૮. નાવાભિરુહનસિક્ખાપદવણ્ણના

૧૮૮. અટ્ઠમે લોકસ્સાદમિત્તસન્થવવસેન કીળાપુરેક્ખારા સંવિદહિત્વાતિ અયં વિસેસો ‘‘એવમિમે…પે… ભિક્ખુનીહિ સદ્ધિં નાવાય કીળન્તી’’તિ ઇમિના ‘‘ઉદ્ધંગામિનિં વા અધોગામિનિં વા’’તિ ઇમિના ચ સિદ્ધો.

૧૮૯. નદિયા કુતો ગામન્તરન્તિ આહ ‘‘યસ્સા નદિયા’’તિઆદિ. ‘‘તસ્સા સગામકતીરપસ્સેન…પે… અદ્ધયોજનગણનાયાતિ એકેકપસ્સેનેવ ગમનં સન્ધાય વુત્તત્તા તાદિસિકાય નદિયા મજ્ઝેન ગચ્છન્તસ્સ ગામન્તરગણનાય અદ્ધયોજનગણનાય ચ આપત્તી’’તિ વદન્તિ. સબ્બઅટ્ઠકથાસૂતિઆદિના અત્તના વુત્તમેવત્થં સમત્થેતિ. ‘‘કીળાપુરેક્ખારતાય ભિક્ખુનિયા સદ્ધિં સંવિધાય નાવં અભિરુહન્તસ્સ નદિયંયેવ પાચિત્તિયસ્સ વુત્તત્તા વાપિસમુદ્દાદીસુ કીળાપુરેક્ખારતાય દુક્કટમેવ, ન પાચિત્તિય’’ન્તિ વદન્તિ. ‘‘લોકસ્સાદમિત્તસન્થવવસેન કીળાપુરેક્ખારા સંવિદહિત્વા’’તિ વચનતો કેચિ ‘‘ઇમં સિક્ખાપદં અકુસલચિત્તં લોકવજ્જ’’ન્તિ વદન્તિ, તં ન ગહેતબ્બં. કીળાપુરેક્ખારતાય હિ અભિરુહિત્વાપિ ગામન્તરોક્કમને અદ્ધયોજનાતિક્કમે વા કુસલાબ્યાકતચિત્તસમઙ્ગીપિ હુત્વા આપત્તિં આપજ્જતિ. યદિ હિ સો સંવેગં પટિલભિત્વા અરહત્તં વા સચ્છિકરેય્ય, નિદ્દં વા ઓક્કમેય્ય, કમ્મટ્ઠાનં વા મનસિ કરોન્તો ગચ્છેય્ય, કુતો તસ્સ અકુસલચિત્તસમઙ્ગિતા, યેનિદં સિક્ખાપદં અકુસલચિત્તં લોકવજ્જન્તિ વુચ્ચતિ, તસ્મા પણ્ણત્તિવજ્જં તિચિત્તન્તિ સિદ્ધં. સેસમેત્થ ઉત્તાનમેવ.

નાવાભિરુહનસિક્ખાપદવણ્ણના નિટ્ઠિતા.