૩. કામગુણકથાવણ્ણના

૫૧૦. સબ્બેપીતિ કુસલાકુસલક્ખન્ધાદયોપિ. તેસમ્પિ હિ આલમ્બનત્થિકતાલક્ખણસ્સ કત્તુકમ્યતાછન્દસ્સ વસેન સિયા કમનટ્ઠતાતિ અધિપ્પાયો. ધાતુકથાયં ‘‘કામભવો પઞ્ચહિ ખન્ધેહિ એકાદસહિ આયતનેહિ સત્તરસહિ ધાતૂહિ સઙ્ગહિતો. કતિહિ અસઙ્ગહિતો? ન કેહિચિ ખન્ધેહિ એકેનાયતનેન એકાય ધાતુયા અસઙ્ગહિતો’’તિ આગતત્તા આહ ‘‘ઉપાદિન્નક્ખન્ધાનમેવ કામભવભાવો ધાતુકથાયં દસ્સિતો’’તિ. પઞ્ચાતિ ગણનપરિચ્છેદો, તદઞ્ઞગણનનિવત્તનત્થોતિ ‘‘પઞ્ચ કામગુણા’’તિ વચનં તતો અઞ્ઞેસં તબ્ભાવં નિવત્તેતીતિ આહ ‘‘પઞ્ચેવ કામકોટ્ઠાસા કામોતિ વુત્તા’’તિ. તતો એવ કામધાતૂતિ વચનં ન અઞ્ઞસ્સ નામં, તેસંયેવ નામન્તિ અત્થો. તયિદં પરવાદિનો મતિમત્તન્તિ વુત્તં ‘‘ઇમિના અધિપ્પાયેના’’તિ. એવં વચનમત્તન્તિ એવં ‘‘પઞ્ચિમે કામગુણા’’તિ વચનમત્તં નિસ્સાય, ન પનત્થસ્સ અવિપરીતં અત્થન્તિ અત્થો.

કામગુણકથાવણ્ણના નિટ્ઠિતા.