૯. દુટ્ઠુલ્લારોચનસિક્ખાપદં

૭૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન આયસ્મા ઉપનન્દો સક્યપુત્તો છબ્બગ્ગિયેહિ ભિક્ખૂહિ સદ્ધિં ભણ્ડનકતો હોતિ. સો સઞ્ચેતનિકં સુક્કવિસ્સટ્ઠિં આપત્તિં આપજ્જિત્વા સઙ્ઘં તસ્સા આપત્તિયા પરિવાસં યાચિ. તસ્સ સઙ્ઘો તસ્સા આપત્તિયા પરિવાસં અદાસિ. તેન ખો પન સમયેન સાવત્થિયં અઞ્ઞતરસ્સ પૂગસ્સ સઙ્ઘભત્તં હોતિ. સો પરિવસન્તો ભત્તગ્ગે આસનપરિયન્તે નિસીદિ. છબ્બગ્ગિયા ભિક્ખૂ તે ઉપાસકે એતદવોચું – ‘‘એસો, આવુસો, આયસ્મા ઉપનન્દો સક્યપુત્તો તુમ્હાકં સમ્ભાવિતો કુલૂપકો; યેનેવ હત્થેન સદ્ધાદેય્યં ભુઞ્જતિ તેનેવ હત્થેન ઉપક્કમિત્વા અસુચિં મોચેસિ. સો સઞ્ચેતનિકં સુક્કવિસ્સટ્ઠિં આપત્તિં આપજ્જિત્વા સઙ્ઘં તસ્સા આપત્તિયા પરિવાસં યાચિ. તસ્સ સઙ્ઘો તસ્સા આપત્તિયા પરિવાસં અદાસિ. સો પરિવસન્તો આસનપરિયન્તે નિસિન્નો’’તિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ ભિક્ખુસ્સ દુટ્ઠુલ્લં આપત્તિં અનુપસમ્પન્નસ્સ આરોચેસ્સન્તી’’તિ…પે… ‘‘સચ્ચં કિર તુમ્હે, ભિક્ખવે, ભિક્ખુસ્સ દુટ્ઠુલ્લં આપત્તિં અનુપસમ્પન્નસ્સ આરોચેથા’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ તુમ્હે, મોઘપુરિસા, ભિક્ખુસ્સ દુટ્ઠુલ્લં આપત્તિં અનુપસમ્પન્નસ્સ આરોચેસ્સથ! નેતં, મોઘપુરિસા, અપ્પસન્નાનં વા પસાદાય…પે… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –

૭૯. ‘‘યો પન ભિક્ખુ ભિક્ખુસ્સ દુટ્ઠુલ્લં આપત્તિં અનુપસમ્પન્નસ્સ આરોચેય્ય, અઞ્ઞત્ર ભિક્ખુસમ્મુતિયા [ભિક્ખુસમ્મતિયા (સ્યા.)], પાચિત્તિય’’ન્તિ.

૮૦. યો પનાતિ યો યાદિસો…પે… ભિક્ખૂતિ…પે… અયં ઇમસ્મિં અત્થે અધિપ્પેતો ભિક્ખૂતિ.

ભિક્ખુસ્સાતિ અઞ્ઞસ્સ ભિક્ખુસ્સ.

દુટ્ઠુલ્લા નામ આપત્તિ – ચત્તારિ ચ પારાજિકાનિ, તેરસ ચ સઙ્ઘાદિસેસા.

અનુપસમ્પન્નો નામ ભિક્ખુઞ્ચ ભિક્ખુનિઞ્ચ ઠપેત્વા અવસેસો અનુપસમ્પન્નો નામ.

આરોચેય્યાતિ આરોચેય્ય ઇત્થિયા વા પુરિસસ્સ વા ગહટ્ઠસ્સ વા પબ્બજિતસ્સ વા.

અઞ્ઞત્ર ભિક્ખુસમ્મુતિયાતિ ઠપેત્વા ભિક્ખુસમ્મુતિં.

અત્થિ ભિક્ખુસમ્મુતિ આપત્તિપરિયન્તા, ન કુલપરિયન્તા. અત્થિ ભિક્ખુસમ્મુતિ કુલપરિયન્તા, ન આપત્તિપરિયન્તા, અત્થિ ભિક્ખુસમ્મુતિ આપત્તિપરિયન્તા ચ કુલપરિયન્તા ચ, અત્થિ ભિક્ખુસમ્મુતિ નેવ આપત્તિપરિયન્તા ન કુલપરિયન્તા.

