૯. રાજવગ્ગો

૧. અન્તેપુરસિક્ખાપદવણ્ણના

૪૯૯. નવમવગ્ગસ્સ પઠમે પાળિયં સંસુદ્ધગહણિકોતિ એત્થ ગહણીતિ ગબ્ભાસયસઞ્ઞિતો માતુ કુચ્છિપ્પદેસો, પુરિસન્તરસુક્કાસમ્ફુટ્ઠતાય સંસુદ્ધગહણિકો. અભિસિત્તખત્તિયતા, ઉભિન્નમ્પિ સયનિઘરતો અનિક્ખન્તતા, અપ્પટિસંવિદિતસ્સ ઇન્દખીલાતિક્કમોતિ તીણિ અઙ્ગાનિ.

અન્તેપુરસિક્ખાપદવણ્ણના નિટ્ઠિતા.

૨. રતનસિક્ખાપદવણ્ણના

૫૦૬. દુતિયે આવસથસ્સાતિ એત્થ અન્તોઆરામે વા હોતુ અઞ્ઞત્થ વા, યત્થ કત્થચિ અત્તનો વસનટ્ઠાનં આવસથો નામ. છન્દેનપિ ભયેનપીતિ વડ્ઢકિઆદીસુ છન્દેન, રાજવલ્લભેસુ ભયેન. આકિણ્ણમનુસ્સેપિ જાતે…પે… આસઙ્કન્તીતિ તસ્મિં નિમ્મનુસ્સટ્ઠાને પચ્છા આકિણ્ણમનુસ્સે જાતેપિ વિસરિત્વા ગમનકાલે અઞ્ઞસ્સ અદિટ્ઠત્તા તમેવ ભિક્ખું આસઙ્કન્તિ. પતિરૂપં નામ કપ્પિયભણ્ડે સયં પંસુકૂલં ગહેત્વા અકપ્પિયભણ્ડે પતિરૂપાનં ઉપાસકાદીનં દસ્સેત્વા ચેતિયાદિપુઞ્ઞે નિયોજનં વા દાપેત્વા નિરપેક્ખગમનં વા. સમાદપેત્વાતિ યાચિત્વા. પરસન્તકતા, વિસ્સાસગ્ગાહપંસુકૂલસઞ્ઞાનં અભાવો, અનનુઞ્ઞાતકારણા ઉગ્ગહણાદિ ચાતિ તીણિ અઙ્ગાનિ.

રતનસિક્ખાપદવણ્ણના નિટ્ઠિતા.

૩. વિકાલગામપ્પવિસનસિક્ખાપદવણ્ણના

૫૦૮. તતિયે પાળિયં ભયકથન્તિ રાજચોરાદિભયં વા રોગામનુસ્સદુબ્ભિક્ખકન્તારાદિભયં વા આરબ્ભ પવત્તં. વિસિખાકથન્તિ સુનિવિટ્ઠાદિવીથિકથં. કુમ્ભટ્ઠાનકથન્તિ ઉદકતિત્થકથં, કુમ્ભદાસીકથં વા. પુબ્બપેતકથન્તિ અતીતઞાતિકથં. નાનત્તકથન્તિ વુત્તાહિ, વક્ખમાનાહિ ચ વિમુત્તં નાનાસભાવં નિરત્થકકથં. લોકક્ખાયિકન્તિ ‘‘અયં લોકો કેન નિમ્મિતો’’તિઆદિના લોકસભાવક્ખાનવસેન પવત્તનકથા. એવં સમુદ્દક્ખાયિકા વેદિતબ્બા. ઇતિ ભવો ઇતિ અભવોતિ યં વા તં વા નિરત્થકકારણં વત્વા પવત્તિતકથા ઇતિભવાભવકથા. એત્થ ચ ભવો સસ્સતં, વુડ્ઢિ, કામસુખઞ્ચાતિ તિવિધો, અભવો તબ્બિપરીતવસેન. ઇતિ ઇમાય છબ્બિધાય ઇતિભવાભવકથાય સદ્ધિં દ્વત્તિંસતિરચ્છાનકથા નામ હોન્તિ. અથ વા પાળિયં સરૂપતો અનાગતાપિ અરઞ્ઞપબ્બતનદીદીપકથા ઇતિ-સદ્દેન સઙ્ગહેત્વા દ્વત્તિંસતિરચ્છાનકથાતિ વુચ્ચન્તિ. ઇતિ વાતિ એત્થ ઇતિ-સદ્દો પકારત્થે. વા-સદ્દો વિકપ્પત્થે. તસ્મા એવં પકારં ઇતો અઞ્ઞં વા તાદિસં નિરત્થકકથં કથેતીતિ અત્થો ગહેતબ્બો.

૫૧૨. ઉસ્સાહં પટિપ્પસ્સમ્ભેત્વા વિહારં ગચ્છન્તાતિ એત્થ ગામૂપચારતો બહિ નિક્ખન્તે અન્તરારામાદીનમુપચારં પવિટ્ઠે સન્ધાય વુત્તં. ગામૂપચારબ્ભન્તરે પન પટિપસ્સદ્ધુસ્સાહાનમ્પિ પુન તમેવ વા અઞ્ઞં વા ગામં પવિસિતુકામતાય સતિ આપુચ્છનકિચ્ચં નત્થિ. ‘‘કુલઘરે વા…પે… ગન્તબ્બ’’ન્તિ ઇદં પન પુરેભત્તં પવિટ્ઠાનં વિકાલે સઞ્જાતે વિકાલે ગામપ્પવેસસ્સ આપુચ્છિતબ્બતાય વુત્તં. અદિન્નાદાને વુત્તનયેનાતિ દુતિયલેડ્ડુપાતં સન્ધાય વુત્તં.

