૪. દાનકથાવણ્ણના

૪૭૯. ફલદાનભાવદીપનત્થન્તિ ફલદાનસબ્ભાવદીપનત્થં. ફલદાનં વુત્તં વિય હોતીતિ ચિત્તેન ફલદાનં પધાનભાવે વુત્તં વિય હોતીતિ અત્થો. અઞ્ઞથા દાનભાવોતિ ન સક્કા વત્તું. દાનભાવોપિ હિ ‘‘દાનં અનિટ્ઠફલ’’ન્તિઆદિના વુત્તોયેવાતિ. તન્નિવારણત્થન્તિ ફલદાનનિવારણત્થં. એતન્તિ ‘‘દાનં અનિટ્ઠફલ’’ન્તિઆદિવચનં. ભેસજ્જાદિવસેન આબાધાનિટ્ઠતા દેય્યધમ્મસ્સ અનિટ્ઠફલતાપરિયાયો દટ્ઠબ્બો.

કથં તથેવ સુત્તં સકવાદિપરવાદિવાદેસુ યુજ્જતીતિ ચોદનાય ‘‘ન પન એકેનત્થેના’’તિ વુત્તં વિભાવેતું ‘‘દેય્યધમ્મોવ દાન’’ન્તિઆદિ વુત્તં. તત્થ નિવત્તનપક્ખેયેવ એવ-કારો યુત્તો, ન સાધનપક્ખે દ્વિન્નમ્પિ દાનભાવસ્સ ઇચ્છિતત્તા. તેનાહ ‘‘ચેતસિકોવાતિ અત્થો દટ્ઠબ્બો, દેય્યધમ્મોવા’’તિ ચ. તેનેવાહ ‘‘દ્વિન્નઞ્હિ દાનાનન્તિઆદિ. સઙ્કરભાવમોચનત્થન્તિ સતિપિ દાનભાવે સભાવસઙ્કરમોચનત્થં. તેનાહ ‘‘ચેતસિકસ્સા’’તિઆદિ.

દાનકથાવણ્ણના નિટ્ઠિતા.