૪. પટિઞ્ઞાતકરણં

૨૦૦. તેન ખો પન સમયેન છબ્બગ્ગિયા ભિક્ખૂ અપ્પટિઞ્ઞાય ભિક્ખૂનં કમ્માનિ કરોન્તિ – તજ્જનીયમ્પિ, નિયસ્સમ્પિ, પબ્બાજનીયમ્પિ, પટિસારણીયમ્પિ, ઉક્ખેપનીયમ્પિ. યે તે ભિક્ખૂ અપ્પિચ્છા…પે… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ અપ્પટિઞ્ઞાય ભિક્ખૂનં કમ્માનિ કરિસ્સન્તિ – તજ્જનીયમ્પિ, નિયસ્સમ્પિ, પબ્બાજનીયમ્પિ, પટિસારણીયમ્પિ, ઉક્ખેપનીયમ્પી’’તિ! અથ ખો તે ભિક્ખૂ ભગવતો એતમત્થં આરોચેસું…પે… ‘‘સચ્ચં કિર, ભિક્ખવે…પે… ‘‘સચ્ચં ભગવા’’તિ…પે… વિગરહિત્વા…પે… ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, અપ્પટિઞ્ઞાય ભિક્ખૂનં કમ્મં કાતબ્બં – તજ્જનીયં વા, નિયસ્સં વા, પબ્બાજનીયં વા, પટિસારણીયં વા, ઉક્ખેપનીયં વા. યો કરેય્ય, આપત્તિ દુક્કટસ્સ.

૨૦૧. ‘‘એવં ખો, ભિક્ખવે, અધમ્મિકં હોતિ પટિઞ્ઞાતકરણં, એવં ધમ્મિકં. કથઞ્ચ, ભિક્ખવે, અધમ્મિકં હોતિ પટિઞ્ઞાતકરણં?

‘‘ભિક્ખુ પારાજિકં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘પારાજિકં આયસ્મા અજ્ઝાપન્નો’તિ? સો એવં વદેતિ – ‘ન ખો અહં, આવુસો, પારાજિકં અજ્ઝાપન્નો, સઙ્ઘાદિસેસં અજ્ઝાપન્નો’તિ. તં સઙ્ઘો સઙ્ઘાદિસેસેન કારેતિ. અધમ્મિકં પટિઞ્ઞાતકરણં.

‘‘ભિક્ખુ પારાજિકં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘પારાજિકં આયસ્મા અજ્ઝાપન્નો’તિ? સો એવં વદેતિ – ‘ન ખો અહં, આવુસો, પારાજિકં અજ્ઝાપન્નો, થુલ્લચ્ચયં…પે… પાચિત્તિયં…પે… પાટિદેસનીયં…પે… દુક્કટં…પે… દુબ્ભાસિતં અજ્ઝાપન્નો’તિ. તં સઙ્ઘો દુબ્ભાસિતેન કારેતિ. અધમ્મિકં પટિઞ્ઞાતકરણં.

‘‘ભિક્ખુ સઙ્ઘાદિસેસં…પે… થુલ્લચ્ચયં…પે… પાચિત્તિયં…પે… પાટિદેસનીયં…પે… દુક્કટં…પે… દુબ્ભાસિતં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘દુબ્ભાસિતં આયસ્મા અજ્ઝાપન્નો’તિ? સો એવં વદેતિ – ‘ન ખો અહં, આવુસો, દુબ્ભાસિતં અજ્ઝાપન્નો, પારાજિકં અજ્ઝાપન્નો’તિ. તં સઙ્ઘો પારાજિકેન કારેતિ. અધમ્મિકં પટિઞ્ઞાતકરણં.

‘‘ભિક્ખુ દુબ્ભાસિતં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘દુબ્ભાસિતં આયસ્મા અજ્ઝાપન્નો’તિ? સો એવં વદેતિ – ‘ન ખો અહં, આવુસો, દુબ્ભાસિતં અજ્ઝાપન્નો, સઙ્ઘાદિસેસં…પે… થુલ્લચ્ચયં…પે… પાચિત્તિયં…પે… પાટિદેસનીયં…પે… દુક્કટં અજ્ઝાપન્નો’તિ. તં સઙ્ઘો દુક્કટેન કારેતિ. અધમ્મિકં પટિઞ્ઞાતકરણં. ‘‘એવં ખો, ભિક્ખવે, અધમ્મિકં હોતિ પટિઞ્ઞાતકરણં.

‘‘કથઞ્ચ, ભિક્ખવે, ધમ્મિકં હોતિ પટિઞ્ઞાતકરણં? ભિક્ખુ પારાજિકં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘પારાજિકં આયસ્મા અજ્ઝાપન્નો’તિ? સો એવં વદેતિ – ‘આમ, આવુસો, પારાજિકં અજ્ઝાપન્નો’તિ. તં સઙ્ઘો પારાજિકેન કારેતિ. ધમ્મિકં પટિઞ્ઞાતકરણં.

‘‘ભિક્ખુ સઙ્ઘાદિસેસં…પે… થુલ્લચ્ચયં…પે… પાચિત્તિયં…પે… પાટિદેસનીયં…પે… દુક્કટં…પે… દુબ્ભાસિતં અજ્ઝાપન્નો હોતિ. તમેનં ચોદેતિ સઙ્ઘો વા, સમ્બહુલા વા, એકપુગ્ગલો વા – ‘દુબ્ભાસિતં આયસ્મા અજ્ઝાપન્નો’તિ? સો એવં વદેતિ – ‘આમ, આવુસો, દુબ્ભાસિતં અજ્ઝાપન્નો’તિ. તં સઙ્ઘો દુબ્ભાસિતેન કારેતિ. ધમ્મિકં પટિઞ્ઞાતકરણં. એવં ખો, ભિક્ખવે, ધમ્મિકં હોતિ પટિઞ્ઞાતકરણ’’ન્તિ.