૯૧. સઙ્ઘુપોસથાદિપ્પભેદં

૧૬૮. તેન ખો પન સમયેન અઞ્ઞતરસ્મિં આવાસે તદહુપોસથે ચત્તારો ભિક્ખૂ વિહરન્તિ. અથ ખો તેસં ભિક્ખૂનં એતદહોસિ – ‘‘ભગવતા પઞ્ઞત્તં ‘ઉપોસથો કાતબ્બો’તિ, મયઞ્ચમ્હા ચત્તારો જના, કથં નુ ખો અમ્હેહિ ઉપોસથો કાતબ્બો’’તિ? ભગવતો એતમત્થં આરોચેસું. અનુજાનામિ, ભિક્ખવે, ચતુન્નં પાતિમોક્ખં ઉદ્દિસિતુન્તિ.

તેન ખો પન સમયેન અઞ્ઞતરસ્મિં આવાસે તદહુપોસથે તયો ભિક્ખૂ વિહરન્તિ. અથ ખો તેસં ભિક્ખૂનં એતદહોસિ – ‘‘ભગવતા અનુઞ્ઞાતં ચતુન્નં પાતિમોક્ખં ઉદ્દિસિતું, મયઞ્ચમ્હા તયો જના, કથં નુ ખો અમ્હેહિ ઉપોસથો કાતબ્બો’’તિ? ભગવતો એતમત્થં આરોચેસું. અનુજાનામિ, ભિક્ખવે, તિણ્ણં પારિસુદ્ધિઉપોસથં કાતું. એવઞ્ચ પન, ભિક્ખવે, કાતબ્બો. બ્યત્તેન ભિક્ખુના પટિબલેન તે ભિક્ખૂ ઞાપેતબ્બા –

‘‘સુણન્તુ મે આયસ્મન્તા. અજ્જુપોસથો પન્નરસો. યદાયસ્મન્તાનં પત્તકલ્લં, મયં અઞ્ઞમઞ્ઞં પારિસુદ્ધિઉપોસથં કરેય્યામા’’તિ.

થેરેન ભિક્ખુના એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા તે ભિક્ખૂ એવમસ્સુ વચનીયા – ‘‘પરિસુદ્ધો અહં, આવુસો; પરિસુદ્ધોતિ મં ધારેથ. પરિસુદ્ધો અહં, આવુસો; પરિસુદ્ધોતિ મં ધારેથ. પરિસુદ્ધો અહં, આવુસો; પરિસુદ્ધોતિ મં ધારેથા’’તિ.

નવકેન ભિક્ખુના એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા તે ભિક્ખૂ એવમસ્સુ વચનીયા – ‘‘પરિસુદ્ધો અહં, ભન્તે; પરિસુદ્ધોતિ મં ધારેથ. પરિસુદ્ધો અહં, ભન્તે; પરિસુદ્ધોતિ મં ધારેથ. પરિસુદ્ધો અહં, ભન્તે; પરિસુદ્ધોતિ મં ધારેથા’’તિ.

તેન ખો પન સમયેન અઞ્ઞતરસ્મિં આવાસે તદહુપોસથે દ્વે ભિક્ખૂ વિહરન્તિ. અથ ખો તેસં ભિક્ખૂનં એતદહોસિ – ‘‘ભગવતા અનુઞ્ઞાતં ચતુન્નં પાતિમોક્ખં ઉદ્દિસિતું, તિણ્ણન્નં પારિસુદ્ધિઉપોસથં કાતું. મયઞ્ચમ્હા દ્વે જના. કથં નુ ખો અમ્હેહિ ઉપોસથો કાતબ્બો’’તિ? ભગવતો એતમત્થં આરોચેસું. અનુજાનામિ, ભિક્ખવે, દ્વિન્નં પારિસુદ્ધિઉપોસથં કાતું. એવઞ્ચ પન, ભિક્ખવે, કાતબ્બો. થેરેન ભિક્ખુના એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા નવો ભિક્ખુ એવમસ્સ વચનીયો – ‘‘પરિસુદ્ધો અહં, આવુસો; પરિસુદ્ધોતિ મં ધારેહિ. પરિસુદ્ધો અહં, આવુસો; પરિસુદ્ધોતિ મં ધારેહિ. પરિસુદ્ધો અહં, આવુસો; પરિસુદ્ધોતિ મં ધારેહી’’તિ.

