૮. ચીવરક્ખન્ધકો

જીવકવત્થુકથાદિવણ્ણના

૩૨૯. ચીવરક્ખન્ધકે કમ્મવિપાકન્તિ કમ્મપચ્ચયઉતુચિત્તાહારસમુટ્ઠિતં અપ્પટિબાહિયરોગં સન્ધાય વુત્તં કમ્મજસ્સ રોગસ્સ અભાવા.

૩૩૦. પાળિયં સંયમસ્સાતિ સઙ્ગહણસ્સ. અવિસજ્જનસ્સાતિ અત્થો ‘‘યો સંયમો સો વિનાસો’’તિઆદીસુ (પે. વ. ૨૩૭) વિય. એતસ્સ સંયમસ્સ ફલં ઉપજાનામાતિ યોજના. તમેવ ફલં દસ્સેન્તી આહ ‘‘વરમેતં…પે… આસિત્ત’’ન્તિ. કેચિ પન ‘‘સંયમસ્સાતિ આનિસંસસ્સ, ઉપયોગત્થે ચેતં સામિવચન’’ન્તિ (સારત્થ. ટી. મહાવગ્ગ ૩.૩૨૯-૩૩૦) અત્થં વદન્તિ.

૩૩૬. ઉસ્સન્નદોસોતિ સઞ્જાતપિત્તાદિદોસો. સબ્બત્થાતિ સકલસરીરે.

૩૩૭. મહાપિટ્ઠિયકોજવન્તિ હત્થિપિટ્ઠિયં અત્થરિતબ્બતાય ‘‘મહાપિટ્ઠિય’’ન્તિ લદ્ધસમઞ્ઞં ઉણ્ણામયત્થરણં.

૩૩૮-૯. ઉપડ્ઢકાસિનં ખમમાનન્તિ અડ્ઢકાસિઅગ્ઘનકં. પાળિયં કિં નુ ખોતિ કતમં નુ ખો.

૩૪૦-૩૪૨. ઉપચારેતિ સુસાનસ્સ આસન્ને પદેસે. છડ્ડેત્વા ગતાતિ કિઞ્ચિ અવત્વા એવ છડ્ડેત્વા ગતા, એતેન ‘‘ભિક્ખૂ ગણ્હન્તૂ’’તિ છડ્ડિતે એવ અકામા ભાગદાનં વિહિતં, કેવલં છડ્ડિતે પન કતિકાય અસતિ એકતો બહૂસુ પવિટ્ઠેસુ યેન ગહિતં, તેન અકામભાગો ન દાતબ્બોતિ દસ્સેતિ. સમાના દિસા પુરત્થિમાદિભેદા એતેસન્તિ સદિસાતિ આહ ‘‘એકદિસાય વા ઓક્કમિંસૂ’’તિ. ધુરવિહારટ્ઠાનેતિ વિહારસ્સ સમ્મુખટ્ઠાને.

જીવકવત્થુકથાદિવણ્ણના નિટ્ઠિતા.

ભણ્ડાગારસમ્મુતિઆદિકથાવણ્ણના

૩૪૩. વિહારમજ્ઝેતિ સબ્બેસં જાનનત્થાય વુત્તં. વણ્ણાવણ્ણં કત્વાતિ પટિવીસપ્પહોનકતાજાનનત્થં હલિદ્દિયાદીહિ ખુદ્દકમહન્તવણ્ણેહિ યુત્તે સમે કોટ્ઠાસે કત્વા. તેનાહ ‘‘સમે પટિવીસે ઠપેત્વા’’તિ. ઇદન્તિ સામણેરાનં ઉપડ્ઢપટિવીસદાનં. ફાતિકમ્મન્તિ પહોનકકમ્મં. યત્તકેન વિનયાગતેન સમ્મુઞ્જનીબન્ધનાદિહત્થકમ્મેન વિહારસ્સ ઊનકતા ન હોતિ, તત્તકં કત્વાતિ અત્થો. સબ્બેસન્તિ તત્રુપ્પાદવસ્સાવાસિકં ગણ્હન્તાનં સબ્બેસં ભિક્ખૂનં, સામણેરાનઞ્ચ. ભણ્ડાગારિકચીવરેપીતિ અકાલચીવરં સન્ધાય વુત્તં. એતન્તિ ઉક્કુટ્ઠિયા કતાય સમભાગદાનં. વિરજ્ઝિત્વા કરોન્તીતિ કત્તબ્બકાલેસુ અકત્વા યથારુચિતક્ખણે કરોન્તિ.

