૧૦. અરઞ્ઞસુત્તવણ્ણના

૧૦. સન્તકિલેસાનન્તિ વૂપસન્તકિલેસપરિળાહાનં. યસ્મા સીલાદિગુણસમ્ભવં તતો એવ ભયસન્તઞ્ચ ઉપાદાય પણ્ડિતા ‘‘સન્તો’’તિ વુચ્ચન્તિ, તસ્મા વુત્તં ‘‘પણ્ડિતાનં વા’’તિ. તેનાહ ‘‘સન્તો હવે’’તિઆદિ. સેટ્ઠચારીનન્તિ સેટ્ઠચરિયં ચરન્તાનં. યસ્મા પુથુજ્જનકલ્યાણતો પટ્ઠાય ભિક્ખુ મગ્ગબ્રહ્મચરિયવાસં વસતિ નામ, તસ્મા આહ ‘‘મગ્ગબ્રહ્મચરિયવાસં વસન્તાન’’ન્તિ. અરિયાનં પન મુખવણ્ણસ્સ પસીદને વત્તબ્બમેવ નત્થિ. મૂલકમ્મટ્ઠાનન્તિ પારિહારિયકમ્મટ્ઠાનં. વિસભાગસન્તતીતિ નાનારમ્મણેસુ પવત્તચિત્તસન્તતિ. સા હિ વિક્ખેપબ્યાકુલતાય અપ્પસન્ના સમાહિતચિત્તસન્તતિયા વિસભાગસન્તતિ. ઓક્કમતીતિ સમાધિસભાગા ચિત્તસન્તતિ સમથવીથિં અનુપવિસતિ. ચિત્તં પસીદતીતિ કમ્મટ્ઠાનનિરતં ભાવનાચિત્તં સન્ધાયાહ, તં પસન્નં હુત્વા પવત્તતિ. લોહિતં પસીદતીતિ ચિત્તકાલુસ્સિયસ્સાભાવતો લોહિતં અનાવિલં હોતિ. પરિસુદ્ધાનિ હોન્તિ કારણસ્સ પરિસુદ્ધભાવતો. તાલફલમુખસ્સ વિય મુખસ્સ વણ્ણો હોતીતિ મુખ-સદ્દસ્સ આદિમ્હિ પમુત્તપદેન યોજેતબ્બો. એવઞ્હિ ચસ્સ પમુત્તગ્ગહણં સમત્થિતં હોતિ તાલફલમુખસ્સ વણ્ણસમ્પદાસદિસત્તા. તિભૂમકો એવ તેભૂમકો.

અતીતં નાનુસોચન્તિ અતીતં પચ્ચયલાભં લક્ખણં કત્વા ન સોચન્તિ ન અનુત્થુનન્તિ. જપ્પનતણ્હાય વસેન ન પરિકપ્પન્તીતિ આહ ‘‘ન પત્થેન્તી’’તિ. યેન કેનચીતિ ઇતરીતરેન. તઙ્ખણે લદ્ધેનાતિ સન્નિધિકારપરિભોગાભાવમાહ. તિવિધેનપિ કારણેનાતિ તિપ્પકારેન હેતુના, તિલક્ખણસન્તોસનિમિત્તન્તિ અત્થો.

વિનાસન્તિ વિનાસનહેતું. વિનસ્સન્તિ એતેહીતિ વિનાસો, લોભદોસા તદેકટ્ઠા ચ પાપધમ્મા. અરૂપકાયસ્સ વિય રૂપકાયસ્સપિ વિસેસતો સુક્ખભાવકારણન્તિ આહ ‘‘એતેન કારણદ્વયેના’’તિ. લુતોતિ લૂનો.

અરઞ્ઞસુત્તવણ્ણના નિટ્ઠિતા.

નળવગ્ગવણ્ણના નિટ્ઠિતા.