૫. યેભુય્યસિકા

૨૦૨. તેન ખો પન સમયેન ભિક્ખૂ સઙ્ઘમજ્ઝે ભણ્ડનજાતા કલહજાતા વિવાદાપન્ના અઞ્ઞમઞ્ઞં મુખસત્તીહિ વિતુદન્તા વિહરન્તિ, ન સક્કોન્તિ તં અધિકરણં વૂપસમેતું. ભગવતો એતમત્થં આરોચેસું. ‘‘અનુજાનામિ, ભિક્ખવે, એવરૂપં અધિકરણં યેભુય્યસિકાય વૂપસમેતું. પઞ્ચહઙ્ગેહિ સમન્નાગતો ભિક્ખુ સલાકગ્ગાહાપકો સમ્મન્નિતબ્બો – યો ન છન્દાગતિં ગચ્છેય્ય, ન દોસાગતિં ગચ્છેય્ય, ન મોહાગતિં ગચ્છેય્ય, ન ભયાગતિં ગચ્છેય્ય, ગહિતાગહિતુઞ્ચ જાનેય્ય. એવઞ્ચ પન, ભિક્ખવે, સમ્મન્નિતબ્બો. પઠમં ભિક્ખુ યાચિતબ્બો, યાચિત્વા બ્યત્તેન ભિક્ખુના પટિબલેન સઙ્ઘો ઞાપેતબ્બો –

૨૦૩. ‘‘સુણાતુ મે, ભન્તે, સઙ્ઘો. યદિ સઙ્ઘસ્સ પત્તકલ્લં, સઙ્ઘો ઇત્થન્નામં ભિક્ખું સલાકગ્ગાહાપકં સમ્મન્નેય્ય. એસા ઞત્તિ.

‘‘સુણાતુ મે, ભન્તે, સઙ્ઘો. સઙ્ઘો ઇત્થન્નામં ભિક્ખું સલાકગ્ગાહાપકં સમ્મન્નતિ. યસ્સાયસ્મતો ખમતિ ઇત્થન્નામસ્સ ભિક્ખુનો સલાકગ્ગાહાપકસ્સ સમ્મુતિ, સો તુણ્હસ્સ; યસ્સ નક્ખમતિ, સો ભાસેય્ય.

‘‘સમ્મતો સઙ્ઘેન ઇત્થન્નામો ભિક્ખુ સલાકગ્ગાહાપકો. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.

૨૦૪. ‘‘દસયિમે, ભિક્ખવે, અધમ્મિકા સલાકગ્ગાહા, દસ ધમ્મિકા [દસ ધમ્મિકા સલાકગ્ગાહા (ક.)]. કતમે દસ અધમ્મિકા સલાકગ્ગાહા? ઓરમત્તકઞ્ચ અધિકરણં હોતિ, ન ચ ગતિગતં હોતિ, ન ચ સરિતસારિતં હોતિ, જાનાતિ અધમ્મવાદી બહુતરાતિ, અપ્પેવ નામ અધમ્મવાદી બહુતરા અસ્સૂતિ, જાનાતિ સઙ્ઘો ભિજ્જિસ્સતીતિ, અપ્પેવ નામ સઙ્ઘો ભિજ્જેય્યાતિ, અધમ્મેન ગણ્હન્તિ, વગ્ગા ગણ્હન્તિ, ન ચ યથાદિટ્ઠિયા ગણ્હન્તિ – ઇમે દસ અધમ્મિકા સલાકગ્ગાહા.

‘‘કતમે દસ ધમ્મિકા સલાકગ્ગાહા? ન ચ ઓરમત્તકં અધિકરણં હોતિ, ગતિગતઞ્ચ હોતિ, સરિતસારિતઞ્ચ હોતિ, જાનાતિ ધમ્મવાદી બહુતરાતિ, અપ્પેવ નામ ધમ્મવાદી બહુતરા અસ્સૂતિ, જાનાતિ સઙ્ઘો ન ભિજ્જિસ્સતીતિ, અપ્પેવ નામ સઙ્ઘો ન ભિજ્જેય્યાતિ, ધમ્મેન ગણ્હન્તિ, સમગ્ગા ગણ્હન્તિ, યથાદિટ્ઠિયા ચ ગણ્હન્તિ – ઇમે દસ ધમ્મિકા સલાકગ્ગાહા’’તિ.