૮. ઉપસ્સુતિસિક્ખાપદં

૪૭૧. અટ્ઠમે ‘‘અધિકરણજાતાન’’ન્તિ એત્થ અધિકરણસ્સ પકરણતો વિવાદાધિકરણભાવઞ્ચ વિસેસનપરપદભાવઞ્ચ દસ્સેન્તો આહ ‘‘ઉપ્પન્નવિવાદાધિકરણાન’’ન્તિ. તત્થ ઉપ્પન્નસદ્દેન જાતસદ્દસ્સત્થં દસ્સેતિ. વિવાદસદ્દેન અધિકરણસ્સ સરૂપં દસ્સેતિ. સુય્યતીતિ સુતિ વચનં, સુતિયા સમીપં ઉપસ્સુતિ ઠાનન્તિ અત્થં દસ્સેતું વુત્તં ‘‘સુતિસમીપ’’ન્તિ. ‘‘સમીપ’’ન્તિ ઇમિના ઉપસદ્દસ્સત્થં દસ્સેતિ. ‘‘યત્થા’’તિઆદિના ‘‘ઉપસ્સુતી’’તિ એત્થ ઉપસદ્દસ્સ પધાનત્તા તસ્સ સરૂપં દસ્સેતિ. યત્થાતિ યસ્મિં ઠાને. મન્તેન્તન્તિ એત્થ ઉપયોગવચનસ્સ ભુમ્મત્થે અધિપ્પેતત્તા વુત્તં ‘‘મન્તયમાને’’તિ.

૪૭૩. ‘‘વૂપસમિસ્સામી’’તિ એત્થ ઇધાતુયા ગત્યત્થં દસ્સેતું વુત્તં ‘‘વૂપસમં ગમિસ્સામી’’તિ. અકારકભાવન્તિ નિદ્દોસભાવં. સોતુકામતાય ગમનવસેન સિયા કિરિયન્તિ યોજના. પરતોપિ એસેવ નયોતિ. અટ્ઠમં.