૯. પરિવત્તનહારસમ્પાતવિભાવના

૭૧. યેન યેન વિભત્તિહારસમ્પાતેન સુત્તપ્પદેસત્થા વિભત્તા, સો વિભત્તિહારસમ્પાતો પરિપુણ્ણો, ‘‘કતમો પરિવત્તનહારસમ્પાતો’’તિ પુચ્છિતબ્બત્તા ‘‘તત્થ કતમો પરિવત્તનો હારસમ્પાતો’’તિઆદિ વુત્તં.

‘‘કતમે સુત્તપ્પદેસત્થા કથં પરિવત્તેતબ્બા’’તિ પુચ્છિતબ્બત્તા ‘‘તસ્મા’’તિઆદિ વુત્તં. યા ‘‘તસ્મા…પે… ગોચરો’’તિ ગાથા વુત્તા, તાય ગાથાય યા સમથવિપસ્સના નિદ્ધારિતા, તાય સમથવિપસ્સનાય ભાવિતાય અકુસલાનં નિરોધો ફલં પયોજનં હોતિ, પરિઞ્ઞાતં દુક્ખં હોતિ, સમુદયો પહીનો હોતિ, મગ્ગો ભાવિતો હોતીતિ પરિવત્તેતબ્બો. પટિપક્ખેન પન સમથવિપસ્સનાય અભાવિતાય અકુસલાનં અનિરોધો, અપરિઞ્ઞાતં દુક્ખં, સમુદયો અપ્પહીનો, મગ્ગો અભાવિતો હોતીતિ પરિવત્તેતબ્બો.

‘‘એત્તકોવ પરિવત્તનહારસમ્પાતો પરિપુણ્ણો’’તિ વત્તબ્બત્તા ‘‘નિયુત્તો પરિવત્તનો હારસમ્પાતો’’તિ વુત્તં. યેન યેન સંવણ્ણનાવિસેસભૂતેન પરિવત્તનહારસમ્પાતેન સુત્તપ્પદેસત્થા પરિવત્તેતબ્બા, સો સો સંવણ્ણનાવિસેસભૂતો પરિવત્તનહારસમ્પાતો નિયુત્તો યથારહં નીહરિત્વા યુજ્જિતબ્બોતિ અત્થો ગહેતબ્બોતિ.

ઇતિ પરિવત્તનહારસમ્પાતે સત્તિબલાનુરૂપા રચિતા

વિભાવના નિટ્ઠિતા.

પણ્ડિતેહિ પન…પે… ગહેતબ્બોતિ.