૫. દુતિયઅપરિજાનનસુત્તવણ્ણના

૨૭. ચક્ખુવિઞ્ઞાણવિઞ્ઞાતબ્બધમ્મો નામ રૂપાયતનમેવાતિ આહ ‘‘હેટ્ઠા ગહિતરૂપમેવા’’તિ. ઇધ અનાપાથગતં ‘‘ચક્ખુવિઞ્ઞાણવિઞ્ઞાતબ્બા ધમ્મા’’તિ વુત્તત્તા. હેટ્ઠા આપાથગતમ્પિ અનાપાથગતમ્પિ ગહિતમેવ ‘‘યે ચ રૂપા’’તિ અનવસેસતો વુત્તત્તા. તે હિ વેદનાસઞ્ઞાસઙ્ખારક્ખન્ધા સહ ચક્ખુવિઞ્ઞાણેન વિઞ્ઞાતબ્બત્તા. તથા હિ ચક્ખુવિઞ્ઞાણં તેહિ એકુપ્પાદં એકવત્થુકં એકનિરોધં એકારમ્મણમેવ. સેસપદેસૂતિ સેસેસુ ‘‘યઞ્ચ સોતં યે ચ સદ્દા’’તિઆદિના આગતેસુ કણ્હપક્ખે પઞ્ચસુ, સુક્કપક્ખે છસુપિ પદેસુ. એસેવ નયોતિ ય્વાયં ‘‘હેટ્ઠા ગહિતરૂપમેવ ગણ્હિત્વા’’તિ અત્થો વુત્તો. એસો એવ તત્થપિ અત્થવણ્ણનાનયો.

દુતિયઅપરિજાનનસુત્તવણ્ણના નિટ્ઠિતા.