૨. દુતિયસિક્ખાપદં

૭૩૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન સમ્બહુલા ભિક્ખુનિયો ગામકાવાસે વસ્સંવુટ્ઠા [વસ્સંવુત્થા (સી. સ્યા.)] સાવત્થિં અગમંસુ વત્તસમ્પન્ના ઇરિયાપથસમ્પન્ના દુચ્ચોળા લૂખચીવરા. ઉપાસકા તા ભિક્ખુનિયો પસ્સિત્વા – ‘‘ઇમા ભિક્ખુનિયો વત્તસમ્પન્ના ઇરિયાપથસમ્પન્ના દુચ્ચોળા લૂખચીવરા, ઇમા ભિક્ખુનિયો અચ્છિન્ના ભવિસ્સન્તી’’તિ ભિક્ખુનિસઙ્ઘસ્સ અકાલચીવરં અદંસુ. થુલ્લનન્દા ભિક્ખુની – ‘‘અમ્હાકં કથિનં અત્થતં કાલચીવર’’ન્તિ અધિટ્ઠહિત્વા ભાજાપેસિ. ઉપાસકા તા ભિક્ખુનિયો પસ્સિત્વા એતદવોચું – ‘‘અપય્યાહિ ચીવરં લદ્ધ’’ન્તિ? ‘‘ન મયં, આવુસો, ચીવરં લભામ. અય્યા થુલ્લનન્દા – ‘અમ્હાકં કથિનં અત્થતં કાલચીવર’ન્તિ અધિટ્ઠહિત્વા ભાજાપેસી’’તિ. ઉપાસકા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા અકાલચીવરં ‘કાલચીવર’ન્તિ અધિટ્ઠહિત્વા ભાજાપેસ્સતી’’તિ! અસ્સોસું ખો ભિક્ખુનિયો તેસં ઉપાસકાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા અકાલચીવરં ‘કાલચીવર’ન્તિ અધિટ્ઠહિત્વા ભાજાપેસ્સતી’’તિ! અથ ખો તા ભિક્ખુનિયો ભિક્ખૂનં એતમત્થં આરોચેસું. ભિક્ખૂ ભગવતો એતમત્થં આરોચેસું …પે… સચ્ચં કિર, ભિક્ખવે, થુલ્લનન્દા ભિક્ખુની અકાલચીવરં ‘‘કાલચીવર’’ન્તિ અધિટ્ઠહિત્વા ભાજાપેતીતિ [ભાજાપેસીતિ (ક.)]? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની અકાલચીવરં ‘‘કાલચીવર’’ન્તિ અધિટ્ઠહિત્વા ભાજાપેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૭૩૯. ‘‘યા પન ભિક્ખુની અકાલચીવરં ‘કાલચીવર’ન્તિ અધિટ્ઠહિત્વા ભાજાપેય્ય, નિસ્સગ્ગિયં પાચિત્તિય’’ન્તિ.

૭૪૦. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અકાલચીવરં નામ અનત્થતે કથિને એકાદસમાસે ઉપ્પન્નં, અત્થતે કથિને સત્તમાસે ઉપ્પન્નં, કાલેપિ આદિસ્સ દિન્નં, એતં અકાલચીવરં નામ.

અકાલચીવરં ‘‘કાલચીવર’’ન્તિ અધિટ્ઠહિત્વા ભાજાપેતિ, પયોગે દુક્કટં. પટિલાભેન નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા એકભિક્ખુનિયા વા. એવઞ્ચ પન, ભિક્ખવે, નિસ્સજ્જિતબ્બં…પે… ઇદં મે, અય્યે, અકાલચીવરં ‘‘કાલચીવર’ન્તિ અધિટ્ઠહિત્વા ભાજાપિતં નિસ્સગ્ગિયં, ઇમાહં સઙ્ઘસ્સ નિસ્સજ્જામી’’તિ…પે… દદેય્યાતિ…પે… દદેય્યુન્તિ…પે… અય્યાય દમ્મીતિ.

૭૪૧. અકાલચીવરે અકાલચીવરસઞ્ઞા ‘‘કાલચીવર’’ન્તિ અધિટ્ઠહિત્વા ભાજાપેતિ, નિસ્સગ્ગિયં પાચિત્તિયં. અકાલચીવરે વેમતિકા ‘‘કાલચીવર’’ન્તિ અધિટ્ઠહિત્વા ભાજાપેતિ, આપત્તિ દુક્કટસ્સ. અકાલચીવરે કાલચીવરસઞ્ઞા ‘‘કાલચીવર’’ન્તિ અધિટ્ઠહિત્વા ભાજાપેતિ, અનાપત્તિ. કાલચીવરે અકાલચીવરસઞ્ઞા, આપત્તિ દુક્કટસ્સ. કાલચીવરે વેમતિકા, આપત્તિ દુક્કટસ્સ. કાલચીવરે કાલચીવરસઞ્ઞા, અનાપત્તિ.

૭૪૨. અનાપત્તિ અકાલચીવરં કાલચીવરસઞ્ઞા ભાજાપેતિ, કાલચીવરં કાલચીવરસઞ્ઞા ભાજાપેતિ, ઉમ્મત્તિકાય, આદિકમ્મિકાયાતિ.

દુતિયસિક્ખાપદં નિટ્ઠિતં.