પાચિત્તિયકથા

૮૮૯. સમ્પજાનમુસાવાદે, પાચિત્તિયમુદીરિતં;

દવા રવા ભણન્તસ્સ, ન દોસુમ્મત્તકાદિનો.

૮૯૦. અઞ્ઞત્થાપત્તિયો પઞ્ચ, મુસાવાદસ્સ કારણા;

સમુટ્ઠાનાદયો સબ્બે, અદિન્નાદાનતુલ્યકા.

સમ્પજાનમુસાવાદકથા.

૮૯૧. જાતિઆદીસુ વુત્તેસુ, દસસ્વક્કોસવત્થુસુ;

ભૂતેન વા અભૂતેન, યેન કેનચિ વત્થુના.

૮૯૨. યાય કાયચિ ભાસાય, હત્થમુદ્દાય વા પન;

પારાજિકમનાપન્નં, ભિક્ખુમાપન્નમેવ વા.

૮૯૩. અઞ્ઞત્રઞ્ઞાપદેસેન, ઓમસન્તસ્સ ભિક્ખુનો;

તત્થ પાચિત્તિયાપત્તિ, સમ્બુદ્ધેન પકાસિતા.

૮૯૪. તેહેવઞ્ઞાપદેસેન, પાળિમુત્તપદેહિપિ;

સબ્બત્થાનુપસમ્પન્નં, અક્કોસન્તસ્સ દુક્કટં.

૮૯૫. અનક્કોસિતુકામસ્સ, કેવલં દવકમ્યતા;

વદતો પન સબ્બત્થ, દુબ્ભાસિતમુદીરિતં.

૮૯૬. પવિટ્ઠાનુપસમ્પન્ન-ટ્ઠાને ઇધ ચ ભિક્ખુની;

અનાપત્તિ પુરક્ખત્વા, અત્થધમ્માનુસાસનિં.

૮૯૭. વદતો પન ભિક્ખુસ્સ, સમુટ્ઠાનાદયો નયા;

અનન્તરસમા વુત્તા, દુક્ખા હોતેત્થ વેદના.

ઓમસવાદકથા.

૮૯૮. આપત્તિ ભિક્ખુપેસુઞ્ઞે, દુવિધાકારતો સિયા;

અત્તનો પિયકામસ્સ, પરભેદત્થિનોપિ વા.

૮૯૯. અક્કોસન્તસ્સ પરિયાય-પાળિમુત્તનયેહિ ચ;

વચનસ્સુપસંહારે, હોતિ આપત્તિ દુક્કટં.

૯૦૦. તથા અનુપસમ્પન્ન-અક્કોસં હરતોપિ ચ;

ઠિતા અનુપસમ્પન્ન-ટ્ઠાને ઇધ ચ ભિક્ખુની.

૯૦૧. ન ચેવ પિયકામસ્સ, ન ચ ભેદત્થિનોપિ વા;

પાપાનં ગરહત્થાય, વદન્તસ્સ ચ ભિક્ખુનો.

૯૦૨. તથા ઉમ્મત્તકાદીનં, અનાપત્તીતિ દીપિતા;

સમુટ્ઠાનાદયો સબ્બે, અદિન્નાદાનસાદિસા.

પેસુઞ્ઞકથા.

૯૦૩. ઠપેત્વા ભિક્ખુનિં ભિક્ખું, અઞ્ઞેન પિટકત્તયં;

ધમ્મં સહ ભણન્તસ્સ, તસ્સ પાચિત્તિયં સિયા.

૯૦૪. રાજોવાદાદયો વુત્તા, મહાપચ્ચરિયાદિસુ;

અનારુળ્હેસુ સઙ્ગીતિં, આપત્તિજનકાતિ હિ.

૯૦૫. દુક્કટં હોતિ ભિક્ખુસ્મિં, તથા ભિક્ખુનિયાપિ ચ;

ભિક્ખુસ્સાનુપસમ્પન્ન-સઞ્ઞિનો વિમતિસ્સ વા.

૯૦૬. એકતો ઉદ્દિસાપેતિ, સજ્ઝાયં વા કરોતિ યો;

ભણન્તં પગુણં ગન્થં, ઓપાતેતિ ચ યો પન.

