૨. કાયસંસગ્ગસિક્ખાપદવણ્ણના

૨૬૯. દુતિયે કેસુચિ વાતપાનેસુ વિવટેસુ બહિપિ અન્ધકારત્તા આલોકો ન પવિસતિ, વિવટકવાટેન અઞ્ઞતો આગચ્છન્તસ્સ આલોકસ્સ નિવારણતો કવાટસ્સ પિટ્ઠિપસ્સે ઘનન્ધકારોવ હોતિ, તાદિસાનિ સન્ધાય ‘‘યેસુ વિવટેસુ અન્ધકારો હોતી’’તિઆદિ વુત્તં.

બ્રાહ્મણી અત્તનો અઙ્ગમઙ્ગાનં પરામસનક્ખણે અનાચારાનુકૂલા હુત્વા ન કિઞ્ચિ વત્વા ભિક્ખુનો વણ્ણભણનક્ખણે વુત્તત્તા આહ ‘‘પબ્બજિતુકામો મઞ્ઞેતિ સલ્લક્ખેત્વા’’તિ, પબ્બજિતુકામો વિયાતિ સલ્લક્ખેત્વાતિ અત્થો. કુલિત્થીનં એવં પરેહિ અભિભવનં નામ અચ્ચન્તાવમાનોતિ આહ ‘‘અત્તનો વિપ્પકાર’’ન્તિ.

૨૭૦. ઓતિણ્ણસદ્દસ્સ કમ્મસાધનપક્ખં સન્ધાય ‘‘યક્ખાદીહી’’તિઆદિ વુત્તં, કત્તુસાધનપક્ખં સન્ધાય ‘‘કૂપાદીની’’તિઆદિ વુત્તં. તસ્મિં વત્થુસ્મિન્તિ ઇત્થિસરીરસઙ્ખાતે વત્થુસ્મિં.

૨૭૧. અસ્સાતિ હત્થગ્ગાહાદિકસ્સ સબ્બસ્સ.

૨૭૩. એતેસં પદાનન્તિ આમસનાદિપદાનં. ઇત્થિસઞ્ઞીતિ મનુસ્સિત્થિસઞ્ઞી. નં-સદ્દસ્સ કાયવિસેસનભાવેન એતં કાયન્તિ અત્થં દસ્સેતું ‘‘અથ વા’’તિઆદિ વુત્તં. ઓમસન્તો…પે… એકાવ આપત્તીતિ અનિવત્થં સન્ધાય વુત્તં, ન નિવત્થં. સનિવત્થાય પન મત્થકતો પટ્ઠાય હત્થં ઓતારેન્તસ્સ નિવત્થસાટકોપરિ હત્થે આરુળ્હે થુલ્લચ્ચયં. સાટકતો હત્થં ઓતારાપેત્વા જઙ્ઘતો પટ્ઠાય ઓમસન્તસ્સ પુન સઙ્ઘાદિસેસો.

યથાનિદ્દિટ્ઠનિદ્દેસેતિ યથાવુત્તકાયસંસગ્ગનિદ્દેસે. તેનાતિ યેન કારણેન વત્થુસઞ્ઞાદયો હોન્તિ, તેન કારણેન. યથાવુત્તસિક્ખાપદનિદ્દેસે વુત્તં ગરુકં ભિક્ખુનો કરેય્ય પકાસેય્યાતિ યોજના.

સઞ્ઞાય વિરાગિતમ્હીતિ સઞ્ઞાય વિરદ્ધાય. ઇદં નામ વત્થુન્તિ ઇમસ્મિં સિક્ખાપદે આગતં, અનાગતઞ્ચ યં કિઞ્ચિ સવિઞ્ઞાણકાવિઞ્ઞાણકં ફુસન્તસ્સ અનાપત્તિઅભાવં સન્ધાય વુત્તં.

