૨. કિંદદસુત્તવણ્ણના

૪૨. દ્વે તીણિ ભત્તાનિ અભુત્વાતિ દ્વે તયો વારે ભત્તાનિ અભુઞ્જિત્વા. ઉટ્ઠાતું ન સક્કોતીતિ ઉટ્ઠાતુમ્પિ ન સક્કોતી, પગેવ અઞ્ઞં સરીરેન કાતબ્બકિચ્ચં દુબ્બલભાવતો. દુબ્બલોપિ હુત્વાતિ ભુઞ્જનતો પુબ્બે દુબ્બલો હુત્વા બલસમ્પન્નો હોતિ. એવં બ્યતિરેકતો અન્વયતો ચ આહારસ્સ સરીરે બલવતં આહ. યસ્મા અન્નદો દાયકો પટિગ્ગાહકસ્સ બલદો હોતિ, તસ્મા સો આયતિં અત્તનો સરીરે બલદો અવિનાસવસેન બલસ્સ રક્ખકો ચ હોતિ. તેનાહ ભગવા – ‘‘બલં ખો પન દત્વા બલસ્સ ભાગી હોતી’’તિ (અ. નિ. ૫.૩૭) સેસપદેસુપિ એસેવ નયો. સુરૂપોપીતિ અભિરૂપોપિ. વિરૂપો હોતીતિ બીભચ્છરૂપો કોપીનસ્સ અચ્છન્નત્તા. ઇદઞ્ચ યાનન્તિ સામઞ્ઞતો વુત્તં. ઉપાહનાતિ સરૂપતો દસ્સેતિ. અદુક્ખપ્પત્તો હુત્વા યાતિ વત્તતિ એતેનાતિ યાનન્તિ છત્તાદીનમ્પિ યાનભાવો વુત્તો. તેનાહ ‘‘યાનદો સુખદો હોતી’’તિ. ચક્ખુદો નામ હોતિ ચક્ખુના કાતબ્બકિચ્ચે સહકારીકારણભાવતો દીપસ્સ.

‘‘સબ્બેસંયેવ બલાદીનં દાયકો હોતી’’તિ સઙ્ખેપતો વુત્તં અત્થં વિત્થારતો દસ્સેતું ‘‘દ્વે તયો ગામે’’તિઆદિ વુત્તં. નિસજ્જાદિવસેન પતિસ્સયિતબ્બતો પતિસ્સયો, વિહારો. પક્ખિત્તં વિય હોતિ પરિસ્સમસ્સ વિનોદિતત્તા. બહિ વિચરન્તસ્સાતિ પતિસ્સયં અલભિત્વા બહિ વિવટઙ્ગણે વિચરન્તસ્સ. ઝાયતીતિ ઝાયન્તં હોતિ, કિલમતીતિ અત્થો. સીતુણ્હાદિવિરોધિપચ્ચયવસેન સસન્તાને વિસભાગસન્તતિ, તબ્બિપરિયાયતો સભાગસન્તતિ વેદિતબ્બા. સુખં નામ દુક્ખપચ્ચયપરિહારતો સુખપચ્ચયુપ્પન્નતો ચ હોતિ, તદુભયં પતિસ્સયવસેન લભતીતિ દસ્સેન્તો ‘‘બહિ વિચરન્તસ્સ પાદે’’તિઆદિમાહ. ધમ્મપીતિસુખન્તિ ધમ્મપચ્ચવેક્ખણેન ઉપ્પન્નપીતિસુખં. ઉપસમસુખન્તિ કિલેસાનં વૂપસમેન પવત્તસુખં. નિવાતં પિહિતવાતપાનં પતિસ્સયં પવિસિત્વા દ્વારં પિધાય ઠિતસ્સ અન્ધકારો હોતીતિ વુત્તં ‘‘કૂપે ઓતિણ્ણો વિય હોતી’’તિ. તેનાહ ‘‘મઞ્ચપીઠાદીનિ ન પઞ્ઞાયન્તી’’તિ. તયિદં બહિસમાપન્નપરિસ્સમદોસેન, ન ચ પતિસ્સયદોસેન. તેનાહ ‘‘મુહુત્ત’’ન્તિઆદિ.

ન મરતિ એતેનાતિ અમરણં, નિબ્બાનાધિગમાદયો. તસ્સ દાનં ધમ્મૂપદેસો, તં દેતિ. તેનાહ ‘‘યો ધમ્મં અનુસાસતી’’તિ. તયિદં ધમ્માનુસાસનં કથં હોતીતિ આહ ‘‘અટ્ઠકથ’’ન્તિઆદિ. અટ્ઠકથં કથેતીતિ અવિવટપાઠસ્સ પાળિયા અત્થસંવણ્ણનં કરોતીતિ અત્થો. અનધીતિનો પન પાળિં વાચેતિ. તત્થ તત્થ ગતટ્ઠાને પુચ્છિતપઞ્હં વિસ્સજ્જેતિ, અયં તાવ ગન્થધુરો, પટિપત્તિવાસધુરે પન કમ્મટ્ઠાનં આચિક્ખતિ, ઉભયેસમ્પિ ધમ્મસ્સવનં કરોતિ. સબ્બદાનન્તિ યથાવુત્તઆમિસદાનં અભયદાનં. ધમ્મદાનન્તિ ધમ્મદેસના. ધમ્મરતીતિ સમથવિપસ્સનાધમ્મે અભિરતિ. ધમ્મરસોતિ સદ્ધમ્મસન્નિસ્સયં પીતિપામોજ્જં.

કિંદદસુત્તવણ્ણના નિટ્ઠિતા.