૯૦૭. તસ્સ ચાનુપસમ્પન્ન-સન્તિકે ગણ્હતોપિ ચ;

ઉદ્દેસં તુ અનાપત્તિ, ભણને તેન એકતો.

૯૦૮. વાચતો ચ સમુટ્ઠાતિ, વાચાચિત્તદ્વયાપિ ચ;

સમુટ્ઠાનમિદં વુત્તં, પદસોધમ્મસઞ્ઞિતં.

પદસોધમ્મકથા.

૯૦૯. સબ્બચ્છન્નપરિચ્છન્ને, નિપજ્જેય્ય સચે પન;

યેભુય્યેન પરિચ્છન્ને, છન્ને સેનાસનેપિ વા.

૯૧૦. તિસ્સન્નં પન રત્તીનં, ઉદ્ધં યો પન રત્તિયં;

ઠપેત્વા ભિક્ખું અઞ્ઞેન, તસ્સ પાચિત્તિયં સિયા.

૯૧૧. વત્થું યં પન નિદ્દિટ્ઠં, મેથુનસ્સ પહોનકં;

આપત્યન્તમસો તેન, તિરચ્છાનગતેનપિ.

૯૧૨. નિપન્ને ઉપસમ્પન્ને, ઇતરો ચે નિપજ્જતિ;

ઇતરસ્મિં નિપન્ને વા, સચે ભિક્ખુ નિપજ્જતિ.

૯૧૩. ઉભિન્નં ઉટ્ઠહિત્વા વા, નિપજ્જનપયોગતો;

આપત્તાનુપસમ્પન્ન-ગણનાયપિ વા સિયા.

૯૧૪. સચે પિધાય વા ગબ્ભં, નિપજ્જતિપિધાય વા;

આપત્તત્થઙ્ગતે સૂરિયે, ચતુત્થદિવસે સિયા.

૯૧૫. દિયડ્ઢહત્થુબ્બેધેન, પાકારચયનાદિના;

પરિક્ખિત્તમ્પિ તં સબ્બં, પરિક્ખિત્તન્તિ વુચ્ચતિ.

૯૧૬. ભિક્ખુસ્સન્તમસો દુસ્સ-કુટિયં વસતોપિ ચ;

સહસેય્યાય આપત્તિ, હોતીતિ પરિદીપિતો.

૯૧૭. સબ્બચ્છન્નપરિચ્છન્ન-યેભુય્યાદિપ્પભેદતો;

સત્ત પાચિત્તિયાનેત્થ, દટ્ઠબ્બાનિ સુબુદ્ધિના.

૯૧૮. અડ્ઢચ્છન્નપરિચ્છન્ને, દુક્કટં પરિદીપિતં;

સબ્બચૂળપરિચ્છન્ન-છન્નાદીહિપિ પઞ્ચધા.

૯૧૯. અનાપત્તિ દિરત્તં વા, તિરત્તં વસતો સહ;

અરુણસ્સ પુરેયેવ, તતિયાય ચ રત્તિયા.

૯૨૦. નિક્ખમિત્વા વસન્તસ્સ, પુન સદ્ધિઞ્ચ ભિક્ખુનો;

તથા સબ્બપરિચ્છન્ન-સબ્બચ્છન્નાદિકેપિ ચ.

૯૨૧. એવં અનુપસમ્પન્ને, નિપન્નેપિ નિસીદતો;

સેસા એળકલોમેન, સમુટ્ઠાનાદયો સમા.

સહસેય્યકથા.

૯૨૨. સચે તદહુજાતાય, અપિ યો માનુસિત્થિયા;

સહસેય્યં પકપ્પેય્ય, તસ્સ પાચિત્તિયં સિયા.

૯૨૩. દિસ્સમાનકરૂપાય, યક્ખિયા પેતિયા સહ;

રત્તિયં યો નિપજ્જેય્ય, દેવિયા પણ્ડકેન વા.

