૮. પદીપોપમસુત્તવણ્ણના

૯૮૪. ‘‘નેવ કાયોપિ કિલમતિ ન ચક્ખૂની’’તિ અટ્ઠકથાયં પદુદ્ધારો કતો. ‘‘કાયોપિ કિલમતિ, ચક્ખૂનિપિ વિહઞ્ઞન્તી’’તિ વત્વા યત્થ યથા હોતિ, તાનિ દસ્સેતું ‘‘ધાતુકમ્મટ્ઠાનસ્મિં હી’’તિઆદિ વુત્તં. ચક્ખૂનિ ફન્દન્તિ કિલમન્તીતિઆદિ અતિવેલં ઉપનિજ્ઝાયને હોતીતિ કત્વા વુત્તં. ઇમસ્મિં પન કમ્મટ્ઠાનેતિ આનાપાનકમ્મટ્ઠાને. એવમાહાતિ ‘‘ભિક્ખુ ચેપિ આકઙ્ખેય્ય, નેવ કાયો કિલમેય્યા’’તિ એવમાહ.

લબ્ભતીતિ અટ્ઠકથાધિપ્પાયે ઠત્વા વુત્તં, પરતો આગતેન થેરવાદેન સો અનિચ્છિતો. ન હિ તારકરૂપમુત્તાવળિકાદિસદિસં નિમિત્તૂપટ્ઠાનાકારમત્તં ખણમત્તટ્ઠાયિનં કસિણનિમિત્તેસુ વિય ઉગ્ઘાટનં કાતું સક્કોતિ. તેનાહ ‘‘ન લબ્ભતેવા’’તિ. આનિસંસદસ્સનત્થં ગહિતો, આનાપાનસ્સતિસમાધિસ્મિં સિદ્ધે અયં ગુણો સુખેનેવ ઇજ્ઝતીતિ. યસ્મા ભિક્ખૂતિ ઇમસ્મિં વારે નાગતન્તિ યથા પુરિમવારે ‘‘ભિક્ખુ ચેપિ આકઙ્ખેય્યા’’તિ આગતં, એવં ઇધ ‘‘ભાવિતે ખો, ભિક્ખવે, આનાપાનસ્સતિસમાધિમ્હી’’તિ આગતવારે ભિક્ખુગ્ગહણમકતં, તસ્મા ‘‘સો’’તિ ન વુત્તં.