એત્તકેન મમ ચીવરં પહોતીતિ દ્વાદસગ્ઘનકેનેવ મમ ચીવરં પરિપુણ્ણં હોતિ, ન તતો ઊનેનાતિ સબ્બં ગહેતુકામોતિ અત્થો.

ભણ્ડાગારસમ્મુતિઆદિકથાવણ્ણના નિટ્ઠિતા.

ચીવરરજનકથાદિવણ્ણના

૩૪૪. એવઞ્હિ કતેતિ વટ્ટાધારસ્સ અન્તો રજનોદકં, બહિ છલ્લિકઞ્ચ કત્વા વિયોજને કતે. ન ઉત્તરતીતિ કેવલં ઉદકતો ફેણુટ્ઠાનાભાવા ન ઉત્તરતિ. રજનકુણ્ડન્તિ પક્કરજનટ્ઠપનકં મહાઘટં.

૩૪૫. અનુવાતાદીનં દીઘપત્તાનન્તિ આયામતો, વિત્થારતો ચ અનુવાતં. આદિ-સદ્દેન દ્વિન્નં ખન્ધાનં અન્તરા માતિકાકારેન ઠપિતપત્તઞ્ચ ‘‘દીઘપત્ત’’ન્તિ દટ્ઠબ્બં. આગન્તુકપત્તન્તિ દિગુણચીવરસ્સ ઉપરિ અઞ્ઞં પટ્ટં અપ્પેન્તિ, તં સન્ધાય વુત્તં. તં કિર ઇદાનિ ન કરોન્તિ.

૩૪૬. પાળિયં નન્દિમુખિયાતિ તુટ્ઠિમુખિયા, પસન્નદિસામુખાયાતિ અત્થો.

૩૪૮. અચ્છુપેય્યન્તિ પતિટ્ઠપેય્યં. હતવત્થકાનન્તિ પુરાણવત્થાનં. અનુદ્ધરિત્વાવાતિ અગ્ગળે વિય દુબ્બલટ્ઠાનં અનપનેત્વાવ.

૩૪૯-૩૫૧. વિસાખવત્થુમ્હિ કલ્લકાયાતિ અકિલન્તકાયા. ગતીતિ ઞાણગતિ અધિગમો. અભિસમ્પરાયોતિ ‘‘સકિદેવ ઇમં લોકં આગન્ત્વા દુક્ખસ્સન્તં કરોતી’’તિઆદિના (સં. નિ. ૫.૧૦૪૮) વુત્તો ઞાણાભિસમ્પરાયો, મગ્ગઞાણયુત્તેહિ ગન્તબ્બગતિવિસેસોતિ અત્થો. તં ભગવા બ્યાકરિસ્સતિ. ‘‘દદાતિ દાન’’ન્તિ ઇદં અન્નપાનવિરહિતાનં સેસપચ્ચયાનં દાનવસેન વુત્તં. સોવગ્ગિકન્તિ સગ્ગસંવત્તનિકં.

૩૫૯. અટ્ઠપદકચ્છન્નેનાતિ અટ્ઠપદકસઙ્ખાતજૂતફલકલેખાસણ્ઠાનેન.

