૪. ચતુત્થસિક્ખાપદં

૮૫૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દા ભિક્ખુની રથિકાયપિ બ્યૂહેપિ સિઙ્ઘાટકેપિ પુરિસેન સદ્ધિં એકેનેકા સન્તિટ્ઠતિપિ સલ્લપતિપિ નિકણ્ણિકમ્પિ જપ્પેતિ દુતિયિકમ્પિ ભિક્ખુનિં ઉય્યોજેતિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા રથિકાયપિ બ્યૂહેપિ સિઙ્ઘાટકેપિ પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપિ નિકણ્ણિકમ્પિ જપ્પિસ્સતિ દુતિયિકમ્પિ ભિક્ખુનિં ઉય્યોજેસ્સતી’’તિ…પે… સચ્ચં કિર, ભિક્ખવે, થુલ્લનન્દા ભિક્ખુની રથિકાયપિ બ્યૂહેપિ સિઙ્ઘાટકેપિ પુરિસેન સદ્ધિં એકેનેકા સન્તિટ્ઠતિપિ સલ્લપતિપિ નિકણ્ણિકમ્પિ જપ્પેતિ દુતિયિકમ્પિ ભિક્ખુનિં ઉય્યોજેતીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની રથિકાયપિ બ્યૂહેપિ સિઙ્ઘાટકેપિ પુરિસેન સદ્ધિં એકેનેકા સન્તિટ્ઠિસ્સતિપિ સલ્લપિસ્સતિપિ નિકણ્ણિકમ્પિ જપ્પિસ્સતિ દુતિયિકમ્પિ ભિક્ખુનિં ઉય્યોજેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૮૫૧. ‘‘યા પન ભિક્ખુની રથિકાય વા બ્યૂહે વા સિઙ્ઘાટકે વા પુરિસેન સદ્ધિં એકેનેકા સન્તિટ્ઠેય્ય વા સલ્લપેય્ય વા નિકણ્ણિકં વા જપ્પેય્ય દુતિયિકં વા ભિક્ખુનિં ઉય્યોજેય્ય, પાચિત્તિય’’ન્તિ.

૮૫૨. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

રથિકા નામ રચ્છા વુચ્ચતિ. બ્યૂહં નામ યેનેવ પવિસન્તિ તેનેવ નિક્ખમન્તિ. સિઙ્ઘાટકો નામ ચચ્ચરં વુચ્ચતિ.

પુરિસો નામ મનુસ્સપુરિસો ન યક્ખો ન પેતો ન તિરચ્છાનગતો વિઞ્ઞૂ પટિબલો સન્તિટ્ઠિતું સલ્લપિતું.

સદ્ધિન્તિ એકતો. એકેનેકાતિ પુરિસો ચેવ હોતિ ભિક્ખુની ચ.

સન્તિટ્ઠેય્ય વાતિ પુરિસસ્સ હત્થપાસે તિટ્ઠતિ, આપત્તિ પાચિત્તિયસ્સ.

સલ્લપેય્ય વાતિ પુરિસસ્સ હત્થપાસે ઠિતા સલ્લપતિ, આપત્તિ પાચિત્તિયસ્સ.

નિકણ્ણિકં વા જપ્પેય્યાતિ પુરિસસ્સ ઉપકણ્ણકે આરોચેતિ, આપત્તિ પાચિત્તિયસ્સ.

દુતિયિકં વા ભિક્ખુનિં ઉય્યોજેય્યાતિ અનાચારં આચરિતુકામા દુતિયિકમ્પિ ભિક્ખુનિં ઉય્યોજેતિ, આપત્તિ દુક્કટસ્સ. દસ્સનૂપચારં વા સવનૂપચારં વા વિજહન્તિયા આપત્તિ દુક્કટસ્સ. વિજહિતે આપત્તિ પાચિત્તિયસ્સ.

હત્થપાસં વિજહિત્વા સન્તિટ્ઠતિ વા સલ્લપતિ વા આપત્તિ દુક્કટસ્સ. યક્ખેન વા પેતેન વા પણ્ડકેન વા તિરચ્છાનગતમનુસ્સવિગ્ગહેન વા સદ્ધિં સન્તિટ્ઠતિ વા સલ્લપતિ વા, આપત્તિ દુક્કટસ્સ.

૮૫૩. અનાપત્તિ યો કોચિ વિઞ્ઞૂ દુતિયો હોતિ, અરહોપેક્ખા, અઞ્ઞવિહિતા સન્તિટ્ઠતિ વા સલ્લપતિ વા, ન અનાચારં આચરિતુકામા, સતિ કરણીયે દુતિયિકં ભિક્ખુનિં ઉય્યોજેતિ, ઉમ્મત્તિકાય, આદિકમ્મિકાયાતિ.

ચતુત્થસિક્ખાપદં નિટ્ઠિતં.