૪. ઉપાદાનપરિપવત્તસુત્તવણ્ણના

૫૬. ચતુન્નં પરિવટ્ટનવસેનાતિ પચ્ચેકક્ખન્ધેસુ ચતુન્નં અરિયસચ્ચાનં પરિવટ્ટનવસેન. રૂપં અબ્ભઞ્ઞાસિન્તિ સકલભૂતુપાદારૂપં કુચ્છિતભાવતો તત્થ ચ તુચ્છવિપલ્લાસતાય ‘‘દુક્ખસચ્ચ’’ન્તિ અભિવિસિટ્ઠેન ઞાણેન અઞ્ઞાસિં પટિવિજ્ઝિં. આહારવસેન રૂપકાયસ્સ હાનિવુદ્ધાદીનં પાકટભાવતો વિસેસપચ્ચયતો ચ તસ્સ ‘‘આહારસમુદયા’’તિ વુત્તં. દુક્ખસમુદયકથા નામ વટ્ટકથાતિ ‘‘સચ્છન્દરાગો’’તિ વિસેસેત્વા વુત્તં. છન્દરાગગ્ગહણેન ચ ઉપાદાનકમ્માવિજ્જાપિ ગહિતા એવ. પટિપન્ના હોન્તીતિ અત્થો. વત્તમાનકાલપ્પયોગો હેસ યથા ‘‘કુસલં ચિત્તં ઉપ્પન્નં હોતી’’તિ. પતિટ્ઠહન્તીતિ પતિટ્ઠં લભન્તિ. કેવલિનોતિ ઇધ વિમુત્તિગુણેન પારિપૂરીતિ આહ ‘‘સકલિનો કતસબ્બકિચ્ચા’’તિ. યેન તેતિ યેન અવસિટ્ઠેન તે અસેક્ખે પઞ્ઞાપેન્તા પઞ્ઞાપેય્યું, તં નેસં વટ્ટં સેક્ખાનં વિય નત્થિ પઞ્ઞાપનાય. વટ્ટન્તિ કારણં વટ્ટનટ્ઠેન ફલસ્સ પવત્તનટ્ઠેન. અસેક્ખભૂમિવારોતિ અસેક્ખભૂમિપ્પવત્તિ.

ઉપાદાનપરિપવત્તસુત્તવણ્ણના નિટ્ઠિતા.