૪. પાચિત્તિયકણ્ડં

૧. લસુણવગ્ગો

૧. પઠમલસુણાદિસિક્ખાપદવણ્ણના

૭૯૭. પાચિત્તિયેસુ લસુણવગ્ગસ્સ પઠમે બદરસાળવં નામ બદરફલાનિ સુક્ખાપેત્વા તેહિ કત્તબ્બબ્યઞ્જનવિકતિ. આમકમાગધલસુણઞ્ચેવ, અજ્ઝોહરણઞ્ચાતિ દ્વે અઙ્ગાનિ.

૭૯૯-૮૧૨. દુતિયાદીનિ ઉત્તાનત્થાનિ.

૮૧૫. છટ્ઠે પાળિયં આસુમ્ભિત્વાતિ પાતેત્વા.

૮૧૭. દધિમત્થૂતિ દધિમ્હિ પસન્નોદકં. રસખીરાદીનન્તિ મંસરસખીરાદીનં. ભુઞ્જન્તસ્સ ભિક્ખુનો હત્થપાસે ઠાનં, પાનીયસ્સ વા વિધૂપનસ્સ વા ગહણન્તિ દ્વે અઙ્ગાનિ.

૮૨૨. સત્તમે અવિઞ્ઞત્તિયા લદ્ધન્તિ અત્તનો વિઞ્ઞત્તિં વિના લદ્ધં. પુબ્બાપરવિરુદ્ધન્તિ સયં કરણે પાચિત્તિયન્તિ ઇદં કારાપને દુક્કટવચનેન વિરુજ્ઝનં સન્ધાય વુત્તં. તેનાહ ‘‘ન હી’’તિઆદિ, ‘‘અવિઞ્ઞત્તિયા લદ્ધ’’ન્તિઆદિવચનેન વા વિરુજ્ઝનં સન્ધાય વુત્તં. અઞ્ઞાય વિઞ્ઞત્તિપિ હિ ઇમિસ્સા અવિઞ્ઞત્તિયા લદ્ધમેવાતિ. આમકધઞ્ઞવિઞ્ઞાપનાદિ, તં ભજ્જનાદિના અજ્ઝોહરણન્તિ દ્વે અઙ્ગાનિ.

૮૨૪. અટ્ઠમે નિબ્બિટ્ઠોતિ લદ્ધો. કેણીતિ રઞ્ઞો દાતબ્બો આયો, આયુપ્પત્તિટ્ઠાનન્તિ અત્થો. તેનાહ ‘‘એકં ઠાનન્તર’’ન્તિઆદિ. ઠાનન્તરન્તિ ચ ગામજનપદાણાયત્તં. વળઞ્જિયમાનતિરોકુટ્ટાદિતા, અનપલોકેત્વા ઉચ્ચારાદીનં છડ્ડનાદીતિ દ્વે અઙ્ગાનિ.

૮૩૦. નવમે ‘‘મત્થકચ્છિન્નનાળિકેરમ્પી’’તિ વુત્તત્તા હરિતૂપરિ છડ્ડનમેવ પટિક્ખિત્તં. તેનાહ ‘‘અનિક્ખિત્તબીજેસૂ’’તિઆદિ. યત્થ ચ છડ્ડેતું વટ્ટતિ, તત્થ હરિતે વચ્ચાદિં કાતુમ્પિ વટ્ટતિ એવ. સબ્બેસન્તિ ભિક્ખુભિક્ખુનીનં.

૮૩૬-૭. દસમે તેસંયેવાતિ યેસં નિચ્ચં પસ્સતિ. આરામે ઠત્વાતિ ઠિતનિસન્નટ્ઠાને એવ ઠત્વા સમન્તતો ગીવં પરિવત્તેત્વાપિ પસ્સતિ, અનાપત્તિ. ઠિતટ્ઠાનતો ગન્ત્વા પસ્સિતું ન વટ્ટતિ. કેચિ પન ‘‘વટ્ટતી’’તિ વદન્તિ. તં પન ‘‘દસ્સનાય ગચ્છેય્ય, પાચિત્તિય’’ન્તિ સામઞ્ઞતો ગમનસ્સ પટિક્ખિત્તત્તા, અનાપત્તિયમ્પિ ગમનાય અવુત્તત્તા ચ ન ગહેતબ્બં. નચ્ચાદિતા, અનનુઞ્ઞાતકારણા ગમનં, દસ્સનાદિ ચાતિ તીણિ અઙ્ગાનિ.

નિટ્ઠિતો લસુણવગ્ગો પઠમો.