આપત્તિપરિયન્તા નામ આપત્તિયો પરિગ્ગહિતાયો હોન્તિ – ‘‘એત્તકાહિ આપત્તીહિ આરોચેતબ્બો’’તિ.

કુલપરિયન્તા નામ કુલાનિ પરિગ્ગહિતાનિ હોન્તિ – ‘‘એત્તકેસુ કુલેસુ આરોચેતબ્બો’’તિ. આપત્તિપરિયન્તા ચ કુલપરિયન્તા ચ નામ આપત્તિયો ચ પરિગ્ગહિતાયો હોન્તિ, કુલાનિ ચ પરિગ્ગહિતાનિ હોન્તિ – ‘‘એત્તકાહિ આપત્તીહિ એત્તકેસુ કુલેસુ આરોચેતબ્બો’’તિ. નેવ આપત્તિપરિયન્તા ન કુલપરિયન્તા નામ આપત્તિયો ચ અપરિગ્ગહિતાયો હોન્તિ, કુલાનિ ચ અપરિગ્ગહિતાનિ હોન્તિ – ‘‘એત્તકાહિ આપત્તીહિ એત્તકેસુ કુલેસુ આરોચેતબ્બો’’તિ.

૮૧. આપત્તિપરિયન્તે યા આપત્તિયો પરિગ્ગહિતાયો હોન્તિ, તા આપત્તિયો ઠપેત્વા અઞ્ઞાહિ આપત્તીહિ આરોચેતિ, આપત્તિ પાચિત્તિયસ્સ.

કુલપરિયન્તે યાનિ કુલાનિ પરિગ્ગહિતાનિ હોન્તિ, તાનિ કુલાનિ ઠપેત્વા અઞ્ઞેસુ કુલેસુ આરોચેતિ, આપત્તિ પાચિત્તિયસ્સ.

આપત્તિપરિયન્તે ચ કુલપરિયન્તે ચ યા આપત્તિયો પરિગ્ગહિતાયો હોન્તિ, તા આપત્તિયો ઠપેત્વા યાનિ કુલાનિ પરિગ્ગહિતાનિ હોન્તિ, તાનિ કુલાનિ ઠપેત્વા અઞ્ઞાહિ આપત્તીહિ અઞ્ઞેસુ કુલેસુ આરોચેતિ, આપત્તિ પાચિત્તિયસ્સ.

નેવ આપત્તિપરિયન્તે ન કુલપરિયન્તે, અનાપત્તિ.

૮૨. દુટ્ઠુલ્લાય આપત્તિયા દુટ્ઠુલ્લાપત્તિસઞ્ઞી અનુપસમ્પન્નસ્સ આરોચેતિ, અઞ્ઞત્ર ભિક્ખુસમ્મુતિયા, આપત્તિ પાચિત્તિયસ્સ.

દુટ્ઠુલ્લાય આપત્તિયા વેમતિકો અનુપસમ્પન્નસ્સ આરોચેતિ, અઞ્ઞત્ર ભિક્ખુસમ્મુતિયા, આપત્તિ પાચિત્તિયસ્સ.

દુટ્ઠુલ્લાય આપત્તિયા અદુટ્ઠુલ્લાપત્તિસઞ્ઞી અનુપસમ્પન્નસ્સ આરોચેતિ, અઞ્ઞત્ર ભિક્ખુસમ્મુતિયા, આપત્તિ પાચિત્તિયસ્સ.

અદુટ્ઠુલ્લં આપત્તિં આરોચેતિ, આપત્તિ દુક્કટસ્સ.

અનુપસમ્પન્નસ્સ દુટ્ઠુલ્લં વા અદુટ્ઠુલ્લં વા અજ્ઝાચારં આરોચેતિ, આપત્તિ દુક્કટસ્સ.

અદુટ્ઠુલ્લાય આપત્તિયા દુટ્ઠુલ્લાપત્તિસઞ્ઞી, આપત્તિ દુક્કટસ્સ.

અદુટ્ઠુલ્લાય આપત્તિયા વેમતિકો, આપત્તિ દુક્કટસ્સ.

અદુટ્ઠુલ્લાય આપત્તિયા અદુટ્ઠુલ્લાપત્તિસઞ્ઞી, આપત્તિ દુક્કટસ્સ.

૮૩. અનાપત્તિ વત્થું આરોચેતિ નો આપત્તિં, આપત્તિં આરોચેતિ નો વત્થું, ભિક્ખુસમ્મુતિયા, ઉમ્મત્તકસ્સ, આદિકમ્મિકસ્સાતિ.

દુટ્ઠુલ્લારોચનસિક્ખાપદં નિટ્ઠિતં નવમં.