૧-૨-૩. પઠમ-દુતિય-તતિયસિક્ખાપદ-અત્થયોજના

૧૧૧૯. કુમારિભૂતવગ્ગસ્સ પઠમદુતિયતતિયેસુ યા પન તા મહાસિક્ખમાનાતિ સમ્બન્ધો. સબ્બપઠમા દ્વે મહાસિક્ખમાનાતિ ગબ્ભિનિવગ્ગે સબ્બાસં સિક્ખમાનાનં પઠમં વુત્તા દ્વે મહાસિક્ખમાના. તા પનાતિ મહાસિક્ખમાના પન. સિક્ખમાનાઇચ્ચેવ વત્તબ્બાતિ સમ્મુતિકમ્મેસુ સામઞ્ઞતો વત્તબ્બા. ‘‘ગિહિગતા’’તિ વા ‘‘કુમારિભૂતા’’તિ વા ન વત્તબ્બા, વદન્તિ ચે, સમ્મુતિકમ્મં કુપ્પતીતિ અધિપ્પાયો. ગિહિગતાયાતિ એત્થ ગિહિગતા નામ પુરિસન્તરગતા વુચ્ચતિ. સા હિ યસ્મા પુરિસસઙ્ખાતેન ગિહિના ગમિયિત્થ, અજ્ઝાચારવસેન, ગિહિં વા ગમિત્થ, તસ્મા ગિહિગતાતિ વુચ્ચતિ. અયં સિક્ખમાનાતિ સમ્બન્ધો. કુમારિભૂતા નામ સામણેરા વુચ્ચતિ. સા હિ યસ્મા અગિહિગતત્તા કુમારી હુત્વા ભૂતા, કુમારિભાવં વા ભૂતા ગતા, તસ્મા કુમારિભૂતાતિ વુચ્ચતિ. તિસ્સોપીતિ ગિહિગતા કુમારિભૂતા મહાસિક્ખમાનાતિ તિસ્સોપિ. સિક્ખમાનાતિ સિક્ખં માનેતીતિ સિક્ખમાનાતિ. પઠમ દુતિય તતિયાનિ.