૭. સત્તમસિક્ખાપદં

૮૬૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન સમ્બહુલા ભિક્ખુનિયો કોસલેસુ જનપદે સાવત્થિં ગચ્છન્તિયો સાયં અઞ્ઞતરં ગામં ઉપગન્ત્વા અઞ્ઞતરં બ્રાહ્મણકુલં ઉપસઙ્કમિત્વા ઓકાસં યાચિંસુ. અથ ખો સા બ્રાહ્મણી તા ભિક્ખુનિયો એતદવોચ – ‘‘આગમેથ, અય્યે, યાવ બ્રાહ્મણો આગચ્છતી’’તિ. ભિક્ખુનિયો – ‘‘યાવ બ્રાહ્મણો આગચ્છતી’’તિ સેય્યં સન્થરિત્વા એકચ્ચા નિસીદિંસુ એકચ્ચા નિપજ્જિંસુ. અથ ખો સો બ્રાહ્મણો રત્તિં આગન્ત્વા તં બ્રાહ્મણિં એતદવોચ – ‘‘કા ઇમા’’તિ? ‘‘ભિક્ખુનિયો, અય્યા’’તિ. ‘‘નિક્કડ્ઢથ ઇમા મુણ્ડા બન્ધકિનિયો’’તિ, ઘરતો નિક્કડ્ઢાપેસિ. અથ ખો તા ભિક્ખુનિયો સાવત્થિં ગન્ત્વા ભિક્ખુનીનં એતમત્થં આરોચેસું. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો વિકાલે કુલાનિ ઉપસઙ્કમિત્વા સામિકે અનાપુચ્છા સેય્યં સન્થરિત્વા અભિનિસીદિસ્સન્તિપિ અભિનિપજ્જિસ્સન્તિપી’’તિ…પે… સચ્ચં કિર, ભિક્ખવે, ભિક્ખુનિયો વિકાલે કુલાનિ ઉપસઙ્કમિત્વા સામિકે અનાપુચ્છા સેય્યં સન્થરિત્વા અભિનિસીદન્તિપિ અભિનિપજ્જન્તિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો વિકાલે કુલાનિ ઉપસઙ્કમિત્વા સામિકે અનાપુચ્છા સેય્યં સન્થરિત્વા અભિનિસીદિસ્સન્તિપિ અભિનિપજ્જિસ્સન્તિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૮૬૫. ‘‘યા પન ભિક્ખુની વિકાલે કુલાનિ ઉપસઙ્કમિત્વા સામિકે અનાપુચ્છા સેય્યં સન્થરિત્વા વા સન્થરાપેત્વા વા અભિનિસીદેય્ય વા અભિનિપજ્જેય્ય વા, પાચિત્તિય’’ન્તિ.

૮૬૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

વિકાલો નામ અત્થઙ્ગતે સૂરિયે યાવ અરુણુગ્ગમના.

કુલં નામ ચત્તારિ કુલાનિ – ખત્તિયકુલં, બ્રાહ્મણકુલં, વેસ્સકુલં સુદ્દકુલં. ઉપસઙ્કમિત્વાતિ તત્થ ગન્ત્વા.

સામિકે અનાપુચ્છાતિ યો તસ્મિં કુલે મનુસ્સો સામિકો દાતું, તં અનાપુચ્છા.

સેય્યં નામ અન્તમસો પણ્ણસન્થારોપિ. સન્થરિત્વાતિ સયં સન્થરિત્વા. સન્થરાપેત્વાતિ અઞ્ઞં સન્થરાપેત્વા. અભિનિસીદેય્યાતિ તસ્મિં અભિનિસીદતિ, આપત્તિ પાચિત્તિયસ્સ. અભિનિપજ્જેય્યાતિ તસ્મિં અભિનિપજ્જતિ, આપત્તિ પાચિત્તિયસ્સ.

૮૬૭. અનાપુચ્છિતે અનાપુચ્છિતસઞ્ઞા સેય્યં સન્થરિત્વા વા સન્થરાપેત્વા વા અભિનિસીદતિ વા અભિનિપજ્જતિ વા, આપત્તિ પાચિત્તિયસ્સ. અનાપુચ્છિતે વેમતિકા સેય્યં સન્થરિત્વા વા સન્થરાપેત્વા વા અભિનિસીદતિ વા અભિનિપજ્જતિ વા, આપત્તિ પાચિત્તિયસ્સ. અનાપુચ્છિતે આપુચ્છિતસઞ્ઞા સેય્યં સન્થરિત્વા વા સન્થરાપેત્વા વા અભિનિસીદતિ વા અભિનિપજ્જતિ વા, આપત્તિ પાચિત્તિયસ્સ.

આપુચ્છિતે અનાપુચ્છિતસઞ્ઞા, આપત્તિ દુક્કટસ્સ. આપુચ્છિતે વેમતિકા, આપત્તિ દુક્કટસ્સ. આપુચ્છિતે આપુચ્છિતસઞ્ઞા, અનાપત્તિ.

૮૬૮. અનાપત્તિ આપુચ્છા સેય્યં સન્થરિત્વા વા સન્થરાપેત્વા વા અભિનિસીદતિ વા અભિનિપજ્જતિ વા, ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

સત્તમસિક્ખાપદં નિટ્ઠિતં.