૧૦. થેરનામકસુત્તવણ્ણના

૨૪૪. અતીતે ખન્ધપઞ્ચકેતિ અતીતે અત્તભાવે. છન્દરાગપ્પહાનેનાતિ છન્દરાગસ્સ અચ્ચન્તમેવ જહનેન. પહીનં નામ હોતિ અનપેક્ખપરિચ્ચાગતો. પટિનિસ્સટ્ઠં નામ હોતિ સબ્બસો છડ્ડિતત્તા. તયો ભવેતિ ઇમિના ઉપાદિણ્ણકધમ્માનંયેવ ગહણં. સબ્બા ખન્ધાયતનધાતુયો ચાતિ ઇમિના ઉપાદિણ્ણાનમ્પિ અનુપાદિણ્ણાનમ્પિ દ્વિધા પવત્તલોકિયધમ્માનં ગહણં અવિસેસેત્વા વુત્તત્તા. વિદિતં પાકટં કત્વા ઠિતં પરિઞ્ઞાભિસમયવસેન. તેસ્વેવાતિ તેભૂમકધમ્મેસુ એવ. અનુપલિત્તં અમથિતં અસંકિલિટ્ઠં તણ્હાદિટ્ઠિસંકિલેસાભાવતો. તદેવ સબ્બન્તિ હેટ્ઠા તીસુપિ પદેસુ ઇધ સબ્બગ્ગહણેન ગહિતં તેભૂમકવટ્ટં. જહિત્વાતિ પહાનાભિસમયવસેન. તણ્હા ખીયતિ એત્થાતિ તણ્હક્ખયસઙ્ખાતે નિબ્બાને વિમુત્તં. તમહન્તિ તં ઉત્તમપુગ્ગલં એકવિહારિં બ્રૂમિ તણ્હાદુતિયસ્સ અભાવતો. એત્થ ચ પરિઞ્ઞાપહાનાભિસમયકથનેન ઇતરમ્પિ અભિસમયં અત્થતો કથિતમેવાતિ દટ્ઠબ્બં.

થેરનામકસુત્તવણ્ણના નિટ્ઠિતા.