૩૬૨. પાળિયં નદીપારં ગન્તુન્તિ ભિક્ખુનો નદીપારગમનં હોતીતિ અત્થો. અગ્ગળગુત્તિયેવ પમાણન્તિ ઇમેહિ ચતૂહિ નિક્ખેપકારણેહિ ઠપેન્તેનપિ અગ્ગળગુત્તિવિહારે એવ ઠપેતું વટ્ટતીતિ અધિપ્પાયો. નિસ્સીમાગતન્તિ વસ્સાનસઙ્ખાતં કાલસીમં અતિક્કન્તં, તં વસ્સિકસાટિકચીવરં ન હોતીતિ અત્થો.

ચીવરરજનકથાદિવણ્ણના નિટ્ઠિતા.

સઙ્ઘિકચીવરુપ્પાદકથાવણ્ણના

૩૬૩. પઞ્ચ માસેતિ અચ્ચન્તસંયોગે ઉપયોગવચનં. વડ્ઢિં પયોજેત્વા ઠપિતઉપનિક્ખેપતોતિ વસ્સાવાસિકસ્સત્થાય દાયકેહિ વડ્ઢિં પયોજેત્વા ઠપિતઉપનિક્ખેપતો. ‘‘ઇધ વસ્સંવુત્થસઙ્ઘસ્સા’’તિ ઇદં અભિલાપમત્તં. ઇધ-સદ્દં પન વિના ‘‘વસ્સંવુત્થસઙ્ઘસ્સ દેમા’’તિ વુત્તેપિ સો એવ નયો. અનત્થતકથિનસ્સાપિ પઞ્ચ માસે પાપુણાતીતિ વસ્સાવાસિકલાભવસેન ઉપ્પન્નત્તા અનત્થતકથિનસ્સાપિ વુત્થવસ્સસ્સ પઞ્ચ માસે પાપુણાતિ. વક્ખતિ હિ ‘‘ચીવરમાસતો પટ્ઠાય યાવ હેમન્તસ્સ પચ્છિમો દિવસો, તાવ વસ્સાવાસિકં દેમાતિ વુત્તે કથિનં અત્થતં વા હોતુ અનત્થતં વા, અતીતવસ્સંવુત્થાનમેવ પાપુણાતી’’તિ (મહાવ. અટ્ઠ. ૩૭૯). તતો પરન્તિ પઞ્ચમાસતો પરં, ગિમ્હાનસ્સ પઠમદિવસતો પટ્ઠાયાતિ અત્થો. ‘‘કસ્મા? પિટ્ઠિસમયે ઉપ્પન્નત્તા’’તિ ઇદં ‘‘ઉદાહુ અનાગતવસ્સે’’તિ ઇમસ્સાનન્તરં દટ્ઠબ્બં. પોત્થકેસુ પન ‘‘અનત્થતકથિનસ્સાપિ પઞ્ચ માસે પાપુણાતી’’તિ ઇમસ્સાનન્તરં ‘‘કસ્મા પિટ્ઠિસમયે ઉપ્પન્નત્તા’’તિ ઇદં લિખન્તિ, તં પમાદલિખિતં પિટ્ઠિસમયે ઉપ્પન્નં સન્ધાય ‘‘અનત્થતકથિનસ્સાપી’’તિ વત્તબ્બતો. વુત્થવસ્સે હિ સન્ધાય ‘‘અનત્થતકથિનસ્સાપી’’તિ વુત્તં, ન ચ પિટ્ઠિસમયે ઉપ્પન્નં વુત્થવસ્સસ્સેવ પાપુણાતીતિ સમ્મુખીભૂતાનં સબ્બેસમ્પિ પાપુણનતો. તેનેવ વક્ખતિ ‘‘સચે પન ગિમ્હાનં પઠમદિવસતો પટ્ઠાય એવં વદતિ, તત્ર સમ્મુખીભૂતાનં સબ્બેસં પાપુણાતિ. કસ્મા? પિટ્ઠિસમયે ઉપ્પન્નત્તા’’તિ (મહાવ. અટ્ઠ. ૧૭૯).

દુગ્ગહિતાનીતિ અગ્ગહિતાનિ. સઙ્ઘિકાનેવાતિ અત્થો. ઇતોવાતિ થેરાનં દાતબ્બતોવ, ઇદાનેવાતિ વા અત્થો.