૫૧૫. અન્તરારામન્તિઆદીસૂતિ એત્થ ઉસ્સવદિવસાદીસુ મનુસ્સેહિ ગામે પદક્ખિણં કારેન્તં જિનબિમ્બાદિં પૂજેતુકામેહિ વા રોગવૂપસમાદિયત્થં મનુસ્સેહિ યાચિતેહિ વા ભિક્ખૂહિ સુપ્પટિચ્છન્નાદિવિધિં અકત્વાપિ વીથિમજ્ઝેનેવ ગામં પદક્ખિણં કાતું વટ્ટતીતિ વદન્તિ, તં ન ગહેતબ્બં અનાપત્તિવારે અવુત્તત્તા, ‘‘મગ્ગા અનોક્કમિત્વા…પે… પાચિત્તિય’’ન્તિ (કઙ્ખા. અટ્ઠ. વિકાલગામપ્પવેસનસિક્ખાપદવણ્ણના) પટિક્ખિત્તત્તા ચ. વેસાલિં અનુપરિયાયિત્વા પરિત્તં કરોન્તેનાપિ આનન્દત્થેરેન સુપ્પટિચ્છન્નતાદિં અકોપેન્તેનેવ, અપઞ્ઞત્તે વા સિક્ખાપદે કતન્તિ દટ્ઠબ્બં. કેચિ પન ‘‘અન્તરારામાદિગામન્તરે ઠિતેહિ ગરુટ્ઠાનીયાનં પચ્ચુગ્ગમનાનુગ્ગમનાદિવસેન ગામવીથિં ઓતરિતું વટ્ટતી’’તિ વદન્તિ, તમ્પિ અન્તરઘરં પવિસન્તં પતિ કાતું ન વટ્ટતિ એવ. અન્તરારામાદિકપ્પિયભૂમિં પન ઉદ્દિસ્સ ગચ્છન્તં પતિ કાતું વટ્ટતીતિ ખાયતિ, વીમંસિતબ્બં. સન્તં ભિક્ખું અનાપુચ્છના, અનનુઞ્ઞાતકારણા વિકાલે ગામપ્પવેસોતિ દ્વે અઙ્ગાનિ.

વિકાલગામપ્પવિસનસિક્ખાપદવણ્ણના નિટ્ઠિતા.

૪. સૂચિઘરસિક્ખાપદવણ્ણના

૫૨૦. ચતુત્થે પાળિયં વાસિજટેતિ વાસિદણ્ડકે. અટ્ઠિમયાદિસૂચિઘરતા, કરણકારાપનાદિવસેન અત્તનો પટિલાભોતિ દ્વે અઙ્ગાનિ.

સૂચિઘરસિક્ખાપદવણ્ણના નિટ્ઠિતા.

૫. મઞ્ચપીઠસિક્ખાપદવણ્ણના

૫૨૧. પઞ્ચમે પાળિયં આસયતો, ભિક્ખવે, મોઘપુરિસો વેદિતબ્બોતિ હીનજ્ઝાસયવસેન અયં તુચ્છપુરિસોતિ ઞાતબ્બો, હીનાય પચ્ચયે લોલતાય પુગ્ગલસ્સ તુચ્છતા ઞાતબ્બાતિ અધિપ્પાયો. ઇમસ્મિં સિક્ખાપદે, ઇતો પરેસુ ચ પઞ્ચસુ અત્તના કારાપિતસ્સ પટિલાભે એવ પાચિત્તિયં. પરિભોગે પનસ્સ, અઞ્ઞેસઞ્ચ દુક્કટમેવ. પમાણાતિક્કન્તમઞ્ચપીઠતા, અત્તનો કરણકારાપનવસેન પટિલાભોતિ દ્વે અઙ્ગાનિ.

મઞ્ચપીઠસિક્ખાપદવણ્ણના નિટ્ઠિતા.

૬. તૂલોનદ્ધસિક્ખાપદવણ્ણના

૫૨૬. છટ્ઠે પોટકિતૂલન્તિ તિણગચ્છજાતિકાનં તૂલં. સેસં વુત્તનયમેવ.

તૂલોનદ્ધસિક્ખાપદવણ્ણના નિટ્ઠિતા.

૭. નિસીદનસિક્ખાપદવણ્ણના

૫૩૧-૫૩૬. સત્તમે નિસીદનસ્સ પમાણાતિક્કન્તતા, અત્તનો કરણાદિના પટિલાભોતિ દ્વે અઙ્ગાનિ.

નિસીદનસિક્ખાપદવણ્ણના નિટ્ઠિતા.

૫૩૭-૫૪૭. ઇમિના નયેન અટ્ઠમનવમદસમેસુપિ અઙ્ગાનિ વેદિતબ્બાનિ. સેસં સબ્બત્થ સુવિઞ્ઞેય્યમેવાતિ.

નિટ્ઠિતો રાજવગ્ગો નવમો.

ખુદ્દકવણ્ણનાનયો નિટ્ઠિતો.