૯૨. આપત્તિપટિકમ્મવિધિ

૧૬૯. તેન ખો પન સમયેન અઞ્ઞતરો ભિક્ખુ તદહુપોસથે આપત્તિં આપન્નો હોતિ. અથ ખો તસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન સાપત્તિકેન ઉપોસથો કાતબ્બો’તિ. અહઞ્ચમ્હિ આપત્તિં આપન્નો. કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. ઇધ પન, ભિક્ખવે, ભિક્ખુ તદહુપોસથે આપત્તિં આપન્નો હોતિ. તેન, ભિક્ખવે, ભિક્ખુના એકં ભિક્ખું ઉપસઙ્કમિત્વા એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા એવમસ્સ વચનીયો – ‘‘અહં, આવુસો, ઇત્થન્નામં આપત્તિં આપન્નો, તં પટિદેસેમી’’તિ. તેન વત્તબ્બો – ‘‘પસ્સસી’’તિ. ‘‘આમ પસ્સામી’’તિ. ‘‘આયતિં સંવરેય્યાસી’’તિ.

ઇધ પન, ભિક્ખવે, ભિક્ખુ તદહુપોસથે આપત્તિયા વેમતિકો હોતિ. તેન, ભિક્ખવે, ભિક્ખુના એકં ભિક્ખું ઉપસઙ્કમિત્વા એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા એવમસ્સ વચનીયો – ‘‘અહં, આવુસો, ઇત્થન્નામાય આપત્તિયા વેમતિકો; યદા નિબ્બેમતિકો ભવિસ્સામિ, તદા તં આપત્તિં પટિકરિસ્સામી’’તિ વત્વા ઉપોસથો કાતબ્બો, પાતિમોક્ખં સોતબ્બં, ન ત્વેવ તપ્પચ્ચયા ઉપોસથસ્સ અન્તરાયો કાતબ્બોતિ.

તેન ખો પન સમયેન છબ્બગ્ગિયા ભિક્ખૂ સભાગં આપત્તિં દેસેન્તિ. ભગવતો એતમત્થં આરોચેસું. ન, ભિક્ખવે, સભાગા આપત્તિ દેસેતબ્બા. યો દેસેય્ય, આપત્તિ દુક્કટસ્સાતિ.

તેન ખો પન સમયેન છબ્બગ્ગિયા ભિક્ખૂ સભાગં આપત્તિં પટિગ્ગણ્હન્તિ. ભગવતો એતમત્થં આરોચેસું. ન, ભિક્ખવે, સભાગા આપત્તિ પટિગ્ગહેતબ્બા. યો પટિગ્ગણ્હેય્ય, આપત્તિ દુક્કટસ્સાતિ.