૭. નહાનસિક્ખાપદં

૩૫૭. તેન સમયેન બુદ્ધો ભગવા રાજગહે વિહરતિ વેળુવને કલન્દકનિવાપે. તેન ખો પન સમયેન ભિક્ખૂ તપોદે નહાયન્તિ. તેન ખો પન સમયેન [અથ ખો (સી. સ્યા.)] રાજા માગધો સેનિયો બિમ્બિસારો ‘‘સીસં નહાયિસ્સામી’’તિ તપોદં ગન્ત્વા – ‘‘યાવાય્યા નહાયન્તી’’તિ એકમન્તં પટિમાનેસિ. ભિક્ખૂ યાવ સમન્ધકારા નહાયિંસુ. અથ ખો રાજા માગધો સેનિયો બિમ્બિસારો વિકાલે સીસં નહાયિત્વા, નગરદ્વારે થકિતે બહિનગરે વસિત્વા, કાલસ્સેવ અસમ્ભિન્નેન વિલેપનેન યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો રાજાનં માગધં સેનિયં બિમ્બિસારં ભગવા એતદવોચ – ‘‘કિસ્સ ત્વં, મહારાજ, કાલસ્સેવ આગતો અસમ્ભિન્નેન વિલેપનેના’’તિ? અથ ખો રાજા માગધો સેનિયો બિમ્બિસારો ભગવતો એતમત્થં આરોચેસિ. અથ ખો ભગવા રાજાનં માગધં સેનિયં બિમ્બિસારં ધમ્મિયા કથાય સન્દસ્સેસિ સમાદપેસિ સમુત્તેજેસિ સમ્પહંસેસિ. અથ ખો રાજા માગધો સેનિયો બિમ્બિસારો ભગવતા ધમ્મિયા કથાય સન્દસ્સિતો સમાદપિતો સમુત્તેજિતો સમ્પહંસિતો ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કામિ. અથ ખો ભગવા એતસ્મિં નિદાને એતસ્મિં પકરણે ભિક્ખુસઙ્ઘં સન્નિપાતાપેત્વા ભિક્ખૂ પટિપુચ્છિ – ‘‘સચ્ચં કિર, ભિક્ખવે, ભિક્ખૂ રાજાનમ્પિ પસ્સિત્વા ન મત્તં જાનિત્વા નહાયન્તી’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ તે, ભિક્ખવે, મોઘપુરિસા રાજાનમ્પિ પસ્સિત્વા ન મત્તં જાનિત્વા નહાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

‘‘યો પન ભિક્ખુ ઓરેનદ્ધમાસં નહાયેય્ય, પાચિત્તિય’’ન્તિ.