૫. અચેલકવગ્ગો

૧. અચેલકસિક્ખાપદવણ્ણના

૨૭૩. પઞ્ચમવગ્ગસ્સ પઠમે મય્હં નામાતિ ભિક્ખુના ભૂમિયં ઠપેત્વા દિન્નમ્પિ સન્ધાય વદતિ. અઞ્ઞતિત્થિયતા, અનનુઞ્ઞાતતા, અજ્ઝોહરણીયતા, અજ્ઝોહરણત્થાય સહત્થા અનિક્ખિત્તભાજને દાનન્તિ ઇમાનેત્થ ચત્તારિ અઙ્ગાનિ.

અચેલકસિક્ખાપદવણ્ણના નિટ્ઠિતા.

૨. ઉય્યોજનસિક્ખાપદવણ્ણના

૨૭૪. દુતિયે અનાચારં આચરિતુકામતા, તદત્થમેવ ઉપસમ્પન્નસ્સ ઉય્યોજના, તસ્સ ઉપચારાતિક્કમોતિ ઇમાનેત્થ તીણિ અઙ્ગાનિ.

ઉય્યોજનસિક્ખાપદવણ્ણના નિટ્ઠિતા.

૩. સભોજનસિક્ખાપદવણ્ણના

૨૮૧. તતિયે પાળિયં ખુદ્દકે ઘરેતિ એત્થ ખુદ્દકં ઘરં નામ પઞ્ચહત્થતો ઊનકવિત્થારં અધિપ્પેતં. તત્થ ચ પિટ્ઠસઙ્ઘાટતો હત્થપાસે અવિજહિતેપિ પિટ્ઠિવંસાતિક્કમો હોતીતિ આહ ‘‘પિટ્ઠિવંસં અતિક્કમિત્વા’’તિ. યથા તથા વા કતસ્સાતિ પિટ્ઠિવંસં આરોપેત્વા વા અનારોપેત્વા વા કતસ્સ.

૨૮૩. પાળિયં વીતરાગાતિ અપરિયુટ્ઠિતરાગાનં, અનાગામીનઞ્ચ સઙ્ગહો. સચિત્તકન્તિ અનુપવિસિત્વા નિસીદનચિત્તેન સચિત્તકં. પરિયુટ્ઠિતરાગજાયમ્પતિકાનં સન્નિહિતતા, સયનિઘરતા, દુતિયસ્સ ભિક્ખુનો અભાવો, અનુપખજ્જ નિસીદનન્તિ ઇમાનેત્થ ચત્તારિ અઙ્ગાનિ.

સભોજનસિક્ખાપદવણ્ણના નિટ્ઠિતા.

૨૮૪-૨૮૯. ચતુત્થપઞ્ચમાનિ વુત્તત્થાનિ.

૬. ચારિત્તસિક્ખાપદવણ્ણના

૨૯૮. છટ્ઠે ‘‘પરિયેસિત્વા આરોચનકિચ્ચં નામ નત્થી’’તિ વુત્તત્તા યો અપરિયેસિતબ્બો ઉપસઙ્કમિતું યુત્તટ્ઠાને દિસ્સતિ, સો સચેપિ પકતિવચનસ્સ સવનૂપચારં અતિક્કમ્મ ઠિતો ઉપગન્ત્વા આપુચ્છિતબ્બો. તેનાહ ‘‘અપિ ચ…પે… યં પસ્સતિ, સો આપુચ્છિતબ્બો’’તિઆદિ.

૩૦૨. અનાપત્તિવારે ચેત્થ અન્તરારામાદીનઞ્ઞેવ વુત્તત્તા વિહારતો ગામવીથિં અનુઞ્ઞાતકારણં વિના અતિક્કમન્તસ્સાપિ આપત્તિ હોતિ, ન પન ઘરૂપચારં અતિક્કમન્તસ્સેવ.

