૪. પવારણાક્ખન્ધકો

અફાસુવિહારકથાદિવણ્ણના

૨૦૯. પવારણાક્ખન્ધકે પાળિયં પિણ્ડાય પટિક્કમેય્યાતિ પિણ્ડાય ચરિત્વા પટિક્કમેય્ય. અવક્કારપાતિન્તિ અતિરેકપિણ્ડપાતઠપનકં એકં ભાજનં. અવિસય્હન્તિ ઉક્ખિપિતું અસક્કુણેય્યં. વિલઙ્ઘનં ઉક્ખિપનં વિલઙ્ઘો, સો એવ વિલઙ્ઘકો, હત્થેહિ વિલઙ્ઘકો હત્થવિલઙ્ઘકોતિ આહ ‘‘હત્થુક્ખેપકેના’’તિ. અથ વા વિલઙ્ઘકેન ઉક્ખેપકેન હત્થેનાતિપિ અત્થો, અઞ્ઞમઞ્ઞં સંસિબ્બિતહત્થેહીતિ વુત્તં હોતિ.

૨૧૩. સચે પન વુડ્ઢતરો હોતીતિ પવારણાદાયકો ભિક્ખુ વુડ્ઢતરો હોતિ. એવઞ્હિ તેન તસ્સત્થાય પવારિતં હોતીતિ એત્થ એવં તેન અપ્પવારિતોપિ તસ્સ સઙ્ઘપ્પત્તિમત્તેન સઙ્ઘપવારણાકમ્મં સમગ્ગકમ્મમેવ હોતીતિ દટ્ઠબ્બં. તેન ચ ભિક્ખુનાતિ પવારણાદાયકેન ભિક્ખુના.

૨૩૪. બહૂપિ સમાનવસ્સા એકતો પવારેતું લભન્તીતિ એકસ્મિં સંવચ્છરે લદ્ધૂપસમ્પદતાય સમાનુપસમ્પન્નવસ્સા સબ્બે એકતો પવારેતું લભન્તીતિ અત્થો.

૨૩૭. પાળિયં મિચ્છાદિટ્ઠીતિ ‘‘નત્થિ દિન્ન’’ન્તિઆદિ (દી. નિ. ૧.૧૭૧; મ. નિ. ૧.૪૪૫; ૨.૯૪, ૯૫, ૨૨૫; ૩.૯૧, ૧૧૬, ૧૩૬; સં. નિ. ૩.૨૧૦; ધ. સ. ૧૨૨૧) નયપ્પવત્તા. અન્તગ્ગાહિકાતિ સસ્સતુચ્છેદસઙ્ખાતસ્સ અન્તસ્સ ગાહિકા. યં ખો ત્વન્તિઆદીસુ યં પવારણં ઠપેસિ, તં દિટ્ઠેન ઠપેસીતિ તં-સદ્દં અજ્ઝાહરિત્વા યોજેતબ્બં.

૨૩૯. વત્થું પકાસેન્તોતિ પુગ્ગલે પરિસઙ્કુપ્પત્તિયા નિમિત્તભૂતં વત્થુમત્તંયેવ સન્ધાય વુત્તં. યં પન વત્થું સન્ધાય ‘‘પુગ્ગલો પઞ્ઞાયતિ, ન વત્થૂ’’તિ આહ, ન તં સન્ધાયેતં વુત્તં. યદિ પન તસ્સ ભિક્ખુનો વસનટ્ઠાને પોક્ખરણિતો મચ્છગ્ગહણાદિ દિસ્સેય્ય, તદા ‘‘વત્થુ ચ પુગ્ગલો ચ પઞ્ઞાયતી’’તિ વત્તબ્બં ભવેય્ય. તેનાહ ‘‘પુરિમનયેનેવ ચોરેહી’’તિઆદિ. ભિક્ખુનો સરીરે માલાગન્ધઞ્ચ અરિટ્ઠગન્ધઞ્ચ દિસ્વા એવં ‘‘વત્થુ ચ પુગ્ગલો ચ પઞ્ઞાયતી’’તિ વુત્તન્તિ વેદિતબ્બં.

અફાસુવિહારકથાદિવણ્ણના નિટ્ઠિતા.

ભણ્ડનકારકવત્થુકથાવણ્ણના

૨૪૦. દ્વે ચાતુદ્દસિકા હોન્તીતિ તતિયપક્ખે ચાતુદ્દસિયા સદ્ધિં દ્વે ચાતુદ્દસિકા હોન્તિ. ‘‘ભણ્ડનકારકાનં તેરસે વા ચાતુદ્દસે વા ઇમે પન્નરસીપવારણં પવારેસ્સન્તી’’તિ ઇમિના યથાસકં ઉપોસથકરણદિવસતો પટ્ઠાય ભિક્ખૂનં ચાતુદ્દસીપન્નરસીવોહારો, ન ચન્દગતિસિદ્ધિયા તિથિયા વસેનાતિ દસ્સેતિ. કિઞ્ચાપિ એવં ‘‘અનુજાનામિ, ભિક્ખવે, રાજૂનં અનુવત્તિતુ’’ન્તિ (મહાવ. ૧૮૬) વચનતો પનેત્થ લોકિયાનં તિથિં અનુવત્તન્તેહિપિ અત્તનો ઉપોસથક્કમેન ચાતુદ્દસિં પન્નરસિં વા, પન્નરસિં ચાતુદ્દસિં વા કરોન્તેહેવ અનુવત્તિતબ્બં, ન પન સોળસમદિવસં વા તેરસમદિવસં વા ઉપોસથદિવસં કરોન્તેહિ. તેનેવ પાળિયમ્પિ ‘‘દ્વે તયો ઉપોસથે ચાતુદ્દસિકે કાતુ’’ન્તિ વુત્તં. અઞ્ઞથા દ્વાદસિયં, તેરસિયં વા ઉપોસથો કાતબ્બોતિ વત્તબ્બતો. ‘‘સકિં પક્ખસ્સ ચાતુદ્દસે, પન્નરસે વા’’તિઆદિવચનમ્પિ ઉપવુત્થક્કમેનેવ વુત્તં, ન તિથિક્કમેનાતિ ગહેતબ્બં.

ભણ્ડનકારકવત્થુકથાવણ્ણના નિટ્ઠિતા.

પવારણાસઙ્ગહકથાવણ્ણના

૨૪૧. ‘‘પવારેત્વા પન અન્તરાપિ ચારિકં પક્કમિતું લભન્તી’’તિ ઇમિના પવારણાસઙ્ગહે કતે અન્તરા પક્કમિતુકામા સઙ્ઘં સન્નિપાતાપેત્વા પવારેતું લભન્તીતિ દસ્સેતિ.

પવારણાસઙ્ગહકથાવણ્ણના નિટ્ઠિતા.

પવારણાક્ખન્ધકવણ્ણનાનયો નિટ્ઠિતો.