સારત્તન્તિ કાયસંસગ્ગરાગેનેવ સારત્તં. વિરત્તન્તિ કાયસંસગ્ગરાગરહિતં માતુઆદિં સન્ધાય વદતિ. દુક્કટન્તિ માતુપેમાદિવસેન ગણ્હન્તસ્સ વસેન વુત્તં, વિરત્તમ્પિ ઇત્થિં કાયસંસગ્ગરાગેન ગણ્હન્તસ્સ પન સઙ્ઘાદિસેસો એવ. ઇમાય પાળિયા સમેતીતિ સમ્બન્ધો. કથં સમેતીતિ ચે? યદિ હિ ‘‘ઇત્થિયા કાયપ્પટિબદ્ધં ગણ્હિસ્સામી’’તિ ચિત્તે ઉપ્પન્ને ઇત્થિસઞ્ઞા વિરાગિતા ભવેય્ય. કાયપ્પટિબદ્ધગ્ગહણેપિ થુલ્લચ્ચયેનાપિ ન ભવિતબ્બં ઇત્થિસઞ્ઞાય એવ પાળિયં (પારા. ૨૭૬) થુલ્લચ્ચયસ્સ વુત્તત્તા, તસ્મા ‘‘ઇત્થિયા કાયપ્પટિબદ્ધં ગણ્હિસ્સામીતિ કાયં ગણ્હન્તસ્સ ઇત્થિસઞ્ઞા વિરાગિતા નામ ન હોતીતિ કાયપ્પટિબદ્ધં ગણ્હિસ્સામીતિ કાયં ગણ્હતો ઇત્થિસઞ્ઞાય ચેવ કાયસંસગ્ગરાગસ્સ ચ કાયગ્ગહણસ્સ ચ સમ્ભવા યથાવત્થુકં સઙ્ઘાદિસેસમેવ આપજ્જતી’’તિ મહાસુમત્થેરેન વુત્તવાદોવ ઇમાય પાળિયા સમેતિ. અટ્ઠકથાયઞ્હિ ‘‘સમ્બહુલા ઇત્થિયો બાહાહિ પરિક્ખિપિત્વા ગણ્હામી’’તિ સઞ્ઞાય પરિક્ખિપતો મજ્ઝગતાનં વસેન થુલ્લચ્ચયં વુત્તં. ન હિ તસ્સ ‘‘મજ્ઝગતા ઇત્થિયો કાયપ્પટિબદ્ધેન ગણ્હામી’’તિ સઞ્ઞા અત્થિ, તસ્મા અટ્ઠકથાયપિ સમેતીતિ ગહેતબ્બં. નીલેન દુવિઞ્ઞેય્યભાવતો કાળિત્થી વુત્તા.

૨૭૯. સેવનાધિપ્પાયોતિ ફસ્સસુખસેવનાધિપ્પાયો. કાયપ્પટિબદ્ધામસનવારે કાયપ્પટિબદ્ધવસેન ફસ્સપટિવિજાનનં વેદિતબ્બં. ચિત્તુપ્પાદમત્તે આપત્તિયાભાવતો અનાપત્તીતિ ઇદં કાયસંસગ્ગરાગમત્તેન કાયચલનસ્સ અનુપ્પત્તિતો ઇત્થિયા કરિયમાનકાયચલનં સાદિયતોપિ પયોગાભાવં સન્ધાય વુત્તં. પઠમપારાજિકે પન પરેહિ ઉપક્કમિયમાનસ્સ અભાવતો સેવનાધિપ્પાયે ઉપ્પન્ને તેન અધિપ્પાયેન અઙ્ગજાતક્ખોભો સયમેવ અવસ્સં સઞ્જાયતિ, સો ચ તેન કતો નામ હોતીતિ પારાજિકં વુત્તં, તેનેવ નયેન પઠમસઙ્ઘાદિસેસેપિ પરેન કરિયમાનપયોગસાદિયમાનેપિ અઙ્ગજાતક્ખોભસમ્ભવેન આપત્તિ હોતીતિ વેદિતબ્બં. ચતુત્થેતિ ‘‘ન ચ કાયેન વાયમતિ, ન ચ ફસ્સં પટિવિજાનાતી’’તિ ઇમસ્મિં વારે. ફસ્સપટિવિજાનનમ્પીતિ અપિ-સદ્દેન તતિયવારે વિય વાયામોપિ નત્થીતિ દસ્સેતિ. નિસ્સગ્ગિયેન નિસ્સગ્ગિયામસને વિયાતિ ઇદં પન ફસ્સપટિવિજાનનાભાવમત્તસ્સેવ નિદસ્સનં, ન પયોગાભાવસ્સાતિ દટ્ઠબ્બં. મોક્ખાધિપ્પાયોતિ એત્થ ચિત્તસ્સ લહુપરિવત્તિતાય અન્તરન્તરા કાયસંસગ્ગરાગે સમુપ્પન્નેપિ મોક્ખાધિપ્પાયસ્સ અવિચ્છિન્નતાય અનાપત્તિયેવ, વિચ્છિન્ને પન તસ્મિં આપત્તિ એવ.

