૧. સહસ્સભિક્ખુનિસઙ્ઘસુત્તવણ્ણના

૧૦૦૭. ધમ્મિકત્તા દેસવાસીહિ અનુકમ્પિતો રાજાતિ રાજકો, તસ્સ આરામો રાજકારામો, તસ્મિં. ભૂમિસીસં સેટ્ઠપ્પદેસો, યત્થ વસન્તો લાભગ્ગયસગ્ગપ્પત્તો હોતીતિ તેસં અધિપ્પાયો.

વારાપેહીતિ પટિસેધેહિ. યુજ્ઝાપેતુન્તિ કલહં કારાપેતું. પુન આગચ્છન્તાતિ અપરસ્મિં સંવચ્છરે આગચ્છન્તા. ઉબ્બટ્ટેત્વાતિ મહતી વીચિયો ઉબ્બટ્ટેત્વા. યથા તસ્સ સકલમેવ રટ્ઠં એકોદકીભૂતં હોતિ, એવં કત્વા સમુદ્દમેવ જાતં. તેન વુત્તં ‘‘સમુદ્દમેવ અકંસૂ’’તિ.

ઇસીનમન્તરં કત્વાતિ ઇસીનં કારણં કત્વા, ઇસીનં હેતૂતિ અત્થો, ઇસીનં વા અન્તરભેદં કત્વા. તથા લોકે કોલાહલસ્સ પત્થટતં વિભાવેન્તો ભગવા ‘‘મે સુત’’ન્તિ આહ પચ્ચક્ખતો જાનમ્પિ. ઉચ્છિન્નોતિ કુલચ્છેદેન ઉચ્છિન્નો. ન કેવલં સયમેવ, અથ ખો સહ રટ્ઠેહિ. વિભવન્તિ વિનાસં ઉપગતો.

તં સન્ધાયેતં વુત્તન્તિ તં યથાવુત્તં પસેનદિના કોસલરાજેન કારિતં વિહારં સન્ધાય એતં ‘‘રાજકારામે’’તિ વુત્તં.