નિસ્સગ્ગિયકથા

૫૫૧. ખોમં કપ્પાસકોસેય્યં, સાણં ભઙ્ગઞ્ચ કમ્બલં;

ચીવરં છબ્બિધં વુત્તં, જાતિતો પન કપ્પિયં.

૫૫૨. દુકૂલઞ્ચેવ પત્તુણ્ણં, ચિનં સોમારપટ્ટકં;

ઇદ્ધિજં દેવદિન્નઞ્ચ, તસ્સેતં અનુલોમિકં.

૫૫૩. તિચીવરં પરિક્ખાર-ચોળઞ્ચ મુખપુઞ્છનં;

નિસીદનમધિટ્ઠેય્ય, પચ્ચત્થરણમેવ ચ.

૫૫૪. એકાહમ્પિ વિના ભિક્ખુ, ન વસેય્ય તિચીવરં;

ન વસેય્ય તથાધિટ્ઠા, ચાતુમાસં નિસીદનં.

૫૫૫. રજિત્વા કપ્પિયં બિન્દું, દત્વા તત્થ તિચીવરં;

ઉપપન્નં પમાણેન, અધિટ્ઠાતબ્બમેવ તં.

૫૫૬. પચ્છિમન્તેન સઙ્ઘાટિ, દીઘસો મુટ્ઠિપઞ્ચકા;

મુટ્ઠિત્તિકા ચ તિરિયં, ઉત્તમન્તેન સા પન.

૫૫૭. સત્થુનો ચીવરૂનાપિ, વટ્ટતીતિ પકાસિતા;

ઇદમેવુત્તરાસઙ્ગે, પમાણં પરિદીપિતં.

૫૫૮. મુટ્ઠિપઞ્ચકં દીઘન્તં, પમાણં તિરિયન્તતો;

અડ્ઢતેય્યં દ્વિહત્થં વા, સેસે અન્તરવાસકે.

૫૫૯. અહતાહતકપ્પાનં, સઙ્ઘાટિ દિગુણા મતા;

એકપટ્ટુત્તરાસઙ્ગો, એવમન્તરવાસકો.

૫૬૦. ઉતુદ્ધટાનં પન ચીવરાનં;

સઙ્ઘાટિ ભિક્ખુસ્સ ચતુગ્ગુણા વા;

દુવેપિ સેસા દિગુણાવ વુત્તા;

યથાસુખં વટ્ટતિ પંસુકૂલં.

૫૬૧. તીણિપિ દ્વેપિ ચેકં વા, છિન્દિતબ્બં પહોતિ ચે;

સબ્બેસુ અપ્પહોન્તેસુ, દેય્યમન્વાધિકમ્પિ વા.

૫૬૨. અચ્છિન્નં વા અનાદિન્નં, ધારેન્તસ્સ તિચીવરં;

ભિક્ખુનો દુક્કટં વુત્તં, દુબ્ભોગેન ચ સેવતો.

૫૬૩. કુસિં અડ્ઢકુસિઞ્ચાપિ, મણ્ડલં અડ્ઢમણ્ડલં;

વિવટ્ટં અનુવિવટ્ટં, બાહન્તમ્પિ ચ ભિક્ખુનો.

૫૬૪. દસ્સેત્વાવ વિધિં સબ્બં, પઞ્ચકાદિપ્પભેદકં;

છિન્નં સમણસારુપ્પં, કાતબ્બં તુ તિચીવરં.

૫૬૫. દાનેનચ્છિજ્જગાહેન, વિસ્સાસગ્ગહણેન ચ;

હીનાયાવત્તનેનાપિ, સિક્ખાય ચ પહાનતો.

૫૬૬. પચ્ચુદ્ધારવિનાસેહિ, લિઙ્ગસ્સ પરિવત્તના;

સબ્બં ભિજ્જતિધિટ્ઠાનં, છિદ્દભાવે તિચીવરં.

૫૬૭. કનિટ્ઠસ્સઙ્ગુલસ્સેવ, નખપિટ્ઠિપ્પમાણકં;

વિનિવિદ્ધં પનચ્છિદ્દ-મધિટ્ઠાનવિનાસનં.