પદભાજનીયવણ્ણનાનયો.

૨૮૧. એત્થ ગણ્હાહીતિ ન વત્તબ્બાતિ ગેહસિતપેમેન કાયપ્પટિબદ્ધેન ફુસને દુક્કટં સન્ધાય વુત્તં, કારુઞ્ઞેન પન વત્થાદિં ગહેતું અસક્કોન્તિં ‘‘ગણ્હા’’તિ વદન્તસ્સાપિ અવસસભાવપ્પત્તં ઉદકે નિમુજ્જન્તિં કારુઞ્ઞેન સહસા અનામાસન્તિ અચિન્તેત્વા કેસાદીસુ ગહેત્વા મોક્ખાધિપ્પાયેન આકડ્ઢતોપિ અનાપત્તિયેવ. ન હિ મીયમાનં માતરં ઉક્ખિપિતું ન વટ્ટતિ. અઞ્ઞાતિકાય ઇત્થિયાપિ એસેવ નયો. ઉક્કટ્ઠાય માતુયાપિ આમાસો ન વટ્ટતીતિ દસ્સનત્થં ‘‘માતર’’ન્તિ વુત્તં. તસ્સા કાતબ્બં પન અઞ્ઞાસમ્પિ ઇત્થીનં કરોન્તસ્સાપિ અનાપત્તિયેવ અનામાસત્તે વિસેસાભાવા.

તિણણ્ડુપકન્તિ હિરિવેરાદિમૂલેહિ કેસાલઙ્કારત્થાય કતચુમ્બટકં. પરિવત્તેત્વાતિ અત્તનો નિવાસનાદિભાવતો અપનેત્વા. પૂજાદિઅત્થં પન તાવકાલિકમ્પિ આમસિતું વટ્ટતિ. સીસપસાધનકદન્તસૂચિઆદીતિ ઇદં સીસાલઙ્કારત્થાય પટપિલોતિકાદીહિ કતં સીસપસાધનકઞ્ચેવ દન્તસૂચિઆદિ ચાતિ દ્વિધા યોજેત્વા સીસપસાધનં સિપાટિકોપકરણત્થાય ચેવ દન્તસૂચિઉપકરણત્થાય ચ ગહેતબ્બન્તિ યથાક્કમં અત્થં દસ્સેતિ. કેસકલાપં બન્ધિત્વા તત્થ તિરિયં પવેસનત્થાય કતા દન્તસૂચિ એવ સીસપસાધનકદન્તસૂચીતિ એકમેવ કત્વા સિપાટિકાય પક્ખિપિત્વા પરિહરિતબ્બસૂચિયેવ તસ્સ તસ્સ કિચ્ચસ્સ ઉપકરણન્તિ સિપાટિકાસૂચિઉપકરણન્તિ એવં વા યોજના કાતબ્બા. પોત્થકરૂપન્તિ સુધાદીહિ કતં, પારાજિકવત્થુભૂતાનં તિરચ્છાનગતિત્થીનં સણ્ઠાનેન કતમ્પિ અનામાસમેવ. ઇત્થિરૂપાદીનિ દસ્સેત્વા કતં, વત્થભિત્તિઆદિઞ્ચ ઇત્થિરૂપં અનામસિત્વા વળઞ્જેતું વટ્ટતિ. એવરૂપેહિ અનામાસે કાયસંસગ્ગરાગે અસતિ કાયપ્પટિબદ્ધેન આમસતો દોસો નત્થિ. ભિન્દિત્વાતિ એત્થ અનામાસમ્પિ દણ્ડપાસાણાદીહિ ભેદનસ્સ અટ્ઠકથાયં વુત્તત્તા, પાળિયમ્પિ આપદાસુ મોક્ખાધિપ્પાયસ્સ આમસનેપિ અનાપત્તિયા વુત્તત્તા ચ. સપ્પિનીઆદીહિ વાળમિગીહિ ચ ગહિતપાણકાનં મોચનત્થાય તં સપ્પિનીઆદિં વત્થદણ્ડાદીહિ પરિક્ખિપિત્વા ગહેતું, માતુઆદિં ઉદકે મીયમાનં વત્થાદીહિ ગહેતું, અસક્કોન્તિં કેસાદીસુ ગહેત્વા કારુઞ્ઞેન ઉક્ખિપિતું વટ્ટતીતિ અયમત્થો ગહેતબ્બોવ. અટ્ઠકથાયં ‘‘ન ત્વેવ આમસિતબ્બા’’તિ ઇદં પન વચનં અમીયમાનવત્થું સન્ધાય વુત્તન્તિ અયં અમ્હાકં ખન્તિ.

