૭. પઠમગેલઞ્ઞસુત્તવણ્ણના

૨૫૫. સદ્દહિત્વા ગિલાને ઉપટ્ઠાતબ્બે મઞ્ઞિસ્સન્તીતિ યોજના. તત્થાતિ તસ્મિં ઠાને. કમ્મટ્ઠાનાનુયોગો સપ્પાયો યેસં તે કમ્મટ્ઠાનસપ્પાયા, સતિપટ્ઠાનરતાતિ અત્થો. અનિચ્ચતં અનુપસ્સન્તોતિ કાયં પટિચ્ચ ઉપ્પન્નાય વેદનાય ચ અનિચ્ચતં અનુપસ્સન્તો. વયં અનુપસ્સન્તોતિઆદીસુપિ એસેવ નયો. વયન્તિ પન તાય એવ ખયસઙ્ખાતં. વિરાગન્તિ વિરજ્જનં. પટિનિસ્સગ્ગન્તિ પરિચ્ચાગપટિનિસ્સગ્ગં, પક્ખન્દનપટિનિસ્સગ્ગમ્પિ વા.

આગમનીયપટિપદાતિ અરિયમગ્ગસ્સ આગમનટ્ઠાનિયા પુબ્બભાગપટિપદા. પુબ્બભાગાયેવ ન લોકુત્તરા. સમ્પજઞ્ઞં પુબ્બભાગિયમેવ. તિસ્સો અનુપસ્સના પુબ્બભાગાયેવ વિપસ્સનાપરિયાપન્નત્તા. મિસ્સકાતિ લોકિયલોકુત્તરમિસ્સકા. ભાવનાકાલો દસ્સિતો ‘‘નિરોધાનુપસ્સિનો વિહરતો, પટિનિસ્સગ્ગાનુપસ્સિનો વિહરતો રાગાનુસયો પહીયતી’’તિ વુત્તત્તા.

પઠમગેલઞ્ઞસુત્તવણ્ણના નિટ્ઠિતા.