સઙ્ઘિકચીવરુપ્પાદકથાવણ્ણના નિટ્ઠિતા.

ઉપનન્દસક્યપુત્તવત્થુકથાવણ્ણના

૩૬૪. ‘‘સત્તાહવારેન અરુણમેવ ઉટ્ઠાપેતી’’તિ ઇદં નાનાસીમાવિહારેસુ કત્તબ્બનયેન એકસ્મિમ્પિ વિહારે દ્વીસુ સેનાસનેસુ નિવુત્થભાવદસ્સનત્થં વુત્તં, અરુણુટ્ઠાપનેનેવ તત્થ વુત્થો હોતિ, ન પન વસ્સચ્છેદપરિહારાય. અન્તોઉપચારસીમાયપિ યત્થ કત્થચિ અરુણં ઉટ્ઠાપેન્તો અત્તના ગહિતસેનાસનં અપ્પવિટ્ઠોપિ વુત્થવસ્સો એવ હોતિ, ગહિતસેનાસને પન નિવુત્થો નામ ન હોતિ, તત્થ ચ અરુણુટ્ઠાપને પન સતિ હોતિ. તેનાહ ‘‘પુરિમસ્મિં બહુતરં નિવસતિ નામા’’તિ, એતેન ચ ઇતરસ્મિં સત્તાહવારેનાપિ અરુણુટ્ઠાપને સતિ એવ અપ્પકતરં નિવસતિ નામ હોતિ, નાસતીતિ દીપિતં હોતિ. નાનાલાભેહીતિ વિસું વિસું નિબદ્ધવસ્સાવાસિકલાભેહિ. નાનૂપચારેહીતિ નાનાપરિક્ખેપનાનાદ્વારેહિ. એકસીમાવિહારેહીતિ દ્વિન્નં વિહારાનં એકેન પાકારેન પરિક્ખિત્તત્તા એકાય ઉપચારસીમાય અન્તોગતેહિ દ્વીહિ વિહારેહિ. સેનાસનગ્ગાહો પટિપ્પસ્સમ્ભતીતિ પઠમં ગહિતો પટિપ્પસ્સમ્ભતિ. તત્થાતિ યત્થ સેનાસનગ્ગાહો પટિપ્પસ્સદ્ધો, તત્થ.

ઉપનન્દસક્યપુત્તવત્થુકથાવણ્ણના નિટ્ઠિતા.

ગિલાનવત્થુકથાવણ્ણના

૩૬૫-૬. ભૂમિયં પરિભણ્ડં અકાસીતિ ગિલાનેન નિપન્નભૂમિયં કિલિટ્ઠટ્ઠાનં ધોવિત્વા હરિતૂપલિત્તં કારેસીતિ અત્થો. ભેસજ્જં યોજેતું અસમત્થોતિ પરેહિ વુત્તવિધિમ્પિ કાતું અસમત્થો. પાળિયં ગિલાનુપટ્ઠાકાનં ચીવરદાને સામણેરાનં તિચીવરાધિટ્ઠાનાભાવા ‘‘ચીવરઞ્ચ પત્તઞ્ચા’’તિઆદિ સબ્બત્થ વુત્તં. સચેપિ સહસ્સં અગ્ઘતિ, ગિલાનુપટ્ઠાકાનઞ્ઞેવ દાતબ્બન્તિ સમ્બન્ધો.

ગિલાનવત્થુકથાવણ્ણના નિટ્ઠિતા.

મતસન્તકકથાદિવણ્ણના

૩૬૯. અઞ્ઞન્તિ ચીવરપત્તતો અઞ્ઞં. અપ્પગ્ઘન્તિ અતિજિણ્ણાદિભાવેન નિહીનં. તતોતિ અવસેસપરિક્ખારતો. સબ્બન્તિ પત્તં, તિચીવરઞ્ચ.