યં પન પાળિયં ‘‘અઞ્ઞસ્સ ઘરૂપચારં ઓક્કમન્તસ્સ…પે… પઠમં પાદં ઉમ્મારં અતિક્કામેતી’’તિઆદિ વુત્તં. તં ગામે પવિટ્ઠં સન્ધાય વુત્તં, તથાપિ અઞ્ઞસ્સ ઘરૂપચારં અનોક્કમિત્વા વીથિમજ્ઝેનેવ ગન્ત્વા ઇચ્છિતિચ્છિતઘરદ્વારાભિમુખે ઠત્વા મનુસ્સે ઓલોકેત્વા ગચ્છન્તસ્સાપિ પાચિત્તિયમેવ. તત્થ કેચિ ‘‘વીથિયં અતિક્કમન્તસ્સ ઘરૂપચારગણનાય આપત્તિયો’’તિ વદન્તિ. અઞ્ઞે પન ‘‘યાનિ કુલાનિ ઉદ્દિસ્સ ગતો, તેસં ગણનાયા’’તિ. પઞ્ચન્નં ભોજનાનં અઞ્ઞતરેન નિમન્તનસાદિયનં, સન્તં ભિક્ખું અનાપુચ્છના, ભત્તિયઘરતો અઞ્ઞઘરૂપસઙ્કમનં, મજ્ઝન્હિકાનતિક્કમો, સમયાપદાનં અભાવોતિ ઇમાનેત્થ પઞ્ચ અઙ્ગાનિ.

ચારિત્તસિક્ખાપદવણ્ણના નિટ્ઠિતા.

૭. મહાનામસિક્ખાપદવણ્ણના

૩૦૩. સત્તમે મહાનામોતિ સુક્કોદનસ્સ પુત્તો અનુરુદ્ધત્થેરસ્સ, સત્થુ ચ જેટ્ઠભાતા. આનન્દત્થેરો અમિતોદનસ્સ પુત્તો, નન્દત્થેરો પન સુદ્ધોદનસ્સેવ.

૩૦૫. પાળિયં કાલં આહરિસ્સથાતિ અજ્જતનં કાલં વીતિનામેસ્સથ, સ્વે ભેસજ્જં હરિસ્સથાતિ વા અત્થો. ‘‘અત્થિ પવારણા ભેસજ્જપરિયન્તા ચ રત્તિપરિયન્તા ચા’’તિ તતિયકોટ્ઠાસે નિયમિતમેવ ભેસજ્જં નિયમિતકાલન્તરેયેવ ગહેતબ્બં, ન તતો બહિ. ઇતરથા વિસું પયોજનં નત્થીતિ દટ્ઠબ્બં. સપરિયન્તા સઙ્ઘપવારણા, તદુત્તરિ ભેસજ્જવિઞ્ઞત્તિ, અગિલાનતાતિ ઇમાનેત્થ તીણિ અઙ્ગાનિ.

મહાનામસિક્ખાપદવણ્ણના નિટ્ઠિતા.

૮. ઉય્યુત્તસેનાસિક્ખાપદવણ્ણના

૩૧૫. અટ્ઠમે એકમેકન્તિ એત્થ દુવઙ્ગિનીપિ તિવઙ્ગિનીપિ સેના સઙ્ગય્હતિ. ઉય્યુત્તચતુરઙ્ગસેનાદસ્સનાય તથારૂપપચ્ચયાદિં વિના ગમનં, અનનુઞ્ઞાતોકાસે દસ્સનન્તિ ઇમાનેત્થ દ્વે અઙ્ગાનિ.

ઉય્યુત્તસેનાસિક્ખાપદવણ્ણના નિટ્ઠિતા.

૯. સેનાવાસસિક્ખાપદવણ્ણના

૩૧૯. નવમે સેનાય ચતુત્થો સૂરિયત્થઙ્ગમો, અગિલાનતાતિ ઇમાનેત્થ દ્વે અઙ્ગાનિ.

સેનાવાસસિક્ખાપદવણ્ણના નિટ્ઠિતા.

૧૦. ઉય્યોધિકસિક્ખાપદવણ્ણના

૩૨૨. દસમે પાળિયં કતિ તે લક્ખાનિ લદ્ધાનીતિ કિત્તકા તયા લદ્ધાતિ અત્થો. ઉય્યોધિકાદિદસ્સનાય તથારૂપપચ્ચયં વિના ગમનં, અનનુઞ્ઞાતોકાસે દસ્સનન્તિ ઇમાનેત્થ દ્વે અઙ્ગાનિ.

ઉય્યોધિકસિક્ખાપદવણ્ણના નિટ્ઠિતા.

નિટ્ઠિતો અચેલકવગ્ગો પઞ્ચમો.