અનુપસમ્પન્નં અભિસપતિ, આપત્તિ દુક્કટસ્સ. અનુપસમ્પન્નાય ઉપસમ્પન્નસઞ્ઞા, આપત્તિ દુક્કટસ્સ. અનુપસમ્પન્નાય વેમતિકા, આપત્તિ દુક્કટસ્સ. અનુપસમ્પન્નાય અનુપસમ્પન્નસઞ્ઞા, આપત્તિ દુક્કટસ્સ.

૮૭૮. અનાપત્તિ અત્થપુરેક્ખારાય, ધમ્મપુરેક્ખારાય, અનુસાસનિપુરેક્ખારાય, ઉમ્મત્તિકાય, આદિકમ્મિકાયાતિ.

નવમસિક્ખાપદં નિટ્ઠિતં.