૨૦૮. સિવેય્યકદુસ્સયુગકથા

૩૩૫. તેન ખો પન સમયેન રઞ્ઞો પજ્જોતસ્સ સિવેય્યકં દુસ્સયુગં ઉપ્પન્નં હોતિ – બહૂનં [બહુન્નં (સી. સ્યા.)] દુસ્સાનં બહૂનં દુસ્સયુગાનં બહૂનં દુસ્સયુગસતાનં બહૂનં દુસ્સયુગસહસ્સાનં બહૂનં દુસ્સયુગસતસહસ્સાનં અગ્ગઞ્ચ સેટ્ઠઞ્ચ મોક્ખઞ્ચ ઉત્તમઞ્ચ પવરઞ્ચ. અથ ખો રાજા પજ્જોતો તં સિવેય્યકં દુસ્સયુગં જીવકસ્સ કોમારભચ્ચસ્સ પાહેસિ. અથ ખો જીવકસ્સ કોમારભચ્ચસ્સ એતદહોસિ – ‘‘ઇદં ખો મે સિવેય્યકં દુસ્સયુગં રઞ્ઞા પજ્જોતેન પહિતં – બહૂનં દુસ્સાનં બહૂનં દુસ્સયુગાનં બહૂનં દુસ્સયુગસતાનં બહૂનં દુસ્સયુગસહસ્સાનં બહૂનં દુસ્સયુગસતસહસ્સાનં અગ્ગઞ્ચ સેટ્ઠઞ્ચ મોક્ખઞ્ચ ઉત્તમઞ્ચ પવરઞ્ચ. નયિદં અઞ્ઞો કોચિ પચ્ચારહતિ અઞ્ઞત્ર તેન ભગવતા અરહતા સમ્માસમ્બુદ્ધેન, રઞ્ઞા વા માગધેન સેનિયેન બિમ્બિસારેના’’તિ.

સિવેય્યકદુસ્સયુગકથા નિટ્ઠિતા.