૯૨૪. મેથુનવત્થુભૂતાય, તિરચ્છાનગતિત્થિયા;

વત્થૂનં ગણનાયસ્સ, હોતિ આપત્તિ દુક્કટં.

૯૨૫. ઇધેકદિવસેનેવ, આપત્તિ પરિદીપિતા;

સેસો અનન્તરે વુત્ત-સદિસોવ વિનિચ્છયો.

દુતિયસહસેય્યકથા.

૯૨૬. ઉદ્ધં છપ્પઞ્ચવાચાહિ, વિઞ્ઞું પુરિસવિગ્ગહં;

વિના ધમ્મં ભણન્તસ્સ, હોતિ પાચિત્તિ ઇત્થિયા.

૯૨૭. ગાથાપાદો પનેકોવ, એકવાચાતિ સઞ્ઞિતો;

પદસોધમ્મં નિદ્દિટ્ઠં, ધમ્મમટ્ઠકથમ્પિ વા.

૯૨૮. છન્નં ઉપરિ વાચાનં, પદાદીનં વસા પન;

દેસેન્તસ્સ સિયાપત્તિ, પદાદિગણનાય ચ.

૯૨૯. નિમ્મિનિત્વા ઠિતેનાપિ, સદ્ધિં પુરિસવિગ્ગહં;

યક્ખેનપિ ચ પેતેન, તિરચ્છાનગતેનપિ.

૯૩૦. ઠિતસ્સ માતુગામસ્સ, ધમ્મં યો પન ભાસતિ;

છન્નં ઉપરિ વાચાનં, તસ્સ પાચિત્તિયં સિયા.

૯૩૧. પુરિસે ઇત્થિસઞ્ઞિસ્સ, વિમતિસ્સ ચ પણ્ડકે;

ઉત્તરિ છહિ વાચાહિ, વદતો હોતિ દુક્કટં.

૯૩૨. ઇત્થિરૂપં ગહેત્વાન, ઠિતાનં ભાસતોપિ ચ;

દુક્કટં યક્ખિપેતીનં, તિરચ્છાનગતિત્થિયા.

૯૩૩. પુરિસે સતિ વિઞ્ઞુસ્મિં, સયં ઉટ્ઠાય વા પુન;

દેસેન્તસ્સ નિસીદિત્વા, માતુગામસ્સ વા તથા.

૯૩૪. અઞ્ઞિસ્સા પુન અઞ્ઞિસ્સા, ઇત્થિયા ભણતોપિ ચ;

છહિ પઞ્ચહિ વાચાહિ, અનાપત્તિ પકાસિતા.

૯૩૫. પદસોધમ્મતુલ્યાવ, સમુટ્ઠાનાદયો મતા;

અયમેવ વિસેસોતિ, ક્રિયાક્રિયમિદં પન.

ધમ્મદેસનાકથા.

૯૩૬. મહગ્ગતં પણીતં વા, આરોચેન્તસ્સ ભિક્ખુનો;

ઠપેત્વા ભિક્ખુનિં ભિક્ખું, ભૂતે પાચિત્તિયં સિયા.

૯૩૭. નો ચે જાનાતિ સો વુત્તં, આરોચેન્તસ્સ ભિક્ખુનો;

પરિયાયવચને ચસ્સ, હોતિ આપત્તિ દુક્કટં.

૯૩૮. અનાપત્તિ તથારૂપે, કારણે સતિ ભાસતો;

સબ્બસ્સપિ ચ સીલાદિં, વદતો આદિકમ્મિનો.

૯૩૯. ઉમ્મત્તકપદં એત્થ, ન વુત્તં તદસમ્ભવા;

ભૂતારોચનકં નામ, સમુટ્ઠાનમિદં મતં.

૯૪૦. કાયતો વાચતો કાય-વાચતો ચ તિધા સિયા;

કુસલાબ્યાકતેહેવ, દ્વિચિત્તઞ્ચ દ્વિવેદનં.

ભૂતારોચનકથા.

૯૪૧. આપત્તિં પન દુટ્ઠુલ્લં, આરોચેન્તસ્સ ભિક્ખુનો;

આપત્તાનુપસમ્પન્ને, ઠપેત્વા ભિક્ખુસમ્મુતિં.