૫૬૮. એકો તન્તુપિ અચ્છિન્નો, અધિટ્ઠાનં ન ભિન્દતિ;

સેતભાવં કરોન્તેન, ધોતમ્પિ રજકેન વા.

૫૬૯. પઠમં અગ્ગળં દત્વા, પચ્છા છિન્દતિ રક્ખતિ;

ઘટેત્વા કોટિયો દ્વે વા, પચ્છા છિન્દતિ રક્ખતિ.

૫૭૦. ચતુરટ્ઠઙ્ગુલા ઓરં, એકદ્વિન્નં તિરીયતો;

તિણ્ણમ્પિ દીઘતો છિદ્દં, ભિન્દતેવ વિદત્થિયા.

૫૭૧. નિસીદનસ્સ દીઘેન, ભવન્તિ દ્વે વિદત્થિયો;

વિત્થારેન દિયડ્ઢા ચ, સુગતસ્સ વિદત્થિયા.

૫૭૨. હોન્તિ કણ્ડુપ્પટિચ્છાદિ, તિરિયં દ્વે વિદત્થિયો;

દીઘતોપિ ચતસ્સોવ, સુગતસ્સ વિદત્થિયા.

૫૭૩. દીઘતો સુગતસ્સેવ, ભવન્તિ છ વિદત્થિયો;

વિત્થારેનડ્ઢતેય્યાવ, સિયા વસ્સિકસાટિકા.

૫૭૪. મુનિના તીસુ એતેસુ, કરોન્તસ્સ તદુત્તરિં;

અધિકચ્છેદનં તસ્સ, પાચિત્તિયમુદીરિતં.

૫૭૫. મુખપુઞ્છનચોળસ્સ, પચ્ચત્થરણકસ્સ વા;

પમાણં અપ્પમાણેન, ન ચેવ પરિદીપિતં.

૫૭૬. સદસં અદસં સબ્બં, પચ્ચત્થરણચીવરં;

મહન્તં ખુદ્દકં એક-મનેકમ્પિ ચ વટ્ટતિ.

૫૭૭. મુખપુઞ્છનચોળેકં, દ્વેપિ વટ્ટન્તિ સબ્બથા;

સદસં અદસં વાપિ, સદસંવ નિસીદનં.

૫૭૮. અદસા રજિતાયેવ, વટ્ટતાદિન્નકપ્પકા;

વુત્તા કણ્ડુપ્પટિચ્છાદિ, તથા વસ્સિકસાટિકા.

૫૭૯. ગણનં વા પમાણં વા, ન પરિક્ખારચોળકે;

પમાણગણનાતીતિ, ભણન્તિ પકતઞ્ઞુનો.

૫૮૦. સુગતટ્ઠઙ્ગુલાયામં, ચતુરઙ્ગુલવિત્થતં;

વિકપ્પનુપગં હોતિ, પચ્છિમં નામ ચીવરં.

૫૮૧. પરિસ્સાવપટં પત્ત-પોત્થકત્થવિકાદિકં;

અધિટ્ઠેય્ય પરિક્ખાર-ચોળં પચ્છિમચીવરં.

૫૮૨. બહૂનિ એકતો કત્વા, અધિટ્ઠાતુમ્પિ વટ્ટતિ;

માતુઆદીનમત્થાય, ઠપિતે નત્થિ દોસતા.

૫૮૩. વસ્સમાસે અધિટ્ઠેય્ય, ચતુરો વસ્સસાટિકં;

પુન પચ્ચુદ્ધરિત્વા તં, વિકપ્પેય્ય તતો પરં.

૫૮૪. તાવ કણ્ડુપ્પટિચ્છાદિં, યાવ રોગો ન સમ્મતિ;

અધિટ્ઠહિત્વા તતો ઉદ્ધં, ઉદ્ધરિત્વા વિકપ્પયે.

૫૮૫. ‘‘ઇમં કણ્ડુપ્પટિચ્છાદિં, ઇમમન્તરવાસકં;

અધિટ્ઠામી’’તિધિટ્ઠેય્ય, સેસેસુપિ અયં નયો.

૫૮૬. ‘‘ઇમં કણ્ડુપ્પટિચ્છાદિં, એત’’ન્તિ ચ અસમ્મુખે;

વત્વા પચ્ચુદ્ધરેય્યેવં, સેસેસુપિ વિચક્ખણો.

