૪. ચતુત્થનિસ્સગ્ગિયપાચિત્તિયસિક્ખાપદં

૭૪૮. ચતુત્થે કિણાતિ અનેનાતિ કયન્તિ વચનત્થેન મૂલં કયં નામાતિ આહ ‘‘મૂલેના’’તિ. સાતિ થુલ્લનન્દા, આહ કિરાતિ સમ્બન્ધો. ઞાધાતુયા અવબોધનત્થતો અઞ્ઞમ્પિ ઞાધાતુયા યાચનત્થં દસ્સેન્તો આહ ‘‘યાચિત્વા વા’’તિ.

૭૫૨. યન્તિ સબ્બિતેલાદિ. તઞ્ઞેવાતિ સબ્બિતેલાદિમેવ. યમકન્તિ સબ્બિં સહ તેલેન યુગળં કત્વા. વેજ્જેનાતિ ભિસક્કેન. સો હિ આયુબ્બેદસઙ્ખાતં વિજ્જં જાનાતીતિ વેજ્જોતિ ચ રોગઞ્ચ તસ્સ નિદાનઞ્ચ ભેસજ્જઞ્ચ વિદતિ જાનાતીતિપિ વેજ્જોતિ ચ વુચ્ચતિ. તતોતિ વેજ્જેન વુત્તકારણા. કહાપણસ્સાતિ કહાપણેન, આભતન્તિ સમ્બન્ધોતિ. ચતુત્થં.