તત્થ તત્થ સઙ્ઘસ્સેવાતિ તસ્મિં તસ્મિં વિહારે સઙ્ઘસ્સેવ. પાળિયં અવિસ્સજ્જિકં અવેભઙ્ગિકન્તિ આગતાનાગતસ્સ ચાતુદ્દિસસ્સ સઙ્ઘસ્સેવ સન્તકં હુત્વા કસ્સચિ અવિસ્સજ્જિકં અવેભઙ્ગિકં ભવિતું અનુજાનામીતિ અત્થો.

૩૭૧-૨. અક્કનાળમયન્તિ અક્કદણ્ડમયં. અક્કદુસ્સાનીતિ અક્કવાકેન કતદુસ્સાનિ, પોત્થકગતિકાનિ દુક્કટવત્થુકાનીતિ અત્થો. દુપટ્ટચીવરસ્સ વા મજ્ઝેતિ યં નિટ્ઠિતે તિપટ્ટચીવરં હોતિ, તસ્સ મજ્ઝે પટલં કત્વા દાતબ્બાનીતિ અત્થો.

૩૭૪. ‘‘સન્તે પતિરૂપે ગાહકે’’તિ વુત્તત્તા ગાહકે અસતિ અદત્વા ભાજિતેપિ સુભાજિતમેવાતિ દટ્ઠબ્બં.

૩૭૬. દક્ખિણોદકં પમાણન્તિ ‘‘એત્તકાનિ ચીવરાનિ દસ્સામી’’તિ પઠમં ઉદકં પાતેત્વા પચ્છા દેન્તિ. તં યેહિ ગહિતં, તે ભાગિનોવ હોન્તીતિ અધિપ્પાયો. પરસમુદ્દેતિ જમ્બુદીપે. તમ્બપણ્ણિદીપઞ્હિ ઉપાદાયેસ એવં વુત્તો.

મતસન્તકકથાદિવણ્ણના નિટ્ઠિતા.

અટ્ઠચીવરમાતિકાકથાવણ્ણના

૩૭૯. પુગ્ગલાધિટ્ઠાનનયેન વુત્તન્તિ ‘‘સીમાય દાન’’ન્તિઆદિના વત્તબ્બે ‘‘સીમાય દેતી’’તિઆદિ પુગ્ગલાધિટ્ઠાનેન વુત્તં. ‘‘અપિચા’’તિઆદિના પઠમલેડ્ડુપાતભૂતપરિક્ખેપારહટ્ઠાનતો બહિ દુતિયલેડ્ડુપાતોપિ ઉપચારસીમા એવાતિ દસ્સેતિ. ધુવસન્નિપાતટ્ઠાનાદિકમ્પિ પરિયન્તે ઠિતમેવ ગહેતબ્બં. લોકે ગામસીમાદયો વિય લાભસીમા નામ વિસું પસિદ્ધા નામ નત્થિ, કેનાયં અનુઞ્ઞાતાતિ આહ ‘‘નેવ સમ્માસમ્બુદ્ધેના’’તિઆદિ. એતેન નાયં સાસનવોહારસિદ્ધા, લોકવોહારસિદ્ધા એવાતિ દસ્સેતિ. ‘‘જનપદપરિચ્છેદો’’તિ ઇદં લોકપસિદ્ધસીમાસદ્દત્થવસેન વુત્તં. પરિચ્છેદબ્ભન્તરં પન સબ્બં જનપદસીમાતિ ગહેતબ્બં, જનપદો એવ જનપદસીમા. એવં રટ્ઠસીમાદીસુપિ. તેનાહ ‘‘આણાપવત્તિટ્ઠાન’’ન્તિઆદિ.

પથવીવેમજ્ઝે ગતસ્સાતિ યાવ ઉદકપરિયન્તા ખણ્ડસીમત્તા વુત્તં, ઉપચારસીમાદીસુ પન અબદ્ધસીમાસુ હેટ્ઠાપથવિયં સબ્બત્થ ઠિતાનં ન પાપુણાતિ, કૂપાદિપવેસારહટ્ઠાને ઠિતાનઞ્ઞેવ પાપુણાતીતિ હેટ્ઠા સીમાકથાયં વુત્તનયેન તંતંસીમટ્ઠભાવો વેદિતબ્બો. ચક્કવાળસીમાય પન દિન્નં પથવીસન્ધારકઉદકટ્ઠાનેપિ ઠિતાનં પાપુણાતિ સબ્બત્થ ચક્કવાળવોહારત્તા.