નવકેન ભિક્ખુના એકંસં ઉત્તરાસઙ્ગં કરિત્વા ઉક્કુટિકં નિસીદિત્વા અઞ્જલિં પગ્ગહેત્વા થેરો ભિક્ખુ એવમસ્સ વચનીયો – ‘‘પરિસુદ્ધો અહં, ભન્તે; પરિસુદ્ધોતિ મં ધારેથ. પરિસુદ્ધો અહં, ભન્તે; પરિસુદ્ધોતિ મં ધારેથ. પરિસુદ્ધો અહં, ભન્તે; પરિસુદ્ધોતિ મં ધારેથા’’તિ.

તેન ખો પન સમયેન અઞ્ઞતરસ્મિં આવાસે તદહુપોસથે એકો ભિક્ખુ વિહરતિ. અથ ખો તસ્સ ભિક્ખુનો એતદહોસિ – ‘‘ભગવતા અનુઞ્ઞાતં ચતુન્નં પાતિમોક્ખં ઉદ્દિસિતું, તિણ્ણન્નં પારિસુદ્ધિઉપોસથં કાતું, દ્વિન્નં પારિસુદ્ધિઉપોસથં કાતું. અહઞ્ચમ્હિ એકકો. કથં નુ ખો મયા ઉપોસથો કાતબ્બો’’તિ? ભગવતો એતમત્થં આરોચેસું. ઇધ પન, ભિક્ખવે, અઞ્ઞતરસ્મિં આવાસે તદહુપોસથે એકો ભિક્ખુ વિહરતિ. તેન, ભિક્ખવે, ભિક્ખુના યત્થ ભિક્ખૂ પટિક્કમન્તિ ઉપટ્ઠાનસાલાય વા, મણ્ડપે વા, રુક્ખમૂલે વા, સો દેસો સમ્મજ્જિત્વા પાનીયં પરિભોજનીયં ઉપટ્ઠાપેત્વા આસનં પઞ્ઞપેત્વા પદીપં કત્વા નિસીદિતબ્બં. સચે અઞ્ઞે ભિક્ખૂ આગચ્છન્તિ, તેહિ સદ્ધિં ઉપોસથો કાતબ્બો. નો ચે આગચ્છન્તિ, અજ્જ મે ઉપોસથોતિ અધિટ્ઠાતબ્બો. નો ચે અધિટ્ઠહેય્ય, આપત્તિ દુક્કટસ્સ.

તત્ર, ભિક્ખવે, યત્થ ચત્તારો ભિક્ખૂ વિહરન્તિ, ન એકસ્સ પારિસુદ્ધિં આહરિત્વા તીહિ પાતિમોક્ખં ઉદ્દિસિતબ્બં. ઉદ્દિસેય્યું ચે, આપત્તિ દુક્કટસ્સ. તત્ર, ભિક્ખવે, યત્થ તયો ભિક્ખૂ વિહરન્તિ, ન એકસ્સ પારિસુદ્ધિં આહરિત્વા દ્વીહિ પારિસુદ્ધિઉપોસથો કાતબ્બો. કરેય્યું ચે, આપત્તિ દુક્કટસ્સ. તત્ર, ભિક્ખવે, યત્થ દ્વે ભિક્ખૂ વિહરન્તિ, ન એકસ્સ પારિસુદ્ધિં આહરિત્વા એકેન અધિટ્ઠાતબ્બો. અધિટ્ઠહેય્ય ચે, આપત્તિ દુક્કટસ્સાતિ.