૩. તતિયસિક્ખાપદં

૭૪૩. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન થુલ્લનન્દા ભિક્ખુની અઞ્ઞતરાય ભિક્ખુનિયા સદ્ધિં ચીવરં પરિવત્તેત્વા પરિભુઞ્જિ. અથ ખો સા ભિક્ખુની તં ચીવરં સઙ્ઘરિત્વા [સંહરિત્વા (ક.)] નિક્ખિપિ. થુલ્લનન્દા ભિક્ખુની તં ભિક્ખુનિં એતદવોચ – ‘‘યં તે, અય્યે, મયા સદ્ધિં ચીવરં પરિવત્તિતં, કહં તં ચીવર’’ન્તિ? અથ ખો સા ભિક્ખુની તં ચીવરં નીહરિત્વા થુલ્લનન્દાય ભિક્ખુનિયા દસ્સેસિ. થુલ્લનન્દા ભિક્ખુની તં ભિક્ખુનિં એતદવોચ – ‘‘હન્દાય્યે, તુય્હં ચીવરં, આહર મે’તં ચીવરં, યં તુય્હં તુય્હમેવેતં, યં મય્હં મય્હમેવેતં, આહર મે’તં, સકં પચ્ચાહરા’’તિ અચ્છિન્દિ. અથ ખો સા ભિક્ખુની ભિક્ખુનીનં એતમત્થં આરોચેસિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા થુલ્લનન્દા ભિક્ખુનિયા સદ્ધિં ચીવરં પરિવત્તેત્વા અચ્છિન્દિસ્સતી’’તિ! અથ ખો તા ભિક્ખુનિયો ભિક્ખૂનં એતમત્થં આરોચેસું. ભિક્ખૂ ભગવતો એતમત્થં આરાચેસું…પે… સચ્ચં કિર, ભિક્ખવે, થુલ્લનન્દા ભિક્ખુની ભિક્ખુનિયા સદ્ધિં ચીવરં પરિવત્તેત્વા અચ્છિન્દતીતિ [અચ્છિન્દીતિ (ક.)]? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, થુલ્લનન્દા ભિક્ખુની ભિક્ખુનિયા સદ્ધિં ચીવરં પરિવત્તેત્વા અચ્છિન્દિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૭૪૪. ‘‘યા પન ભિક્ખુની ભિક્ખુનિયા સદ્ધિં ચીવરં પરિવત્તેત્વા સા પચ્છા એવં વદેય્ય – ‘હન્દાય્યે, તુય્હં ચીવરં આહર, મેતં ચીવરં, યં તુય્હં તુય્હમેવેતં, યં મય્હં મય્હમેવેતં, આહર મેતં, સકં પચ્ચાહરા’તિ અચ્છિન્દેય્ય વા અચ્છિન્દાપેય્ય વા, નિસ્સગ્ગિયં પાચિત્તિય’’ન્તિ.

૭૪૫. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ભિક્ખુનિયા સદ્ધિન્તિ અઞ્ઞાય ભિક્ખુનિયા સદ્ધિં.

ચીવરં નામ છન્નં ચીવરાનં અઞ્ઞતરં ચીવરં વિકપ્પનુપગં પચ્છિમં.

પરિવત્તેત્વાતિ પરિત્તેન વા વિપુલં, વિપુલેન વા પરિત્તં.

અચ્છિન્દેય્યાતિ સયં અચ્છિન્દતિ નિસ્સગ્ગિયં પાચિત્તિયં.

અચ્છિન્દાપેય્યાતિ અઞ્ઞં આણાપેતિ, આપત્તિ દુક્કટસ્સ. સકિં આણત્તા બહુકમ્પિ અચ્છિન્દતિ, નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા એકભિક્ખુનિયા વા. એવઞ્ચ પન, ભિક્ખવે, નિસ્સજ્જિતબ્બં…પે… ‘‘ઇદં મે અય્યે ચીવરં ભિક્ખુનિયા સદ્ધિં પરિવત્તેત્વા અચ્છિન્નં નિસ્સગ્ગિયં, ઇમાહં સઙ્ઘસ્સ નિસ્સજ્જામી’’તિ…પે… દદેય્યાતિ…પે… દદેય્યુન્તિ…પે… અય્યાય દમ્મીતિ.

૭૪૬. ઉપસમ્પન્નાય ઉપસમ્પન્નસઞ્ઞા ચીવરં પરિવત્તેત્વા અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં. ઉપસમ્પન્નાય વેમતિકા ચીવરં પરિવત્તેત્વા અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં. ઉપસમ્પન્નાય અનુપસમ્પન્નસઞ્ઞા ચીવરં પરિવત્તેત્વા અચ્છિન્દતિ વા અચ્છિન્દાપેતિ વા, નિસ્સગ્ગિયં પાચિત્તિયં.

અઞ્ઞં પરિક્ખારં પરિવત્તેત્વા અચ્છિન્દતિ વા અચ્છિન્દાપેતિ વા, આપત્તિ દુક્કટસ્સ. અનુપસમ્પન્નાય સદ્ધિં ચીવરં વા અઞ્ઞં વા પરિક્ખારં પરિવત્તેત્વા અચ્છિન્દતિ વા અચ્છિન્દાપેતિ વા, આપત્તિ દુક્કટસ્સ. અનુપસમ્પન્નાય ઉપસમ્પન્નસઞ્ઞા, આપત્તિ દુક્કટસ્સ. અનુપસમ્પન્નાય વેમતિકા, આપત્તિ દુક્કટસ્સ. અનુપસમ્પન્નાય અનુપસમ્પન્નસઞ્ઞા, આપત્તિ દુક્કટસ્સ.

૭૪૭. અનાપત્તિ સા વા દેતિ, તસ્સા વા વિસ્સસન્તી ગણ્હાતિ, ઉમ્મત્તિકાય, આદિકમ્મિકાયાતિ.

તતિયસિક્ખાપદં નિટ્ઠિતં.