બુદ્ધાધિવુત્થોતિ બુદ્ધેન ભગવતા નિવુત્થો. પાકવટ્ટન્તિ નિબદ્ધદાનં. વત્તતીતિ પવત્તતિ. તેહીતિ યેસં સમ્મુખે એસ દેતિ, તેહિ ભિક્ખૂહિ. દુતિયભાગે પન થેરાસનં આરુળ્હેતિ યાવ સઙ્ઘનવકા એકવારં સબ્બેસં ભાગં દત્વા ચીવરે અપરિક્ખીણે પુન સબ્બેસં દાતું દુતિયભાગે થેરસ્સ દિન્નેતિ અત્થો. પંસુકૂલિકાનમ્પિ વટ્ટતીતિ એત્થ ‘‘તુય્હં દેમા’’તિ અવુત્તત્તાતિ કારણં વદન્તિ. યદિ એવં ‘‘સઙ્ઘસ્સ દેમા’’તિ વુત્તેપિ વટ્ટેય્ય, ‘‘ભિક્ખૂનં દેમ, થેરાનં દેમ, સઙ્ઘસ્સ દેમા’’તિ (મહાવ. અટ્ઠ. ૩૭૯) વચનતો ભેદો ન દિસ્સતિ. વીમંસિતબ્બમેત્થ કારણં.

પારુપિતું વટ્ટતીતિ પંસુકૂલિકાનં વટ્ટતિ. ભિક્ખુસઙ્ઘસ્સ ચ ભિક્ખુનીનઞ્ચ દમ્મીતિ વુત્તે પન ન મજ્ઝે ભિન્દિત્વા દાતબ્બન્તિ એત્થ યસ્મા ભિક્ખુનિપક્ખે સઙ્ઘસ્સ પચ્ચેકં અપરામટ્ઠત્તા ભિક્ખુનીનં ગણનાય ભાગો દાતબ્બોતિ દાયકસ્સ અધિપ્પાયોતિ સિજ્ઝતિ, તથા દાનઞ્ચ ભિક્ખૂપિ ગણેત્વા દિન્ને એવ યુજ્જતિ. ઇતરથા હિ કિત્તકં ભિક્ખૂનં દાતબ્બં, કિત્તકં ભિક્ખુનીનન્તિ ન વિઞ્ઞાયતિ, તસ્મા ‘‘ભિક્ખુસઙ્ઘસ્સા’’તિ વુત્તવચનમ્પિ ‘‘ભિક્ખૂન’’ન્તિ વુત્તવચનસદિસમેવાતિ આહ ‘‘ભિક્ખૂ ચ ભિક્ખુનિયો ચ ગણેત્વા દાતબ્બ’’ન્તિ. તેનાહ ‘‘પુગ્ગલો …પે… ભિક્ખુસઙ્ઘગ્ગહણેન અગ્ગહિતત્તા’’તિ. ભિક્ખુસઙ્ઘ-સદ્દેન ભિક્ખૂનઞ્ઞેવ ગહિતત્તા, પુગ્ગલસ્સ પન ‘‘તુય્હઞ્ચા’’તિ વિસું ગહિતત્તા ચ તત્થસ્સ અગ્ગહિતતા દટ્ઠબ્બા, ‘‘ભિક્ખૂનઞ્ચ ભિક્ખુનીનઞ્ચ તુય્હઞ્ચા’’તિ વુત્તટ્ઠાનસદિસત્તાતિ અધિપ્પાયો. પુગ્ગલપ્પધાનો હેત્થ સઙ્ઘ-સદ્દો દટ્ઠબ્બો. કેચિ પન ‘‘ભિક્ખુસઙ્ઘગ્ગહણેન ગહિતત્તા’’તિ (સારત્થ. ટી. મહાવગ્ગ ૩.૩૭૯) પાઠં લિખન્તિ, તં ન સુન્દરં તસ્સ વિસું લાભગ્ગહણે કારણવચનત્તા. તથા હિ વિસું સઙ્ઘગ્ગહણેન ગહિતત્તાતિ વિસું પુગ્ગલસ્સપિ ભાગગ્ગહણે કારણં વુત્તં. યથા ચેત્થ પુગ્ગલસ્સ અગ્ગહણં, એવં ઉપરિ ‘‘ભિક્ખુસઙ્ઘસ્સ ચ તુય્હઞ્ચા’’તિઆદીસુપિ સઙ્ઘાદિ-સદ્દેહિ પુગ્ગલસ્સ અગ્ગહણં દટ્ઠબ્બં. યદિ હિ ગહણં સિયા, સઙ્ઘતોપિ, વિસુમ્પીતિ ભાગદ્વયં લભેય્ય ઉભયત્થ ગહિતત્તા.