૨. અન્ધકારવગ્ગો

૧. પઠમાદિસિક્ખાપદવણ્ણના

૮૪૧. દુતિયવગ્ગસ્સ પઠમે દાને વાતિ દાનનિમિત્તં. રત્તન્ધકારે પુરિસસ્સ હત્થપાસે ઠાનાદિ, રહોપેક્ખા, સહાયાભાવોતિ તીણિ અઙ્ગાનિ.

૮૪૨-૮૫૦. દુતિયાદીનિ ઉત્તાનાનિ.

૮૫૪. પઞ્ચમે પલ્લઙ્કસ્સ અનોકાસેતિ ઊરુબદ્ધાસનસ્સ અપ્પહોનકે. પુરેભત્તં અન્તરઘરે પલ્લઙ્કપ્પહોનકાસને નિસજ્જા, અનનુઞ્ઞાતકારણા અનાપુચ્છા વુત્તપરિચ્છેદાતિક્કમોતિ દ્વે અઙ્ગાનિ.

૮૬૦-૮૭૯. છટ્ઠાદીનિ ઉત્તાનાનિ.

નિટ્ઠિતો અન્ધકારવગ્ગો દુતિયો.

૩. નગ્ગવગ્ગો

૧. પઠમાદિસિક્ખાપદવણ્ણના

૮૮૩-૮૮૭. તતિયવગ્ગસ્સ પઠમદુતિયાનિ ઉત્તાનાનિ.

૮૯૩. તતિયે વિસિબ્બેત્વાતિ વિજટેત્વા. ધુરં નિક્ખિત્તમત્તેતિ વિસિબ્બનદિવસતો પઞ્ચ દિવસે અતિક્કામેત્વા ધુરં નિક્ખિત્તમત્તે. અન્તોપઞ્ચાહે પન ધુરનિક્ખેપેપિ અનાપત્તિ એવ ‘‘અઞ્ઞત્ર ચતૂહપઞ્ચાહા’’તિ વુત્તત્તા. ઉપસમ્પન્નાય ચીવરં સિબ્બનત્થાય વિસિબ્બેત્વા પઞ્ચહાતિક્કમો, અનનુઞ્ઞાતકારણા ધુરનિક્ખેપોતિ દ્વે અઙ્ગાનિ.

૯૦૦. ચતુત્થે પઞ્ચન્નં ચીવરાનં અપરિવત્તનં, અનનુઞ્ઞાતકારણા પઞ્ચાહાતિક્કમોતિ દ્વે અઙ્ગાનિ.

૯૦૩. પઞ્ચમં ઉત્તાનમેવ.

૯૦૯. છટ્ઠે વિકપ્પનુપગસ્સ સઙ્ઘે પરિણતતા, વિના આનિસંસદસ્સનેન અન્તરાયકરણન્તિ દ્વે અઙ્ગાનિ.

૯૧૧. સત્તમં ઉત્તાનમેવ.

૯૧૬. અટ્ઠમે કુમ્ભથૂણં નામ કુમ્ભસદ્દો, તેન કીળન્તીતિ કુમ્ભથૂણિકા. તેનાહ ‘‘ઘટકેન કીળનકા’’તિ. દીઘનિકાયટ્ઠકથાયં પન ‘‘ચતુરસ્સઅમ્બણકતાળ’’ન્તિ વુત્તં. તઞ્હિ રુક્ખસારાદિમયં અન્તોછિદ્દં ચતૂસુ પસ્સેસુ ચમ્મોનદ્ધં વાદિતભણ્ડં, યં ‘‘બિમ્બિસક’’ન્તિપિ વુચ્ચતિ, તં વાદેન્તાપિ કુમ્ભથૂણિકા. તેનાહ ‘‘બિમ્બિસકવાદિતકાતિપિ વદન્તી’’તિ.

૯૧૮. પાળિયં કપ્પકતન્તિ કપ્પકતં નિવાસનપારુપનૂપગં. સમણચીવરતા, અનનુઞ્ઞાતાનં દાનન્તિ દ્વે અઙ્ગાનિ.

૯૨૧-૯૩૧. નવમદસમાનિ ઉત્તાનાનેવ.

નિટ્ઠિતો નગ્ગવગ્ગો તતિયો.

૪. તુવટ્ટવગ્ગો

૧૦. દસમસિક્ખાપદવણ્ણના

૯૭૬. તુવટ્ટવગ્ગસ્સ દસમે ચારિકાય અપક્કમનં પણ્ણત્તિવજ્જમેવ. પણ્ણત્તિવિજાનનચિત્તેન સચિત્તકતં સન્ધાય પનેત્થ ‘‘લોકવજ્જ’’ન્તિ દટ્ઠબ્બં. સેસં સબ્બત્થ ઉત્તાનમેવ.

