૮. સૂદસુત્તવણ્ણના

૩૭૪. આહારસમ્પાદનેન તંતંઆહારવત્થુગતે સૂદેતિ પગ્ઘરેતીતિ સૂદો, ભત્તકારકો. દહરેહિ મનાપતરં અચ્ચેતબ્બતો અતિક્કમિતબ્બતો અચ્ચયા, ભોજને રસવિસેસા, તસ્મા નાનચ્ચયેહીતિ નાનપ્પકારરસવિસેસેહીતિ અત્થો. તેન વુત્તં ‘‘નાનચ્ચયેહી’’તિઆદિ. અગ્ગીયતિ અસઙ્કરતો વિભજીયતીતિ અગ્ગો, અમ્બિલમેવ અગ્ગો અમ્બિલગ્ગોતિ આહ – ‘‘અમ્બિલગ્ગેહીતિ અમ્બિલકોટ્ઠાસેહી’’તિ. દાતું અભિહરિતબ્બતાય અભિહારા, દેય્યધમ્મા. તેનાહ – ‘‘અભિહટાનં દાયાન’’ન્તિ. ઇદં મે કમ્મટ્ઠાનં અનુલોમંવાતિ ઇદં મમ કમ્મટ્ઠાનં એવં પવત્તમાનં અનુલોમાવસાનમેવ હુત્વા તિટ્ઠતિ. એવં પુન પવત્તમાનં ઉસ્સક્કિત્વા વિસેસનિબ્બત્તનત્થમેવ હોતીતિ એવં નિમિત્તં ગહેતું ન સક્કોતિ બાલો અબ્યત્તો, પણ્ડિતો પન સક્કોતિ. અત્તનો ચિત્તસ્સાતિ અત્તનો ભાવનાચિત્તસ્સ. પુબ્બભાગવિપસ્સના સતિપટ્ઠાનાવ કથિતા ‘‘સકસ્સ ચિત્તસ્સ નિમિત્તં ઉગ્ગણ્હાતી’’તિ વુત્તત્તા.