પૂજેતબ્બન્તિઆદિ ગિહિકમ્મં ન હોતીતિ દસ્સનત્થં વુત્તં. ‘‘ભિક્ખુસઙ્ઘસ્સ હરા’’તિ ઇદં પિણ્ડપાતહરણં સન્ધાય વુત્તં. તેનાહ ‘‘ભુઞ્જિતું વટ્ટતી’’તિ. ‘‘અન્તોહેમન્તે’’તિ ઇમિના અનત્થતે કથિને વસ્સાનં પચ્છિમે માસે દિન્નં પુરિમવસ્સંવુત્થાનઞ્ઞેવ પાપુણાતિ, તતો પરં હેમન્તે દિન્નં પચ્છિમવસ્સંવુત્થાનમ્પિ વુત્થવસ્સત્તા પાપુણાતિ. હેમન્તતો પન પરં પિટ્ઠિસમયે ‘‘વસ્સંવુત્થસઙ્ઘસ્સા’’તિ એવં વત્વા દિન્નં અનન્તરે વસ્સે વા તતો પરેસુ વા યત્થ કત્થચિ તસ્મિં વુત્થવસ્સાનં સબ્બેસં પાપુણાતિ. યે પન સબ્બથા અવુત્થવસ્સા, તેસં ન પાપુણાતીતિ દસ્સેતિ. સબ્બેસમ્પીતિ હિ તસ્મિં ભિક્ખુભાવે વુત્થવસ્સાનં સબ્બેસમ્પીતિ અત્થો દટ્ઠબ્બો. ‘‘વસ્સંવુત્થસઙ્ઘસ્સા’’તિ વુત્તત્તા સમ્મુખીભૂતાનં સબ્બેસન્તિ એત્થાપિ એસેવ નયો. અતીતવસ્સન્તિ અનન્તરાતીતવસ્સં.

ઉદ્દેસં ગહેતું આગતોતિ ઉદ્દેસે અગ્ગહિતેપિ અન્તેવાસિકોવાતિ વુત્તં. ગહેત્વા ગચ્છન્તોતિ પરિનિટ્ઠિતઉદ્દેસો હુત્વા ગચ્છન્તો. ‘‘વત્તં કત્વા ઉદ્દેસપરિપુચ્છાદીનિ ગહેત્વા વિચરન્તાન’’ન્તિ ઇદં ‘‘ઉદ્દેસન્તેવાસિકાન’’ન્તિ ઇમસ્સેવ વિસેસનં, તેન ઉદ્દેસકાલે આગન્ત્વા ઉદ્દેસં ગહેત્વા ગન્ત્વા અઞ્ઞત્થ નિવસન્તે અનિબદ્ધચારિકે નિવત્તેતિ.

અટ્ઠચીવરમાતિકાકથાવણ્ણના નિટ્ઠિતા.

ચીવરક્ખન્ધકવણ્ણનાનયો નિટ્ઠિતો.