૫૮૭. આભોગં મનસા કત્વા, કાયેન ફુસનાકતં;

વચસાધિટ્ઠિતઞ્ચાતિ, અધિટ્ઠાનં દ્વિધા મતં.

૫૮૮. ઇતિ સબ્બમિદં વુત્તં, તેચીવરિકભિક્ખુનો;

તથા વત્વાવધિટ્ઠેય્ય, તં પરિક્ખારચોળિકો.

૫૮૯. તિચીવરં પરિક્ખાર-ચોળં કાતુમ્પિ વટ્ટતિ;

એવં ચુદોસિતે વુત્તો, પરિહારો નિરત્થકો.

૫૯૦. ન, તેચીવરિકસ્સેવ, વુત્તત્તા તત્થ સત્થુના;

તં પરિક્ખારચોળસ્સ, તસ્મા સબ્બમ્પિ વટ્ટતિ.

૫૯૧. ‘‘અધિટ્ઠેતિ વિકપ્પેતિ, અનાપત્તી’’તિ એત્થ ચ;

અધિટ્ઠાતબ્બકસ્સેવ, વિકપ્પનવિધાનતો.

૫૯૨. ભિક્ખુસ્સેવં કરોન્તસ્સ, ન દોસો ઉપલબ્ભતિ;

એવઞ્ચ ન સિયા કસ્મા, મુખપુઞ્છનકાદિકં.

૫૯૩. મુખપુઞ્છનકાદીનં, તેસં કિચ્ચવિધાનતો;

અકિચ્ચસ્સામિકસ્સસ્સ, અધિટ્ઠાનં તુ યુજ્જતિ.

૫૯૪. નિધાનમુખમેતન્તિ, મહાપચ્ચરિયં પન;

વુત્તત્તા ચ નિસેધેતું, ન સક્કા વિનયઞ્ઞુના.

૫૯૫. ચીવરં પરિપુણ્ણન્તિ, નિદાનુપ્પત્તિતોપિ ચ;

નિધાનમુખમેતન્તિ, વેદિતબ્બં વિભાવિના.

૫૯૬. કુસવાકાદિચીરાનિ, કમ્બલં કેસવાલજં;

થુલ્લચ્ચયં ધારયતો-લૂકપક્ખાજિનક્ખિપે.

૫૯૭. કદલેરકદુસ્સેસુ, અક્કદુસ્સે ચ પોત્થકે;

દુક્કટં તિરિટે વાપિ, વેઠને કઞ્ચુકેપિ ચ.

૫૯૮. સબ્બનીલકમઞ્જેટ્ઠ-કણ્હલોહિતપીતકે;

મહાનામમહારઙ્ગ-રત્તેસુપિ ચ દુક્કટં.

૫૯૯. અચ્છિન્નદસકે દીઘ-ફલપુપ્ફદસેસુ ચ;

અચ્છિન્નચીવરસ્સેત્થ, નત્થિ કિઞ્ચિ અકપ્પિયં.

૬૦૦. અધિટ્ઠેતિ વિકપ્પેતિ, વિસ્સજ્જેતિ વિનસ્સતિ;

અન્તોદસાહં વિસ્સાસે, અનાપત્તિ પકાસિતા.

૬૦૧. કથિનં નામ નામેન, સમુટ્ઠાનમિદં પન;

અચિત્તમક્રિયં વુત્તં, તિચિત્તઞ્ચ તિવેદનં.

પઠમકથિનકથા.

૬૦૨. ગામાદીસુ પદેસેસુ, તિપઞ્ચસુ તિચીવરં;

ઠપેત્વા એકરત્તમ્પિ, સઙ્ઘસમ્મુતિયા વિના.

૬૦૩. ભિક્ખુનો પન તેનસ્સ, વિપ્પવત્થું ન વટ્ટતિ;

હોતિ નિસ્સગ્ગિયં વિપ્પ-વસતો અરુણુગ્ગમે.

૬૦૪. ચીવરં નિક્ખિપિત્વાન, ન્હાયન્તસ્સેવ રત્તિયં;

અરુણે ઉટ્ઠિતે કિં નુ, કાતબ્બં તેન ભિક્ખુના.