૯૪૨. સઙ્ઘાદિસેસમાપન્નો, મોચેત્વા અસુચિં અયં;

ઘટેત્વા વત્થુનાપત્તિં, વદન્તસ્સેવ વજ્જતા.

૯૪૩. ઇધ સઙ્ઘાદિસેસાવ, દુટ્ઠુલ્લાપત્તિયો મતા;

તસ્મા સુદ્ધસ્સ દુટ્ઠુલ્લં, વદં પાચિત્તિયં ફુસે.

૯૪૪. અદુટ્ઠુલ્લાય દુટ્ઠુલ્લ-સઞ્ઞિનો વિમતિસ્સ વા;

આપત્તિયોપિ વા સેસા, આરોચેન્તસ્સ દુક્કટં.

૯૪૫. તથા અનુપસમ્પન્ને, દુટ્ઠુલ્લં પઞ્ચધા મતં;

અજ્ઝાચારમદુટ્ઠુલ્લં, આરોચેતું ન વટ્ટતિ.

૯૪૬. વત્થું વા પન આપત્તિં, આરોચેન્તસ્સ કેવલં;

અનાપત્તીતિ ઞાતબ્બં, ભિક્ખુસમ્મુતિયા તથા.

૯૪૭. એવમુમ્મત્તકાદીનં, સમુટ્ઠાનાદયો નયા;

અદિન્નાદાનતુલ્યાવ, વેદના દુક્ખવેદના.

દુટ્ઠુલ્લારોચનકથા.

૯૪૮. ખણેય્ય વા ખણાપેય્ય, પથવિં યો અકપ્પિયં;

ભેદાપેય્ય ચ ભિન્દેય્ય, તસ્સ પાચિત્તિયં સિયા.

૯૪૯. સયમેવ ખણન્તસ્સ, પથવિં પન ભિક્ખુનો;

પહારસ્મિં પહારસ્મિં, પાચિત્તિયમુદીરિતં.

૯૫૦. આણાપેન્તસ્સ એકાવ, દિવસં ખણતોપિ ચ;

પુનપ્પુનાણાપેન્તસ્સ, વાચતો વાચતો સિયા.

૯૫૧. ‘‘ખણ પોક્ખરણિં વાપિં, આવાટં ખણ કૂપકં’’;

ઇચ્ચેવં તુ વદન્તસ્સ, કોચિ દોસો ન વિજ્જતિ.

૯૫૨. ‘‘ઇમં ખણ ચ ઓકાસં, ઇધ પોક્ખરણિં ખણ;

ઇમસ્મિં ખણ ઓકાસે’’, વત્તુમેવં ન વટ્ટતિ.

૯૫૩. ‘‘કન્દં ખણ કુરુન્દં વા, થૂણં ખણ ચ ખાણુકં;

મૂલં ખણ ચ તાલં વા’’, એવં વદતિ વટ્ટતિ.

૯૫૪. ‘‘ઇમં મૂલં ઇમં વલ્લિં, ઇમં તાલં ઇમં નળં;

ખણા’’તિ નિયમેત્વાન, વત્તું પન ન વટ્ટતિ.

૯૫૫. ઉસ્સિઞ્ચિતું સચે સક્કા, ઘટેહિ તનુકદ્દમો;

ભિક્ખુના અપનેતબ્બો, બહલં ન ચ વટ્ટતિ.

૯૫૬. ભિજ્જિત્વા નદિયાદીનં, પતિતં તોયસન્તિકે;

તટં વટ્ઠં વિકોપેતું, ચાતુમાસમ્પિ વટ્ટતિ.

૯૫૭. સચે પતતિ તોયસ્મિં, દેવે વુટ્ઠેપિ વટ્ટતિ;

ચાતુમાસમતિક્કન્તે, તોયે દેવો હિ વસ્સતિ.

૯૫૮. પાસાણપિટ્ઠિયં સોણ્ડિં, ખણન્તિ યદિ તત્થ તુ;

રજં પતતિ ચે પુબ્બં, પચ્છા દેવોભિવસ્સતિ.