૯. ઉપયન્તિસુત્તવણ્ણના

૬૯. નવમે ઉદકવડ્ઢનસમયેતિ સબ્બદિવસેસુ મહાસમુદ્દસ્સ અન્તો મહન્તચન્દકન્તમણિપબ્બતાનં જુણ્હસમ્ફસ્સેન પહતત્તા જલાભિસન્દનવસેન ઉદકસ્સ વડ્ઢનસમયે. ઉપરિ ગચ્છન્તોતિ પકતિયા ઉદકસ્સ તિટ્ઠટ્ઠાનસ્સ તતો ઉપરિ ગચ્છન્તોતિ અત્થો. ઉપરિ યાપેતીતિ ઉદકં તત્થ ઉપરૂપરિ વડ્ઢેતિ. તથાભૂતો ચ તં બ્રૂહેન્તો પૂરેન્તોતિ વુચ્ચતીતિ આહ ‘‘વડ્ઢેતિ પૂરેતીતિ અત્થો’’તિ. યસ્મા પચ્ચયધમ્મા અત્તનો ફલસમવાયપચ્ચયે હોન્તે તસ્સ ઉપરિ ઠિતો વિય હોતિ તસ્સ અત્તનો વસે વત્તાપનતો, તસ્મા વુત્તં ‘‘અવિજ્જા ઉપરિ ગચ્છન્તી’’તિ. પચ્ચયભાવેન હિ સા તથા વુચ્ચતિ. તેનાહ ‘‘સઙ્ખારાનં પચ્ચયો ભવિતું સક્કુણન્તી’’તિ. અપગચ્છન્તો યાયન્તો. તેનાહ ‘‘ઓસરન્તો’’તિ, અવડ્ઢન્તો પરિહીયમાનોતિ અત્થો.

ઉપયન્તિસુત્તવણ્ણના નિટ્ઠિતા.