૯૩. આપત્તિઆવિકરણવિધિ

૧૭૦. તેન ખો પન સમયેન અઞ્ઞતરો ભિક્ખુ પાતિમોક્ખે ઉદ્દિસ્સમાને આપત્તિં સરતિ. અથ ખો તસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન સાપત્તિકેન ઉપોસથો કાતબ્બો’તિ. અહઞ્ચમ્હિ આપત્તિં આપન્નો. કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું.

ઇધ પન, ભિક્ખવે, ભિક્ખુ પાતિમોક્ખે ઉદ્દિસ્સમાને આપત્તિં સરતિ. તેન, ભિક્ખવે, ભિક્ખુના સામન્તો ભિક્ખુ એવમસ્સ વચનીયો – ‘‘અહં, આવુસો, ઇત્થન્નામં આપત્તિં આપન્નો. ઇતો વુટ્ઠહિત્વા તં આપત્તિં પટિકરિસ્સામી’’તિ વત્વા ઉપોસથો કાતબ્બો, પાતિમોક્ખં સોતબ્બં, ન ત્વેવ તપ્પચ્ચયા ઉપોસથસ્સ અન્તરાયો કાતબ્બો.

ઇધ પન, ભિક્ખવે, ભિક્ખુ પાતિમોક્ખે ઉદ્દિસ્સમાને આપત્તિયા વેમતિકો હોતિ. તેન, ભિક્ખવે, ભિક્ખુના સામન્તો ભિક્ખુ એવમસ્સ વચનીયો – ‘‘અહં, આવુસો, ઇત્થન્નામાય આપત્તિયા વેમતિકો. યદા નિબ્બેમતિકો ભવિસ્સામિ, તદા તં આપત્તિં પટિકરિસ્સામી’’તિ વત્વા ઉપોસથો કાતબ્બો, પાતિમોક્ખં સોતબ્બં; ન ત્વેવ તપ્પચ્ચયા ઉપોસથસ્સ અન્તરાયો કાતબ્બોતિ.