મગ્ગં અધિટ્ઠાયાતિ ‘‘મગ્ગો અય’’ન્તિ મગ્ગસઞ્ઞં ઉપ્પાદેત્વાતિ અત્થો. પઞ્ઞપેત્વા દેન્તીતિ ઇદં સામીચિવસેન વુત્તં, તેહિ પન આસનં અપઞ્ઞપેત્વાવ નિસીદથાતિ વુત્તે સયમેવ પઞ્ઞપેત્વા નિસીદિતુમ્પિ વટ્ટતિ. તત્થજાતકાનીતિ અચ્છિન્દિત્વા ભૂતગામભાવેનેવ ઠિતાનિ. કીળન્તેનાતિ વુત્તત્તા સતિ પચ્ચયે આમસન્તસ્સ અનાપત્તિ. ભિક્ખુસન્તકં પન પરિભોગારહં સબ્બથા આમસિતું ન વટ્ટતિ દુરુપચિણ્ણત્તા. અનુપસમ્પન્નાનં દસ્સામીતિ ઇદં અપ્પટિગ્ગહેત્વા ગહણં સન્ધાય વુત્તં. અત્તનોપિ અત્થાય પટિગ્ગહેત્વા ગહણે દોસો નત્થિ અનામાસત્તાભાવા.

મણીતિ વેળુરિયાદિતો અઞ્ઞો જોતિરસાદિભેદો સબ્બોપિ મણિ. વેળુરિયોતિ અલ્લવેળુવણ્ણોમણિ, ‘‘મજ્જારક્ખિ મણ્ડલવણ્ણો’’તિપિ વદન્તિ. સિલાતિ મુગ્ગમાસવણ્ણા અતિસિનિદ્ધા કાળસિલા, મણિવોહારં આગતા રત્તસેતાદિવણ્ણા સુમટ્ઠાપિ સિલા અનામાસા એવાતિ વદન્તિ. રજતન્તિ કહાપણમાસાદિભેદં જતુમાસાદિં ઉપાદાય સબ્બં વુત્તાવસેસં રૂપિયં ગહિતં. લોહિતઙ્કોતિ રત્તમણિ. મસારગલ્લન્તિ કબરવણ્ણો મણિ, ‘‘મરકત’’ન્તિપિ વદન્તિ. ભેસજ્જત્થાય પિસિત્વા યોજિતાનં મુત્તાનં રતનભાવવિરહતો ગહણક્ખણેપિ રતનાકારેન અપેક્ખિતાભાવા ‘‘ભેસજ્જત્થાય પન વટ્ટતી’’તિ વુત્તં. યાવ પન તા મુત્તા રતનરૂપેન તિટ્ઠન્તિ, તાવ આમસિતું ન વટ્ટતિ એવ. એવં અઞ્ઞમ્પિ રતનપાસાણં પિસિત્વા ભેસજ્જે યોજનત્થાય ગહેતું વટ્ટતિ એવ, જાતરૂપરજતં પન પિસિત્વા યોજનભેસજ્જત્થાયપિ સમ્પટિચ્છિતું ન વટ્ટતિ, ગહટ્ઠેહિ યોજેત્વા દિન્નમ્પિ યદિ ભેસજ્જે સુવણ્ણાદિરૂપેન તિટ્ઠતિ, વિયોજેતુઞ્ચ સક્કા, તાદિસં ભેસજ્જમ્પિ ન વટ્ટતિ. તં અબ્બોહારિકત્તં ગતં ચે, વટ્ટતિ. ‘‘જાતિફલિકં ઉપાદાયા’’તિ વુત્તત્તા, સૂરિયકન્તચન્દકન્તાદિકં જાતિપાસાણં મણિમ્હિ એવ સઙ્ગહિતન્તિ દટ્ઠબ્બં. ધમનસઙ્ખો ચ ધોતવિદ્ધો ચ રતનમિસ્સો ચાતિ યોજેતબ્બં. વિદ્ધોતિ મણિઆદિભાવેન કતછિદ્દો.

