૪. નસન્તિસુત્તવણ્ણના

૩૪. કમનીયાનીતિ કન્તાનિ. તતો એવ એતાનિ ઇટ્ઠારમ્મણાનિ સુખારમ્મણાનિ રૂપાદીનિ, તે પન વત્થુકામા, તદારમ્મણકિલેસકામા વા. ‘‘ન સન્તિ કામા મનુજેસૂ’’તિ દેસનાસીસમેતં, નિચ્છયેન કામા અનિચ્ચાયેવ. મચ્ચુ ધીયતિ એત્થાતિ મચ્ચુધેય્યં. ન પુન આગચ્છતિ એત્થ તં અપુનાગમનં. અપુનાગમનસઙ્ખાતં નિબ્બાનં અનુપગચ્છનતો. નિબ્બાનં હીતિઆદિ વુત્તસ્સેવત્થસ્સ વિવરણં. બદ્ધોતિ પટિબદ્ધચિત્તો. પમત્તોતિ વોસ્સગ્ગપમાદં આપન્નો.

તણ્હાછન્દતો જાતં તસ્સ વિસેસપચ્ચયત્તા. ઇચ્છિતં હનતીતિ અઘં, દુક્ખં. ઇધ પન અનવસેસપરિયાદાનવસેન પઞ્ચુપાદાનક્ખન્ધા દુક્ખન્તિ. છન્દવિનયા અઘવિનયોતિ હેતુનિરોધેન હિ ફલનિરોધો, એવં સઉપાદિસેસનિબ્બાનં વત્વા અઘવિનયા દુક્ખવિનયોતિ અનુપાદિસેસનિબ્બાનં વદતિ.

ચિત્રાનીતિ કિલેસકામાપિ વેદનાદિટ્ઠિસમ્પયોગભેદેન હોન્તિ, આકારભેદેન ચ અત્થિ સવિઘાતાવિઘાતાતિ તતો વિસેસેતું ‘‘આરમ્મણચિત્તાની’’તિ વુત્તં. સઙ્કપ્પિતરાગોતિ સુભાદિવસેન સઙ્કપ્પિતવત્થુમ્હિ રાગો. કિલેસકામો કામોતિ વુત્તો તસ્સેવિધ વિસેસતો કામભાવસિદ્ધિતો. પસૂરસુત્તેન વિભાવેતબ્બો ‘‘ન તે કામા’’તિઆદિના તસ્સ વત્થુમ્હિ આગતત્તા. ઇદાનિ તમત્થં સઙ્ખેપેનેવ વિભાવેન્તો ‘‘પસૂરપરિબ્બાજકો હી’’તિઆદિમાહ. ન તે કામા યાનિ ચિત્રાનિ લોકેતિ તે ચે કામા ન હોન્તિ, યાનિ લોકે ચિત્રાનિ રૂપાદિઆરમ્મણાનિ. વેદેસીતિ કેવલં સઙ્કપ્પરાગઞ્ચ કામં કત્વા વદેસિ ચે. હેહિન્તીતિ ભવેય્યુન્તિ અત્થો. સુણન્તો સદ્દાનિ મનોરમાનિ, સત્થાપિ તે હેહિતિ કામભોગીતિ પચ્ચેકં ગાથા, ઇધ પન સંખિપિત્વા દસ્સિતા. ધીરા નામ ધિતિસમ્પન્નાતિ આહ ‘‘પણ્ડિતા’’તિ.

તસ્સાતિ યો પહીનકોધમાનો સબ્બસો સંયોજનાતિગો નામરૂપસ્મિં અસજ્જન્તો રાગાદિકિઞ્ચનરહિતો, તસ્સ. મોઘરાજા નામ થેરો બાવરીબ્રાહ્મણસ્સ પરિચારકાનં સોળસન્નં અઞ્ઞતરો. યથાનુસન્ધિં અપ્પત્તો સાવસેસ-અત્થો, કિઞ્ચિ વત્તબ્બં અત્થીતિ અધિપ્પાયો. સબ્બસો વિમુત્તત્તાવ દેવમનુસ્સા નમસ્સન્તિ, યે તં પટિપજ્જન્તિ. તેસં કિં હોતિ? કિઞ્ચિપિ ન સિયાતિ અયમેત્થ અત્થવિસેસો? દસબલં સન્ધાયેવમાહ ઉક્કટ્ઠનિદ્દેસેન. અનુપટિપત્તિયાતિ પટિપત્તિં અનુગન્ત્વા પટિપજ્જનેન. નમસ્સન્તિ તં પૂજેન્તિ.

ચતુસચ્ચધમ્મં જાનિત્વાતિ તેન પટિવિદ્ધં ચતુસચ્ચધમ્મં પટિવિજ્ઝિત્વા. તથા ચ બુદ્ધસુબુદ્ધતાય નિબ્બેમતિકા હોન્તીતિ આહ ‘‘વિચિકિચ્છં પહાયા’’તિ. તતો પરં પન અનુક્કમેન અગ્ગમગ્ગાધિગમેન સઙ્ગાતિગાપિ હોન્તિ. અસેક્ખધમ્મપારિપૂરિયા પસંસિયા વિઞ્ઞૂનં પસંસાપિ હોન્તીતિ.

નસન્તિસુત્તવણ્ણના નિટ્ઠિતા.