૫. સત્તટ્ઠાનસુત્તવણ્ણના

૫૭. સત્તસુ ઓકાસેસૂતિ રૂપપજાનનાદીસુ સત્તસુ ઓકાસેસુ. વુસિતવાસોતિ વુસિતઅરિયવાસો. એત્થાતિ ઇમસ્મિં ઉદ્દેસે. સેસં નામ ઇધ વુત્તાવસેસં. વુત્તનયેનાતિ હેટ્ઠા વુત્તનયેન વેદિતબ્બં. ઉસ્સદનન્દિયન્તિ ઉસ્સન્નગુણવતો તોસનં સમ્મોદાપનં. ગુણકિત્તનેન પલોભનીયં સેક્ખકલ્યાણપુથુજ્જનાનં પસાદુપ્પાદનેન. ઇદાનિ વુત્તમેવ અત્થં પાકટં કાતું ‘‘યથા હી’’તિઆદિ વુત્તં.

એત્તાવતાતિ પઞ્ચન્નં ખન્ધાનં વસેન સત્તસુ ઠાનેસુ કોસલ્લદીપનેન એત્તકેન દેસનાક્કમેન. તન્તિ આરમ્મણં. ધાતુઆદિમત્તમેવાતિ ધાતાયતનપટિચ્ચસમુપ્પાદમત્તમેવ. ઇમેસુ ધમ્મેસૂતિ ઇમેસુ જાતાદીસુ. કમ્મં કત્વાતિ સમ્મસનકમ્મં નિટ્ઠપેત્વાતિ અત્થો. એવમેત્થ પઞ્ચન્નં ખન્ધાનં વસેન સત્તટ્ઠાનકોસલ્લપવત્તિયા પભેદેન વિભજિત્વા ‘‘તિવિધૂપપરિક્ખી’’તિ દસ્સેતિ ધમ્મરાજા.

સત્તટ્ઠાનસુત્તવણ્ણના નિટ્ઠિતા.