રતનમિસ્સોતિ કઞ્ચનલતાદિવિચિત્તો, મુત્તાદિરતનખચિતો ચ, એતેન ધમનસઙ્ખતો અઞ્ઞો રતનમિસ્સોવ અનામાસોતિ દસ્સેતિ. સિલાયમ્પિ એસેવ નયો. પાનીયસઙ્ખોતિ ઇમિનાવ થાલકાદિઆકારેન કતસઙ્ખમયભાજનાનિ ભિક્ખૂનં સમ્પટિચ્છિતું વટ્ટતીતિ સિદ્ધં. સેસાતિ રતનસંયુત્તં ઠપેત્વા અવસેસા.

બીજતો પટ્ઠાયાતિ ધાતુપાસાણતો પટ્ઠાય. પટિક્ખિપીતિ સુવણ્ણમયધાતુકરણ્ડકસ્સ, બુદ્ધરૂપાદિસ્સ ચ અત્તનો સન્તકકરણે નિસ્સગ્ગિયત્તા વુત્તં. ‘‘રૂપિયછડ્ડકટ્ઠાને’’તિ વુત્તત્તા રૂપિયછડ્ડકસ્સ જાતરૂપરજતં આમસિત્વા છડ્ડેતું વટ્ટતીતિ સિદ્ધં. કેળાપયિતુન્તિ આમસિત્વા ઇતો ચિતો ચ સઞ્ચારેતું. વુત્તન્તિ મહાઅટ્ઠકથાયં વુત્તં. કચવરમેવ હરિતું વટ્ટતીતિ ગોપકા વા હોન્તુ અઞ્ઞે વા, હત્થેન પુઞ્છિત્વા કચવરં અપનેતું વટ્ટતિ, મલમ્પિ પમજ્જિતું વટ્ટતિ એવાતિ વદન્તિ, તં અટ્ઠકથાય ન સમેતિ કેળાયનસદિસત્તા. આરકૂટલોહન્તિ સુવણ્ણવણ્ણો કિત્તિમલોહવિસેસો. તિવિધઞ્હિ કિત્તિમલોહં કંસલોહં વટ્ટલોહં હારકૂટલોહન્તિ. તત્થ તિપુતમ્બે મિસ્સેત્વા કતં કંસલોહં નામ. સીસતમ્બે મિસ્સેત્વા કતં વટ્ટલોહં. રસતમ્બે મિસ્સેત્વા કતં હારકૂટલોહં નામ. તં પન ‘‘જાતરૂપગતિક’’ન્તિ વુત્તત્તા ઉગ્ગણ્હતો નિસ્સગ્ગિયમ્પિ હોતીતિ કેચિ વદન્તિ. રૂપિયેસુ પન અગણિતત્તા નિસ્સગ્ગિયં ન હોતિ, આમસને, સમ્પટિચ્છને ચ દુક્કટમેવાતિ વેદિતબ્બં. સબ્બકપ્પિયોતિ યથાવુત્તસુવણ્ણાદિમયાનં સેનાસનપરિક્ખારાનં આમસનગોપનાદિવસેન પરિભોગો સબ્બથા કપ્પિયોતિ અધિપ્પાયો. તેનાહ ‘‘તસ્મા’’તિઆદિ. ‘‘ભિક્ખૂનં ધમ્મવિનયવણ્ણનટ્ઠાને’’તિ વુત્તત્તા સઙ્ઘિકમેવ સુવણ્ણાદિમયં સેનાસનં, સેનાસનપરિક્ખારા ચ વટ્ટન્તિ, ન પુગ્ગલિકાનીતિ ગહેતબ્બં.

ભિન્દિત્વાતિ પઠમમેવ અનામસિત્વા પાસાણાદિના કિઞ્ચિમત્તં ભેદં કત્વા પચ્છા કપ્પિયભણ્ડત્થાય અધિટ્ઠહિત્વા હત્થેન ગહેતું વટ્ટતિ. તેનાહ ‘‘કપ્પિયભણ્ડં કરિસ્સામીતિ સબ્બમ્પિ સમ્પટિચ્છિતું વટ્ટતી’’તિ. એત્થાપિ કિઞ્ચિ ભિન્દિત્વા, વિયોજેત્વા વા આમસિતબ્બ.

