૨૧૭. તિચીવરાનુજાનના

૩૪૬. અથ ખો ભગવા રાજગહે યથાભિરન્તં વિહરિત્વા યેન વેસાલી તેન ચારિકં પક્કામિ. અદ્દસ ખો ભગવા અન્તરા ચ રાજગહં અન્તરા ચ વેસાલિં અદ્ધાનમગ્ગપ્પટિપન્નો સમ્બહુલે ભિક્ખૂ ચીવરેહિ ઉબ્ભણ્ડિતે [ઉબ્ભણ્ડીકતે (સ્યા.)] સીસેપિ ચીવરભિસિં કરિત્વા ખન્ધેપિ ચીવરભિસિં કરિત્વા કટિયાપિ ચીવરભિસિં કરિત્વા આગચ્છન્તે, દિસ્વાન ભગવતો એતદહોસિ – ‘‘અતિલહું ખો ઇમે મોઘપુરિસા ચીવરે બાહુલ્લાય આવત્તા. યંનૂનાહં ભિક્ખૂનં ચીવરે સીમં બન્ધેય્યં, મરિયાદં ઠપેય્ય’’ન્તિ. અથ ખો ભગવા અનુપુબ્બેન ચારિકં ચરમાનો યેન વેસાલી તદવસરિ. તત્ર સુદં ભગવા વેસાલિયં વિહરતિ ગોતમકે ચેતિયે. તેન ખો પન સમયેન ભગવા સીતાસુ હેમન્તિકાસુ રત્તીસુ અન્તરટ્ઠકાસુ હિમપાતસમયે રત્તિં અજ્ઝોકાસે એકચીવરો નિસીદિ. ન ભગવન્તં સીતં અહોસિ. નિક્ખન્તે પઠમે યામે સીતં ભગવન્તં અહોસિ. દુતિયં ભગવા ચીવરં પારુપિ. ન ભગવન્તં સીતં અહોસિ. નિક્ખન્તે મજ્ઝિમે યામે સીતં ભગવન્તં અહોસિ. તતિયં ભગવા ચીવરં પારુપિ. ન ભગવન્તં સીતં અહોસિ. નિક્ખન્તે પચ્છિમે યામે ઉદ્ધસ્તે અરુણે નન્દિમુખિયા રત્તિયા સીતં ભગવન્તં અહોસિ. ચતુત્થં ભગવા ચીવરં પારુપિ. ન ભગવન્તં સીતં અહોસિ. અથ ખો ભગવતો એતદહોસિ – ‘‘યેપિ ખો તે કુલપુત્તા ઇમસ્મિં ધમ્મવિનયે સીતાલુકા સીતભીરુકા તેપિ સક્કોન્તિ તિચીવરેન યાપેતું. યંનૂનાહં ભિક્ખૂનં ચીવરે સીમં બન્ધેય્યં, મરિયાદં ઠપેય્યં, તિચીવરં અનુજાનેય્ય’’ન્તિ. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘ઇધાહં, ભિક્ખવે, અન્તરા ચ રાજગહં અન્તરા ચ વેસાલિં અદ્ધાનમગ્ગપ્પટિપન્નો અદ્દસં સમ્બહુલે ભિક્ખૂ ચીવરેહિ ઉબ્ભણ્ડિતે સીસેપિ ચીવરભિસિં કરિત્વા ખન્ધેપિ ચીવરભિસિં કરિત્વા કટિયાપિ ચીવરભિસિં કરિત્વા આગચ્છન્તે, દિસ્વાન મે એતદહોસિ – ‘અતિલહું ખો ઇમે મોઘપુરિસા ચીવરે બાહુલ્લાય આવત્તા. યંનૂનાહં ભિક્ખૂનં ચીવરે સીમં બન્ધેય્યં, મરિયાદં ઠપેય્ય’ન્તિ. ઇધાહં, ભિક્ખવે, સીતાસુ હેમન્તિકાસુ રત્તીસુ અન્તરટ્ઠકાસુ હિમપાતસમયે રત્તિં અજ્ઝોકાસે એકચીવરો નિસીદિં. ન મં સીતં અહોસિ. નિક્ખન્તે પઠમે યામે સીતં મં અહોસિ. દુતિયાહં ચીવરં પારુપિં. ન મં સીતં અહોસિ. નિક્ખન્તે મજ્ઝિમે યામે સીતં મં અહોસિ. તતિયાહં ચીવરં પારુપિં. ન મં સીતં અહોસિ. નિક્ખન્તે પચ્છિમે યામે ઉદ્ધસ્તે અરુણે નન્દિમુખિયા રત્તિયા સીતં મં અહોસિ. ચતુત્થાહં ચીવરં પારુપિં. ન મં સીતં અહોસિ. તસ્સ મય્હં, ભિક્ખવે, એતદહોસિ – ‘‘યેપિ ખો તે કુલપુત્તા ઇમસ્મિં ધમ્મવિનયે સીતાલુકા સીતભીરુકા તેપિ સક્કોન્તિ તિચીવરેન યાપેતું. યંનૂનાહં ભિક્ખૂનં ચીવરે સીમં બન્ધેય્યં, મરિયાદં ઠપેય્યં, તિચીવરં અનુજાનેય્ય’ન્તિ. અનુજાનામિ, ભિક્ખવે, તિચીવરં – દિગુણં સઙ્ઘાટિં, એકચ્ચિયં ઉત્તરાસઙ્ગં, એકચ્ચિયં અન્તરવાસક’’ન્તિ.

તિચીવરાનુજાનના નિટ્ઠિતા.