૬૦૫. દુક્કટં મુનિના વુત્તં, નિસ્સગ્ગિયનિવાસને;

તબ્ભયા પન સો ભિક્ખુ, નગ્ગો ગચ્છતિ દુક્કટં.

૬૦૬. અચ્છિન્નચીવરટ્ઠાને, ઠિતત્તા પન ભિક્ખુનો;

ન તસ્સાકપ્પિયં નામ, ચીવરં અત્થિ કિઞ્ચિપિ.

૬૦૭. નિગાસેત્વા ગહેત્વા ચ, ગન્ત્વા ભિક્ખુસ્સ સન્તિકં;

નિસ્સજ્જિત્વા પનાપત્તિ, દેસેતબ્બાવ વિઞ્ઞુના.

૬૦૮. પરસ્સ નિસ્સજ્જિત્વા તં, દુક્કટં પરિભુઞ્જતો;

પયોગે ચ પયોગે ચ, હોતિ પારુપનાદિસુ.

૬૦૯. અનાપત્તિ તમઞ્ઞસ્સ, ભિક્ખુનો પરિભુઞ્જતો;

અદેન્તસ્સ ચ નિસ્સટ્ઠં, દુક્કટં પરિયાપુતં.

૬૧૦. થેરે ચ દહરે મગ્ગં, ગચ્છન્તેસુ ઉભોસુપિ;

પત્તચીવરમાદાય, ઓહીને દહરે પન.

૬૧૧. અસમ્પત્તે ગરું તસ્મિં, ઉગ્ગચ્છત્યરુણો યદિ;

હોતિ નિસ્સગ્ગિયં વત્થં, ન પસ્સમ્ભતિ નિસ્સયો.

૬૧૨. મુહુત્તં વિસ્સમિત્વાન, ગચ્છન્તે દહરે પન;

હોતિ નિસ્સગ્ગિયં વત્થં, પસ્સમ્ભતિ ચ નિસ્સયો.

૬૧૩. સુતા ધમ્મકથા યસ્મિં, ઉગ્ગચ્છત્યરુણો યદિ;

હોતિ નિસ્સગ્ગિયં વત્થં, પસ્સમ્ભતિ ચ નિસ્સયો.

૬૧૪. પચ્ચુદ્ધારે અનાપત્તિ, લદ્ધસમ્મુતિકસ્સપિ;

અન્તોયેવારુણે તં વા, વિસ્સજ્જેતિ વિનસ્સતિ.

૬૧૫. પઠમેન સમાનાવ, સમુટ્ઠાનાદયો નયા;

અપચ્ચુદ્ધરણં એત્થ, અક્રિયાતિ વિસેસિતં.

દુતિયકથિનકથા.

૬૧૬. અકાલચીવરં માસ-પરમં નિક્ખિપે સતિ;

પચ્ચાસાય તતો ઉદ્ધં, ઠપેતું ન ચ વટ્ટતિ.

૬૧૭. દસાહાતિક્કમોયેવ;

પઠમે કથિને ઇધ;

માસસ્સાતિક્કમો વુત્તો;

સેસો તેન સમો મતો.

તતિયકથિનકથા.

૬૧૮. ભિક્ખુ ભિક્ખુનિયા ભુત્તં, વત્થં અઞ્ઞાતિકાય યો;

ધોવાપેતિ રજાપેતિ, આકોટાપેતિ ચે તતો.

૬૧૯. તસ્સ નિસ્સગ્ગિયાપત્તિ, પઠમેન પકાસિતા;

તથા સેસેહિ ચ દ્વીહિ, દીપિતં દુક્કટદ્વયં.

૬૨૦. સિક્ખમાનાય વા હત્થે, ધોવનત્થાય દેતિ ચે;

સા હુત્વા ઉપસમ્પન્ના, પચ્છા ધોવતિ સો નયો.

૬૨૧. સામણેરનિદ્દેસેપિ, લિઙ્ગં ચે પરિવત્તતિ;

ભિક્ખુનીસુપસમ્પજ્જ, ધોતે નિસ્સગ્ગિયં સિયા.