ફલકજાલિકાદીનીતિ એત્થ સરપરિત્તાણાય હત્થેન ગહેતબ્બં કિટિકાફલકં અક્ખિરક્ખણત્થાય અયલોહાદીહિ જાલાકારેન કત્વા સીસાદીસુ પટિમુઞ્ચિતબ્બં જાલિકં નામ. આદિ-સદ્દેન કવચાદિં સઙ્ગણ્હાતિ. અનામાસાનીતિ મચ્છજાલાદિપરૂપરોધકં સન્ધાય વુત્તં, ન સરપરિત્તાણં તસ્સ આવુધભણ્ડત્તાભાવા. તેનેવ વક્ખતિ ‘‘પરૂપરોધનિવારણં હી’’તિઆદિ. આસનસ્સાતિ ચેતિયસ્સ સમન્તા કતપરિભણ્ડસ્સ. બન્ધિસ્સામીતિ કાકાદીહિ અદૂસનત્થાય બન્ધિસ્સામિ.

‘‘ભેરિસઙ્ઘાટોતિ સઙ્ઘટિતચમ્મભેરી. વીણાસઙ્ઘાટોતિ સઙ્ઘટિતચમ્મવીણા’’તિ સારત્થદીપનિયં (સારત્થ. ટી. ૨.૨૮૧) વુત્તં. ‘‘ચમ્મવિનદ્ધાનિ વીણાભેરિઆદીની’’તિ મહાઅટ્ઠકથાયં વુત્તવચનતો વિસેસાભાવા, ‘‘કુરુન્દિયં પના’’તિઆદિના તતો વિસેસસ્સ વત્તુમારદ્ધત્તા ચ ભેરિઆદીનં વિનદ્ધનોપકરણસમૂહો ભેરિવીણાસઙ્ઘાટોતિ વેદિતબ્બં સઙ્ઘટિતબ્બોતિ સઙ્ઘાટોતિ કત્વા. તુચ્છપોક્ખરન્તિ અવિનદ્ધચમ્મભેરિવીણાનં પોક્ખરં. આરોપિતચમ્મન્તિ પુબ્બે આરોપિતં હુત્વા પચ્છા તતો અપનેત્વા વિસું ઠપિતમુખચમ્મમત્તં, ન સેસોપકરણસહિતં. સહિતં પન સઙ્ઘાટોતિ અયં વિસેસો. ઓનહિતુન્તિ ભેરિપોક્ખરાદીનિ ચમ્મં આરોપેત્વા ચમ્મવટ્ટિઆદીહિ સબ્બેહિ ઉપકરણેહિ વિનન્ધિતું.

પાળિયં પણ્ડકસ્સાતિ પણ્ડકેન. પારાજિકપ્પહોનકકાલેતિ અકુથિતકાલે. કાયસંસગ્ગરાગાદિભાવે સબ્બાવત્થાયપિ ઇત્થિયા સણ્ઠાને પઞ્ઞાયમાને અનામાસદુક્કટં ન વિગચ્છતીતિ દટ્ઠબ્બં. સઙ્કમાદીનં ઠાનાચાવનવસેન અચાલેતબ્બતાય ન કાયપ્પટિબદ્ધવોહારોતિ દુક્કટં વુત્તં.

૨૮૨. એકપદિકસઙ્કમોતિ તનુકસેતુ. ‘‘આવિઞ્છન્તો’’તિ વુત્તત્તા ચાલેતું યુત્તાય એવ રજ્જુયા થુલ્લચ્ચયં, ન ઇતરાય ભિત્તિથમ્ભાદિગતિકત્તાતિ આહ ‘‘યા મહારજ્જુ હોતી’’તિઆદિ. તેન ચાલેતું યુત્તે તનુકરજ્જુદણ્ડકે અચાલેત્વા ફુસન્તસ્સાપિ થુલ્લચ્ચયમેવાતિ દીપિતન્તિ વેદિતબ્બં. પટિચ્છાદેતબ્બાતિ છાદનાદિવસેન ગૂહિતબ્બા. મનુસ્સિત્થી, મનુસ્સિત્થિસઞ્ઞિતા, કાયસંસગ્ગરાગો, વાયામો, તેન હત્થાદીસુ ફુસનન્તિ ઇમાનેત્થ પઞ્ચ અઙ્ગાનિ.

કાયસંસગ્ગસિક્ખાપદવણ્ણના નિટ્ઠિતા.