નિટ્ઠિતો તુવટ્ટવગ્ગો ચતુત્થો.

૫. ચિત્તાગારવગ્ગો

૧. પઠમાદિસિક્ખાપદવણ્ણના

૯૭૮. ચિત્તાગારવગ્ગસ્સ પઠમે પાટેક્કા આપત્તિયોતિ ગીવાય પરિવત્તનપ્પયોગગણનાય.

૧૦૧૫. નવમે હત્થિઆદીસુ સિપ્પ-સદ્દો પચ્ચેકં યોજેતબ્બો, તથા આથબ્બણાદીસુ મન્ત-સદ્દો. તત્થ આથબ્બણમન્તો નામ આથબ્બણવેદવિહિતો પરૂપઘાતકરો મન્તો. ખીલનમન્તો નામ વેરિમારણત્થાય સારદારુમયં ખીલં મન્તેત્વા પથવિયં આકોટનમન્તો. અગદપ્પયોગો વિસપ્પયોજનં. નાગમણ્ડલન્તિ સપ્પાનં પવેસનિવારણત્થં મણ્ડલબન્ધમન્તો. સેસં સબ્બત્થ ઉત્તાનમેવ.

નિટ્ઠિતો ચિત્તાગારવગ્ગો પઞ્ચમો.

૧૦૨૫-૧૧૧૬. આરામવગ્ગે, ગબ્ભિનિવગ્ગે ચ સબ્બં ઉત્તાનમેવ.

૮. કુમારિભૂતવગ્ગો

૧. પઠમાદિસિક્ખાપદવણ્ણના

૧૧૧૯. અટ્ઠમવગ્ગસ્સ પઠમે સબ્બપઠમા દ્વે મહાસિક્ખમાનાતિ ગબ્ભિનિવગ્ગે (પાચિ. ૧૦૬૭ આદયો) સબ્બપઠમં વુત્તા દ્વે. સિક્ખમાના ઇચ્ચેવ વત્તબ્બાતિ સમ્મુતિકમ્માદીસુ અઞ્ઞથા વુત્તે કમ્મં કુપ્પતીતિ અધિપ્પાયો.

૧૧૬૭. એકાદસમે પારિવાસિયેન છન્દદાનેનાતિ પરિવુત્થેન નવિકપ્પવુત્થેન વિગતેન છન્દદાનેનાતિ અત્થો, છન્દવિસ્સજ્જનમત્તેન વા.

૧૧૬૮. ‘‘વુટ્ઠિતાયા’’તિ એતેન ‘‘ઇદાનિ કમ્મં ન કરિસ્સામા’’તિ ધુરં નિક્ખિપિત્વા કાયેન અવુટ્ઠહિત્વા નિસિન્નાયપિ પરિસાય કમ્મં કાતું ન વટ્ટતીતિ દસ્સેતિ. તેનાહ ‘‘છન્દં અવિસ્સજ્જેત્વા અવુટ્ઠિતાયા’’તિ. પાળિયં પન ‘‘અનાપત્તિ અવુટ્ઠિતાય પરિસાયા’’તિ સામઞ્ઞતો વુત્તત્તા, ઉપોસથક્ખન્ધકે ચ ‘‘ન, ભિક્ખવે, પારિવાસિકપારિસુદ્ધિદાનેન ઉપોસથો કાતબ્બો અઞ્ઞત્ર અવુટ્ઠિતાય પરિસાયા’’તિ (મહાવ. ૧૮૩) વુત્તત્તા, તદટ્ઠકથાયમ્પિ ‘‘પારિવાસિયપારિસુદ્ધિદાનં નામ પરિસાય વુટ્ઠિતકાલતો પટ્ઠાય ન વટ્ટતિ, અવુટ્ઠિતાય પન વટ્ટતી’’તિ (મહાવ. અટ્ઠ. ૧૮૩) વુત્તત્તા ચ ‘‘કમ્મં ન કરિસ્સામી’’તિ ધુરં નિક્ખિપિત્વા નિસિન્નાયપિ કમ્મં કાતું વટ્ટતીતિ ગહેતબ્બં. સેસં ઉત્તાનમેવ.

નિટ્ઠિતો કુમારિભૂતવગ્ગો અટ્ઠમો.

૧૧૮૧. છત્તવગ્ગો ઉત્તાનો એવ.

ખુદ્દકવણ્ણનાનયો નિટ્ઠિતો.